धनगढी- शनिबार बिहान कैलारी गाउँपालिका- ८ पृथ्वीपुरस्थित लक्ष्मी माध्यमिक विद्यालयमा मानिसहरूको भीडभाड थियो। भीडभाडमा गौरीगंगा नगरपालिका- ११ का अशरानी चौधरीको मुहार हसिलो थियो। नापी कार्यालय धनगढीले वडामै आएर जग्गाधनी प्रमाणपूर्जा वितरण गर्ने जानकारी पाएपछि उनी त्यहाँ पुगेकी थिइन्।
नापी कार्यालयको टोलीले अशरानीको नाम बोलायो। उनी खुसी हुँदै मञ्चमा गइन्। मञ्चमा उनले कैलालीका प्रमुख जिल्ला अधिकारी यज्ञराज बोहराबाट आफनो लालपूर्जा लिइन्। उनले भनिन्, घर दैलोमै लालपूर्जा पाउँदा खुशी लागेको छ।'
नापी कार्यालयले २०५६ सालदेखि २०५८ सालसम्म पुनर्नापी गरेको थियो। द्वन्द्वकालीन समयमा टोलीले पुनः नापी गरे पनि जग्गाधनी प्रमाणपूर्जा भने बाड्न सकेको थिएन। कैलारी गाउँपालिका- ८ का चेतराज चौधरीले पनि घरआंगनमै जग्गाधनी प्रमाणपूर्जा पाउँदा खुसी व्यक्त गरे। उनले भने, 'जग्गाधनी प्रमाणपूर्जा नहुँदा घरखर्च चलाउन आवश्यक रकमका लागि बैंकबाट ऋण लिन सकिएको थिएन।'
नापी कार्यालय धनगढीको टोलीले शनिबार कैलारी गाउँपालिका- ८ गौरीगंगा नगरपालिकाकाे वडा नम्बर १० र ११ (साविक उदासिपुर गाविस)मा जग्गाधनी दर्ता प्रमाणपूर्जा वितरण गरेकाे हाे।
सोही अनुसार नापी टोलीले ३९ जना पुरुष र १३ जना महिला गरी ५२ जनालाई जग्गाधनी दर्ता प्रमाणपूर्जा वितरण गरेकाे जनाइएको छ। नापी कार्यालयका अनुसार ९७ जनालाई सो प्रमाणपत्र वितरण गर्ने लक्ष्य लिइएको थियो।
कार्यक्रममा कैलालीका प्रमुख जिल्ला अधिकारी बोहराले जग्गाधनीको प्रमाण नै लालपूर्जा भएको बताए। उनले भने, 'नेपालका अधिकांश मानिस कृषिमा निर्भर छन्। कृषि पेशा गर्नका लागि पनि जग्गाधनी प्रमाणपूर्जा आवश्यक हुन्छ।'
प्रजिअ बोहराले कसैले ऐलानीपर्ति जग्गा तथा सरकारी जग्गा आफ्नो नाममा गर्न नपाउने र गरेको पाइएमा कारबाही गरिने बताए। नापी कार्यालय धनगढीका प्रमुख सुर्दशनसिंह धामीले ढिलै भए पनि पुनःनापी जग्गाधनी प्रमाणपूर्जा वितरण गरिएको बताए।
नापी अधिकृत दिर्घराज पाण्डेयले स्वागत गरेको कार्यक्रममा गौरिगंगा नगरपालिका वडा नम्बर १० का अध्यक्ष पदम ऐर, वडा नम्बर ११ का अध्यक्ष विनोद चौधरी, कैलारी गाउँपालिका वडा नम्बर ८ का अध्यक्ष दुखीराम कठरिया लगायतको उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
