सुर्खेत– झट्ट हेर्दा कर्णाली प्रदेशलाई समृद्ध बनाउन सकिने सम्भावना प्रशस्त छन्, जुन कुरा मुख्यमन्त्री महेन्द्रबहादुर शाहीलाई राम्रैसँग थाहा छ। तर, ती सम्भावनालाई सदुपयोग गर्दै कर्णालीलाई समृद्ध बनाउन सामना गर्नुपर्ने कठिन चुनौतीहरुबारे पनि उनी राम्रै जानकार छन्।
‘हामीसँग सम्भावनाहरु पनि छन् र चुनौतीहरु पनि उत्तिकै कठिन छन्’, मुख्यमन्त्री शाही भन्छन्, ‘यदि सबैले हामीले अपेक्षा गरे अनुसार साथ दिएर सहयोग गरेमा ती चुनौती पार गर्दै हामी कर्णालीको अहिलेको विम्ब बदल्न सक्षम हुनेछौं।’
समृद्ध कर्णाली बनाउने लक्ष्य पूरा गर्न मुख्यमन्त्री शाहीले खोजेको साथ हो, निजी क्षेत्रको। निजी क्षेत्रको साथ र लगानीबिना सरकारले मात्रै आर्थिक समृद्धि ल्याउन तत्कालका लागि नसक्नेमा उनी सचेत छन्। त्यसैले उनले सधैंजस्तो भन्ने गरेका छन्, ‘निजी क्षेत्र र सरकार मिलेर यो प्रदेशको विकास गर्नुपर्छ।’
सबैभन्दा गरीब प्रदेशको रुपमा रहेको कर्णाली यतिबेला आर्थिक विकासका सम्भावनाहरुको खोजीमा छ। त्यसैले सरकारको अर्जुनदृष्टि यतिबेला यहाँको पर्यटन विकासमा केन्द्रित भएको छ। पर्यटन विकासमार्फत कर्णालीको अर्थतन्त्र बलियो बनाउन सकिने निष्कर्षसहित प्रदेश सरकारकै आयोजनामा २०७५ लाई कर्णाली–रारा पर्यटन वर्षको रुपमा मनाइँदै छ। उक्त पर्यटन वर्षको प्रधानमन्त्री केपी शर्मा ओलीले आगामी बैसाख १ गते मुगुको रारा तालबाट औपचारिक उद्घाटन गर्दै छन्।
‘कर्णाली–रारा पर्यटन वर्ष सुरुवात हो’, शाहीले भने, ‘यो अभियानसँगसँगै हामी आर्थिक क्रान्तिका विभिन्न गतिविधि सञ्चालन गर्दै अघि बढ्नेछौं।’
हरेक क्षेत्रको विकासका लागि लगानी अपरिहार्य हुने भन्दै शाहीले सरकार अहिले नै आर्थिक रुपमा पूर्ण सक्षम नभएकाले निजी क्षेत्रसँग समन्वय गरेरै अघि बढ्ने बताउँछन्।
उनले पटक–पटक निजी क्षेत्रलाई कर्णालीको जलविद्युत्, पर्यटन, कृषि र अन्य ठूला उद्योगमा लगानी गर्न आह्वान गर्दै आएका छन्। लगानीकर्ताहरुलाई सरकारले प्रोत्साहन र सहयोग गर्ने उनको भनाइ छ।
‘हाम्रो प्रदेशभित्रको जलविद्युत् र औद्योगिक क्षेत्रमा ढुक्कसँग लगानी गर्न निजी क्षेत्रलाई आग्रह गर्छु’, उनी भन्छन्, ‘प्रदेश सरकारले लगानी सुरक्षित गर्न सबै सहयोग गर्छ।’
प्रदेशको विकासका लागि लागि बाह्य लगानी भित्र्याउने वातावरण निर्माण गर्न सरकार तयार रहेकाले ढुक्कले लगनी गर्न उनको आग्रह छ।
मुख्यमन्त्री शाहीले लगानीकर्तालाई निश्चित अवधिसम्म कर नलगाउने नीति सरकारले बनाउन लागेको समेत बताए।
‘लगानीकर्ताको लगानी सुरक्षित नहुन्जेल कर नलगाउने गरी प्रदेश सरकारले नीति बनाउँदै छ’, उनले भने, ‘लगानीको सुरक्षा र नाफाको ग्यारेन्टी प्रदेश सरकारले गर्छ, तपाईंहरु लगानी गर्नुस्।’
लगानीको वातावरण निर्माण गर्न सरकार गम्भीर रहेको भन्दै आर्थिक मामिला तथा योजनामन्त्री प्रकाश ज्वालाले पनि ढुक्क भएर कर्णालीमा लगानी गर्न निजी क्षेत्रलाई आग्रह गरे। ठूलो लगानी भित्र्याउने गरी लगानीकर्ताहरुलाई आकर्षित गर्ने नीति लिइने उनले बताए।
‘ठूलो स्तरको लगानीबिना कर्णाली प्रदेशको विकास सम्भव छैन’, उनी भन्छन्, ‘लगानीमैत्री वातावरण बनाउने जिम्मेवारी सरकारको हो, हामी त्यो काम गर्न तयार छौं।’
निजी क्षेत्रले पनि कर्णालीमा लगानी गर्न तयार रहेको बताउँदै आएको छ। केही दिनअघि सुर्खेतमा आयोजित एक कार्यक्रममा नेपाल उद्योग वाणिज्य महासंघकी अध्यक्ष भवानी राणाले कर्णालीमा लगानी गर्न आफूहरु तयार रहेको भन्दै पूर्वाधार विकासमा ध्यान दिन सरकारलाई सुझाव दिएकी थिइन्।
यस्तै, महासंघका पूर्वअध्यक्ष कुशकुमार जोशीले पनि कर्णालीको सम्भावनालाई आफूहरुले पनि हेरिरहेको भन्दै सरकारले लगानीको वातावरण सिर्जना गरेमा ठूलो लगानी यहाँ भित्रिने बताए। अन्य प्रदेशले भन्दा पहिलो कर्णालीले आफ्नो नाम र राजधानी सर्वसम्मत रुपमा तोकेर व्यवसायीहरुमा पनि सकारात्मक सन्देश प्रवाह गरेको भन्दै जोशीले यसले कर्णाली प्रदेशमा लगानीका लागि राजनीतिक वातावरण अनुकूल रहेको सन्देश दिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1683120258.jpg)
-1786602170.png)
