इटहरी- ‘श्रीराम जय राम जय जय राम !’ ‘सीताराम सीताराम !’ यो भजन अक्सर मन्दिरमा सुनिन्छ। तर शुक्रबार सुनसरी जिल्ला अदालत परिसर यस्तै भजन गुन्जायमान भयो। करिब ४ घण्टासम्म निरन्तर सीताराम र हिन्दुराज्य नेपाल भन्दै अदालत परिसरमा नारा लाग्यो। अदालत परिसरको अर्कोतर्फ भने केही महिला अधिकारकर्मी भनिरहेका थिए– बलात्कारीलाई फाँसी दे, ढोंगी बाबा चाहिँदैन।
अदालत गेटको वारीपारी बसेर दुई पक्षले लगाएको नाराले सुनसरी अदालतको माहोल चर्किएको थियो। दुवै नाराका एकै पात्र थिए बलात्कार आरोपी सिद्धबाबा भनिने कृष्णबहादुर गिरी। २५ दिन अगाडि पक्राउ परेका उनको शुक्रबार अन्तिम म्याद सकिएको थियो। उनलाई बयानका लागि शुक्रबारै जिल्ला अदालत सुनसरीमा उपस्थित गराइएको थियो।
शुक्रबारै थुनछेक बहस हुने भनिए पनि बयानमा लामो समय लागेकाले बहस आइतबारलाई सर्यो। अदालतभित्र १ नम्बर बेन्चमा न्यायाधीश राधाकृष्ण उप्रेतीसमक्ष उनले बयान दिने क्रम चलिरहेको थियो। सोही बेला चतरा आश्रमबाट बस रिजर्भ गरेर आएका उनका अनुयायीले रिहाईको माग गर्दै प्रदर्शन गरेका हुन्।
२ सयको संख्यामा उपस्थित अनुयायीले अदालतअगाडि गरेको नाराबाजी सबैको आकर्षणको केन्द्र बनेको थियो। आश्चर्यचकित वकिलहरू पनि दर्शकको रुपमा सामेल भएका थिए। अनुयायीले ‘जगद्गुरु रामानुजाचार्य स्वामी श्री रामकृष्णाचार्य महायोगी सिद्धबाबाको जय जय जय !’ लेखिएको व्यानर बोकेका थिए। कुनै पनि स्त्रीलाई नछुने प्रतिज्ञा गरेपछि सिद्धबाबाको उपाधि दिइने भएकाले पवित्र सिद्धबाबालाई फसाउन खोजिएको उनीहरू बताइरहेका थिए।
त्यहीबीचमा प्रहरीले आफ्नो उपस्थिति बाक्लो बनायो। तर हिंसा भड्किने भन्दै आन्दोलनमाथि हस्तक्षप गर्न भने सकेन। बरु केही पर गएर नारा लगाउन भन्यो। अदालतको गेटमा बसेर सुन्दा ‘बलात्कारीलाई फाँसी दे ! र हिन्दुराज्य जिन्दावाद, रामराम हरेहरे’ बीच चर्को प्रतिस्पर्धा भएको भान हुन्थ्यो। को चर्को र कसले धेरै कराउन सक्ने भन्ने प्रतिस्पर्धाले शुक्रबारकोसुनसरी जिल्ला अदालतको परिसर गुन्जियो।
बलात्कारको आरोप लागेका बाबा अस्पतालको सुविधासम्पन्न क्याबिनमा बस्दै आएका छन्। उनले केही समय अगाडि पीडित महिलालाई मुद्दा फिर्ता लिन गरेको फोनसमेत उनैको भन्ने प्रमाणित भएको छ। रुँदै मुद्दा फिर्ता लिन दबाब दिएको टेलिफोन सम्वाद पीडित महिलाले रेकर्ड गरेकी थिइन्। प्रहरीको विधि विज्ञान प्रयोगशालाले महिलाले रेकर्ड गरेको अडियो सिद्धबाबाकै भएको पुष्टि गरेको हो।
प्रहरीको अभियोग पत्रमा ७६.९ प्रतिशत स्वर र ९९ प्रतिशत स्पिकर मिलेको उल्लेख गरिएको छ। अनुयायीमाथि करणी गरेको आरोप लागेका गिरीले करिब एक घण्टा २० मिनेट फोन गरी मुद्दा फिर्ता लिन भनेका थिए।
सामान्यतया ५० प्रतिशतभन्दा माथि आवाज म्याच हुँदा प्रमाण मान्न सकिने प्रहरीको भनाइ छ। फोन सम्पर्कमा मुद्दा फिर्ता लिन आग्रह गर्दै उनले ‘मबाट गल्ति भयो, माफ गरिदेऊ’ भनेका थिए। अडियो सार्वजनिकपछि रेकर्ड आफ्नो नभएको दाबी गरेका गिरीले आफू लिङ्ग काट्न तयार रहेको बताएका थिए।
बयान सकिएपछि सञ्चारकर्मीसँग कुरा गर्दै अदालतका स्रेस्तेदार नरेन्द्रकेशरी पोखरेलले अदालतले प्रहरीसँगै अभियुक्तलाई पठाएको बताए। बाबालाई प्रहरी भ्यानमा अदालत परिसरमा निकाल्दै गर्दा झनै ठूलो स्वरमा ‘राम’ नाम गुन्जिएको थियो। उता अधिकारकर्मी महिलाहरूले भने बलात्कारी बाबा मुर्दाबाद भन्न छाडेनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
