काठमाडौं– शनिबारदेखि सुरु हुने धनगढी प्रिमियर लिग (डिपिएल) क्रिकेट प्रतियोगितामा सहभागी ६ टिम मध्ये ५ टिमले विदेशी खेलाडी अनुबन्धन गरेका छन्। विराटनगर किंग्सले भने १ खेलाडीलाई अनुबन्धन गरेको छ भने १ खेलाडी टुंग्गो लगाउन बाँकी छ।
प्रत्येट टिमले २ जना विदेशी खेलाडी राख्नु पर्ने प्रवाधान अनुरुप महेन्द्रनगर युनाइटेडमा भारतको आइपिएल खेलेका पुनित विष्ट र रणजी प्लेयर पुनित मेहरा आवद्ध भएका छन्।
यस्तै, रुपन्देही च्यालेन्जर्सले भारतकै दीपक प्रसाद र ओमानका सुफ्यान महम्मदसँग अनुबन्धन गरेको छ।
सिवाइसी अत्तरियामा भारतका गौरव चितकार र विपिन चन्द विदेशी खेलाडीको रुपमा भित्रिएका छन्।
काठमाडौँ गोल्डेन्स्मा भारत रणजी प्लेयर जयकिसन कोल्सावाला र शनि पटेल सहभागी हुनेछन्।
टिम चौराहा धनगढीमा पुनित मिश्रा र युनाइटेड अरब इमिरेट्स(युएई) का कप्तान रोहन मुस्तफा अनुबन्धित भएका छन्।
अब खेलाडी विराटनगर किंग्सले एक अनुबन्धन गर्न बाँकी छ भने एक खेलाडीसँग सम्झौता भइसकेको छ। विराटनगरका सिइओ छुम्बी लामाका अनुसार एक खेलाडीको टुंगो लागेको तथा अर्का खेलाडीसँग साँझसम्म सम्झौता हुनेछ। भारत मुम्बइका शुभम् कामतसँग सम्झौता भइसकेको हो। उनी अलराउन्डर हुन्। हङकङका कप्तान बाबर हायतसँग कुरा भएपनि अहिलेसम्म टुंग्गो भने लागिसकेको छैन।
रणनीतिक खेलाडी
प्रतियोगितामा भाग लिने टिमका रणनीतिक खेलाडीमा महेन्द्रनगर युनाइटेडमा विनोद भण्डारी, रुपन्देही च्यालेन्जर्समा शक्ति गौचन, सिवाइसी अत्तरियामा दिपेन्द्रसिं ऐरी, टोली चौराहा धनगढीमा सोमपाल कामी, काठमाडौँ गोल्डेन्समा ज्ञानेन्द्र मल्ल र विराटनगर किंग्समा पारस खड्का रहेका छन्।
डिपिएलको मैदान तथा पिचको तयारी
धनगढीको संघीय प्रहरी इकाइ कार्यालयको खेल मैदानमा प्रतियोगिता आयोजना हुँदैछ। खेल मैदानलाई अन्तर्राष्ट्रियस्तरको प्रतियोगिताको अनुभूति हुने गरी पिच र मैदान आकर्षक ढंगले तयार गरिएको छ भने दर्शकहरु बस्नका लागि झण्डै सात हजार क्षमताको अस्थायी ‘प्यारापिट’ निर्माण गरिएको छ ।
प्रतियोगिताका लागि दुई महिनादेखि मैदानको व्यवस्थापन थालिएको थियो। दोस्रो संस्करणको यो प्रतियोगिताले आइसिसीको मान्यतासमेत पाएको छ। यससँगै धनगढीमा हुन लागेको यो प्रतियोगितालाई अन्तर्राष्ट्रिय उचाइमा पु¥याइदिएको छ जसका कारण प्रतियोगितामा भाग लिने सम्पूर्ण टोलीले उच्चस्तरका अन्तर्राष्ट्रिय खेलाडीलाई प्राथमिकता दिएर टोलीसँग अनुबन्ध गर्न पाएका छन् । विभिन्न टोलीमा अनुबन्ध भएका खेलाडी धनगढी भित्रिने क्रम शुरु भएको छ । प्रतियोगितामा भाग लिने सम्पूर्ण खेलाडी र कर्मचारीको बीमा गरिएको आयोजकले जनाएका छन् ।
प्रत्यक्ष प्रसारण
खेलको प्रत्यक्ष प्रसारण एपी वान एचडी टेलिभिजन स्ट्रिमिङबाट आइफिलिक्स अनलाइनका साथै डिपिएलको अफिसिएल फेसबुक तथा ट्वीटर पेज र एपमार्फत् प्रसारण गरिने व्यवस्था मिलाइएको छ । मैदानमा ठूलो पर्दाको व्यवस्थाका साथै खेलको पुनःप्रसारण (रिप्ले)को व्यवस्था हुन लागेको छ।
पुरस्कार
कूल १९ वटा खेल खेलाइने प्रतियोगिताको विजेताले रु २५ लाख, उपविजेताले रु १० लाख तेस्रो हुनेले रु तीन लाख र चौथो हुनेले रु दुई लाख पाउनेछन । यसबाहेक प्रतियोगिताको ‘म्यान अफ दि सिरिज’को उपाधि पाउने खेलाडीले मोटरसाइकल, गोल्डस्टार मोस्ट भ्यालुएबल प्लेयरको उपाधि पाउनेले गोल्डन बुट र प्रत्येक खेलको ‘म्यान अफ द म्याच’को उपाधि पाउनेले रु १० हजार पुरस्कार पाउनेछन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
