इंग्ल्यान्ड– इंग्ल्यान्डको राष्ट्रिय टोलीका पूर्वकप्तान माइकल भनले इंग्ल्यान्डविरुद्धको पछिल्लो एसेस शृंखलामा अष्ट्रेलियाले बल टेम्परिङ(धारिलो चिजले कोतरेर बललाई पुरानो बनाउनु) गरेको खुलासा गरेका छन्। नोभेम्बरदेखि जनवरीसम्म अष्ट्रेलियामा सम्पन्न भएको ५ म्याचको शृंखलामा इंगल्यान्ड ४–० ले पराजित भएको थियो।
दक्षिण अफ्रिकाविरुद्धको तेस्रो टेस्टका दौरानमा शनिबार अष्ट्रेलियाका प्रारम्भिक ब्याट्सम्यान क्यामरुन बनक्रफ्टले बल टेम्परिङ गरेको प्रमाणीत भएको केहि दिनपछि नै भानको सो भनाइ आएको हो।
सो बल टेम्परिङका मामलामा पहिले देखि नै जानकार रहेको भन्दै अष्ट्रेलियाका कप्तान स्टिभ स्मिथलाई आइसीसीले एक खेलमा प्रतिबन्ध तथा शतप्रतिशत म्याच फिको जरिवाना तोकेको थियो। अष्ट्रेलियाली सरकारले कप्तान स्मिथ र उपकप्तान डेभिड वार्नरलाई पदबाट हटाउने निर्णय गरिसकेको छ। त्यस्तै स्मिथलाई इन्डियन प्रिमियर लिग(आइपियल)को टिम राजस्थान रोयल्सले समेत कप्तानबाट हटाएको छ।
उक्त घटनापछि माफी समेत मागेका स्मिथले सो घटना पहिलो पटक भएको बताएका थिए। दक्षिण अफ्रिकाविरुद्धको केपटाउनमा भएको तेस्रो टेस्टको तेस्रो दिनको खेलका क्रममा बलमा रगड्नु पहिले क्यामरुनले पहेँलो रंगको पत्ती आफ्नो ट्राउजरबाट झिकिरहेको दृश्य टेलिभिजन फुटेजमा देखिएको थियो।
पहिलो दिनको खेलपछि टोलीको नेतृत्व समूहले बलिङमा फाइदा पुगोस् भन्न बलको अवस्थालाई खराब बनाउने योजना अनुरुप नै सो कार्य भएको स्मिथले खुलासा गरेका थिए।
उता सन् २००५ को एसेस शृंखलामा अष्ट्रेलियामाथि विजय हात पार्दा इंग्ल्यान्डका कप्तान रहेका भनले केपटाउनमा भएको खेलमा खाना सत्रपछि अष्ट्रेलियाले सो हर्कत गर्ला भन्ने आफुले नसोचेको बताए।
पछिल्लो ऐससका दौरानमा पनि अष्ट्रेलियाली खेलाडीहरुले बल टेम्परिङ गरेको बताउँदै उनले भने,‘मैले खेलका दौरानमा मैदानको मिड अफ र मिड अनमा बस्ने खेलाडीले पत्ती बोकेको देखेको थिएँ। उनीहरुको नाम मैले बताउँनु पर्दैन। ती को–को खेलाडी थिए भन्ने बारे अष्ट्रेलियाली टोलीलाई राम्रोसँग थाहा छ।’
‘म ढुक्क छु कि यो कार्य एसेसको खेलका दौरानमा नै भएको हो तर इंग्ल्यान्डले ४–० ले श्रृंखला गुमाउनुमा भने यसको कुनै हात छैन।’, उनले थपे,‘पछिल्लो १७ वर्षको क्रिकेट करिअरमा म सम्मिलित त्यस्तो कुनै टोली थिएन जो यस्तो हर्कतको लागि सोचोस्।’
उनले विश्व क्रिकेटमा बल टेम्परिङका लागि अन्य थुप्रै तरिकाहरु अवलम्बन गर्ने गरिएको दावी गरे। बललाई ‘रफ सर्फेस’मा बाउन्स गराउने, खेलाडिले चकलेट, चुइंगम खाएपछि बलमा थुक लगाउनेजस्ता कामहरु बिना कुनै रोकतोक भइरहेको तर यसले बलको अवस्थामा प्रभाव पार्ने उनले जानकारी दिए। यदि कसैलाई बल टेम्परिङका बारेमा प्रश्न गर्ने हो भने कसैले पनि सो कार्य गरेको नस्विकार्ने बताउँदै उनले लामो समयदेखि हुँदै आएको यस्तो कार्यलाई रोक्न अप्ठेरो हुने जीकिर गरे।
'एक मात्र अलिखित नियम छ कि बललाई खराब बनाउन कुनै पनि वस्तुको प्रयोग गर्न निषेध छ। तर म ढुक्क छु कि अष्ट्रेलियाली टोली सो कार्यका लागि निरन्तर सम्लग्न रहँदै आएको छ।’, उनले दावी गरे।
भनबाहेक केप टाउनमा खेल उद्घाेषणका दौरानमा आफुले क्यामेराम्यानहरुलाई अष्ट्रेलियाली खेलाडीमाथि निगरानी राख्न सचेत बनाएको पूर्व दक्षिण अफ्रिकी तिब्र गतिका बलर फ्यानी डे भिल्लियर्सले बताए। उनले भने,‘उनीहरुले २६, २७ र २८ ओभरमा रिभर्स स्विङ गराउन सक्ने शंका लागेर फिल्डरमाथि निगरानी राख्न भनेको थिएँ। त्यो समयमा उनीहरुले सामान्यभन्दा फरक किसिमको व्यवहार मैदानमा देखाएको मैले पाएँको थिए।’
अष्ट्रेलियाली खेलाडीहरुको अस्वाभाविक व्यवहारको निगरानी सुरु गरेको करिब डेढ घण्टामा क्यामेराम्यानहरुले ब्यानक्रफ्टको सो कार्यलाई कैद गर्न सफल भएको उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
