जनकपुर- प्रदेश २ सरकारले धनुषाको महेन्द्रनगरमा मंसिर २७ गते राति भएको बम बिस्फोटमा परी मृत्यु भएका परिवारलाई ३ लाख रुपैयाँ राहतस्वरुप उपलब्ध गराउने भएको छ।
प्रदेशको मन्त्रिपरिषद् बैठकले प्रतिमृतक ३ लाख र घाइतेहरुको उपचारका लागि प्रति घाइते डेढ लाख राहत उपलब्ध गराउने निर्णय गरेको हो।
घटना भएको भोलिपल्ट स्थलगत निरीक्षणमा पुगेका मुख्यमन्त्री लालबाबु राउतले पीडित परिवारलाई राहत र घाइतेहरुलाई उपचार खर्च प्रदेश सरकारले उपलब्ध गराउने घोषणा गरेका थिए।
दुर्घटनामा परी ३ जनाको मृत्यु भएको थियो भने अन्य ३ जना घाइते भएका थिए।
विस्फोटमा परी नेपाल प्रहरीका प्रहरी निरीक्षक अमिरकुमार दाहाल, स्थानीय राजेश्वर साह र आनन्द साहको मृत्यु भएको थियो।
स्थानीय राजेश साहको घरको गेटमा राखिएको बम विस्फोट हुँदा राजेश र उनका २४ वर्षीय छोरा आनन्दको घटनास्थलमै मृत्यु भएको हो।
राजेशका कान्छा छोरा प्रकाश, छोरी निक्कीकुमारी र बुबा भिखारी साह तथा प्रहरी जवान रिजनाथकुमार महतो घाइते भएका थिए।
मंसिर २७ गते शुक्रबार राति करिब १२ः०० बजे राजेशको नवनिर्मित घरको बाहिर फलामको गेटमा राजेशकी श्रीमती शौचका लागि उठेका बेला केही झुण्डिएको देखेपछि प्रहरीलाई खबर गरेका थिए।
खबर पाउनासाथ प्रहरी निरीक्षक दाहालको नेतृत्वमा गएको प्रहरी टोलीले गेटमा झुण्डिएको झोला बम हो वा होइन भनी अनुसन्धान गर्ने क्रममा विस्फोट भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
