काठमाडौं- १४ औं महाधिवेशन पुस ११ गते पारित निर्णयअनुसार नै हुने गरी नेपाली कांग्रेसभित्र पछिल्लो समय उत्पन्न विवाद अन्त्य हुने भएको छ।
तल्लो तहका अधिवेशन मिति अघि सार्ने गरी नेताहरू सहमति नजिक पुगेको बताइएको छ।
मंगलबार साँझ केन्द्रीय कार्यालय सानेपामा बसेको शीर्ष तहका नेताबीच विवाद समाधान गर्ने सहमति बनेको हो।
सहमति अनुरुप केन्द्रीय महाधिवेशन पूर्व निर्धारित मिति २०७७ फागुनमा नै हुनेछ।
स्थानीय तहको अधिवेशनलाई पूर्व निर्धारित समयभन्दा ६ महिना अघि सार्ने विषयमा नेताहरू सहमति उन्मुख भएको बताइएको छ।
विधानका धारा निलम्बन गर्ने निर्णय फिर्ता गरी आवश्यकता अनुसार पछि निलम्बन गर्ने सहमति पछिल्लो पटक बनेको छ।
राष्ट्रियसभाको निर्वाचन लगत्तै केन्द्रीय समितिको बैठक बोलाएर सर्वसहमतिमा निर्णय सार्वजनिक तयारी गरिएको छ।
उत्पन्न विवाद अन्त्यको लागि उपसभापति विमलेन्द्र निधि, पूर्व महामन्त्रीद्धय प्रकाशमान सिंह र कृष्णप्रसाद सिटौलाबीच छलफल भएको हो।
केन्द्रीय समितिको निर्णयपछि संस्थापन पक्षविरुद्ध इतर समूह रुष्ट भएपछि विवाद अन्त्यको लागि दोश्रो तहका नेताहरू सक्रिय बनेका हुन्।
आइतबार सभापति शेरबहादुर देउवाले वरिष्ठ नेता रामचन्द्र पौडेल र पूर्वमहामन्त्री सिटौलासँग बैठक गरेका थिए।
त्यसअघि सभापतिले असन्तुष्ट जिल्ला सभापतिलाई भेटेर सहमतिमै अघि बढ्ने प्रतिबद्धता जनाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
