काठमाडौं- प्रदेश ३ को राजाधानी विवाद समाधान गर्न नेकपाको संसदीय दलको बैठक बसेको छ।
मुख्यमन्त्री डोरमणी पौडेलको निवासमा संसद बैठकअघि सहमति जुटाउनका लागि बैठक बोलाइएको हो। प्रदेश सभाको बैठक ३ बजेलाई राखिएकाले त्यसअघि सहमति गर्न संसदिय दलको बैठक डाकिएको नेकपाका एक नेताले बताए।
दोस्रो पटक नेकपाको शीर्ष नेतृत्वमा राजधानी हेटौंडामा सहमती गर्न निर्देशन दिएर पठाएको तर सांसदहरू त्यसको विपक्षमा भएपछि मुख्यमन्त्रीको अगुवाइमा बैठक बसेको हो।
प्रदेश सभाको बैठकमा बुधबार बोल्ने अधिकांश सांसदहरूले हेटौंडा स्वीकार गर्न नसकिने तर्क गरेका थिए। राजधानी र नाम राख्ने अधिकार प्रदेश सभाको भएकाले केन्द्रबाट जारी भएको निर्देशन मान्न नसकिने भन्दै आलोचना भएपछि मुख्यमन्त्री पौडेल अफ्ठ्यारोमा परेका छन्।
पार्टीको निर्देशन विपरीत जान नसक्ने भएकाले उनले नेकपाका सांसदहरूलाई विपक्षमा फ्लोर क्रस नर्गन निर्देशन दिँदै आएका छन्। तर नेकपाका सांसदहरूले हेटौंडाको विषयमा आफूहरू विपक्षमा मतदान गर्ने चेतावनी दिइरहेका छन्।
काठमाडौं, दोलखा, नुवाकोट,काभ्रे र धार्दिङका सांसदहरू हेटौंडाको विपक्षमा रहेका छन्। प्रदेश सभामा नेकपाका ८० सांसद रहेका छन्। ती मध्ये ३७ सांसदले विपक्षमा मत हाल्ने चेतावनी दिएपछि मुख्यमन्त्री अफ्ठ्यारोमा परेका थिए।
उनले सहमतिका लागि अष्टलक्ष्मी शाक्यसहित केही नेतालाई प्रधानमन्त्री केपी शर्मा ओली र अर्का अध्यक्ष पुष्पकमल दाहालसँग पनि छलफल गराएका थिए। दुवै अध्यक्षले हेटौंडा नै हुनुपर्ने दबाब दिएपछि सांसदहरूले हिजो प्रदेश सभा बैठकमा त्यसको आलोचना गरेका थिए।
सत्तारुढ नेकपाका सांसदहरू विपक्षमा भएमा विधेयक पास नहुने भएपछि प्रदेश सभाको छलफल केही लम्याउने रणनीतिमा मुख्यमन्त्री पौडेल रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
