काठमाडौं- स्पेनिस क्लब बार्सिलोनामा प्रशिक्षक एर्नेस्टो भालभर्देको समय राम्रो चलिरहेको छैन। ला लिगामा बार्सिलोनालाई दुई उपाधि जिताएका भालभर्देले च्याम्पियन्स लिगको खराब रेकर्डका कारण सुरुदेखि समर्थकको मन जित्न सकेका छैनन्।
च्याम्पियन्स लिगमा गएको सिजन सेमिफाइनलमा लिभरपुलसँगको हार र त्यसअघिको वर्ष क्वाटरफाइनलमा रोमासँगको हारले चिढिएका समर्थक हरेक हारमा दोष भालभर्देलाई नै दिन्छन्। जितको जस भने लियोनल मेस्सी र खेलाडीहरुलाई।
लुइस इनरिकपछि २०१७ को मे महिनामा बार्सिलोनाको प्रशिक्षक बनेका भालभर्देले २०१७–१८ र २०१८–१९ को ला लिगा उपाधि बार्सिलोनालाई जिताए। एक कोपा डेल रे र एक स्पेनिस सुपर कपको उपाधिसमेत जिताएका भालभर्देको शैली बार्सिलोना चलिरहेको पुरानो शैलीभन्दा भिन्न छ। यसैले पनि बार्सिलोनाको खेलमा अभ्यस्त दर्शक उनको शैली मन पराउँदैनन्।
गएको शुक्रबार स्पेनिस सुपर कपमा एथ्लेटिको मड्रिडसँगको ३–२ को हारले त ब्यवस्थापन पनि नयाँ प्रशिक्षकको चाहनामा देखिएको छ। त्यसमा विशेष गरी आइरहेको नाम हो, जाभी।
बार्सिलोनाका पूर्वखेलाडी जाभीले बिग्रिएको बार्सिलोनाको खेलशैलीमा सुधार ल्याउन सक्ने अपेक्षा भइरहेको छ। तर चलिरहेको सिजनको बीचमा प्रशिक्षक परिवर्तन गर्नु असाध्यै चुनौतीपूर्ण विषय हो।
बार्सिलोनाको एक टोलीले कतार पुगेर जाभीसँग कुराकानी गरिसकेको छ। २०१५ मा बार्सिलोना छाडेपछि खेलाडीको रुपमा कतारको अल साद क्लबमा रहेका जाभी २०१९ देखि प्रशिक्षकका रुपमा छन्। आफ्नो सपना बार्सिलोनाको प्रशिक्षक बन्ने नै रहेको बताउने जाभी अहिले नै त्यो समय आए नआएकोमा भने स्पष्ट छैनन्।
.jpg)
‘मेरो सपना बार्सिलोनाको प्रशिक्षक बन्ने नै हो। त्यसलाई म लुकाउन सक्दिनँ, यो मैले धेरै अन्तर्वार्तामा भनिसकेको पनि छु। मेरो मनमुटुमा बार्सिलोना नै छ। तर, अहिले अल सादमा भइरहँदा बार्सिलोना जाने समय हो या होइन भन्नेमा दुविधामा छु’ जाभीले भनेका छन्।
बार्सिलोनासँगै आफूले प्रशिक्षक भालभर्देको पनि सम्मान गर्ने भन्दै उनी भन्छन्- ‘बार्सिलोना र भालभर्देप्रति मेरो सम्मान छ, अहिले म जहाँ छु त्यहाँ खुसी छु। यहाँको खेलहरुमा नै मेरो ध्यान छ। बार्सिलोनाको एक टोलीसँग मैले कुराकानी गरेको हो तर के भएको थियो भन्ने भन्नु मिल्दैन।’
बार्सिलोनाले जाभीलाई साढे दुई वर्षको सम्झौताको लागि आग्रह गरेको बताइएको छ। यति उनी अहिले नै आउन तयार नभए पनि सिजन सकिएलगत्तै दुई वर्षको सम्झौतामा आउने गरी प्रस्ताव अघि बढेको स्पेनिस सञ्चारमाध्यमका खबरमा उल्लेख छ। पछिल्लो समय छरिएका खबरलाई विश्वास गर्ने हो भने जाभीले आइतबार अबेरसम्म एक निर्णय दिने बताइएको छ।
.jpg)
स्पेनबाट २००८ को युरो कप, २०१० को विश्वकप र २०१२ को युरो कप जितेका जाभी १९९८ देखि २०१५ सम्म बार्सिलोना मिडफिल्डमा महत्वपूर्ण खेलाडी थिए। बार्सिलोनाको ‘टिकी टाका’ शैलीमा पनि सधैँ केन्द्रमा जाभी देखिन्थे।
तर खेलाडीको रुपमा गएको वर्षमात्र विश्राम लिएका जाभी कतारबाट सिधै बार्सिलोनाको प्रशिक्षक बन्न पूर्णरुपमा तयार नहुनु पनि तर्कसंगत देखिन्छ। यदि जाभी बार्सिलोनाको प्रशिक्षक बनेर आएमा अवसरभन्दा ज्यादा उनका लागि चुनौती हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
