काठमाडौ– गोकर्ण रिसोर्ट यती समूहलाई लिजमा दिने निर्णय विवादमा परेपछि नेपाल ट्रष्टले कानुनविपरीत काम नगरेको दाबी गरेको छ। शुक्रबार आयोजित पत्रकार सम्मेलनमा ट्रष्टका सचिव गजेन्द्र ठाकुरले विगतमा नजाऔ भन्दै कानुनविपरीत काम नगरेको दाबी गरेका हुन्।
कानुनदेखि अध्यक्षसम्म परिवर्तन गर्दै व्यापारीक घरानालाई कौडीको भाउमा ट्रष्टको जग्गा दिन गरिएको निर्णयबारे विगतमा झुटो बोल्दै आएका सचिव ठाकुरले पत्रकार सम्मेलनमा उक्त कुरा स्वीकार गरे। विगतमा ट्रष्टबाट कुनै पनि प्रस्ताव मन्त्रिपरिषदमा नपठाएको बताउँदै आएका उनले ट्रष्टबाटै सबै कुरा भएको स्वीकारे।
गोकर्ण रिसोर्ट दिँदा स्वतन्त्र मुल्यांकन गरेर तथा सरकारलाई नाफा हुने गरी दिएको दाबी उनले गरे। फिल्ड भिजिट गरेर दुवै पक्षको प्रस्तावका आधारमा रिसोर्ट लिजमा दिइएको उनले बताए। ‘उक्त जग्गाबाट लिजवापत् १ करोड ८ लाख २३ हजार डलर आउने भएपछि हामी अगाडि बढेका हौं,’ उनले भने।
‘सुरुमा मन्त्रिपरिषदमा केही पनि सिफारिस नभएको बताएको र सञ्चालक बोर्डको निर्णय लुकाएको’ विषयमा सोधिएको प्रश्नमा उनले नेपाल सरकारको निर्णय नआएकाले आफूले बताउन नसकेको भन्दै ट्रष्टको बचाउ गरे।
‘हामीकहाँ बुधबार चार बजे मन्त्रिपरिषद्को निर्णय प्राप्त भयो। निर्णय नभई हामी कर्मचारी बोल्न मिल्दैन,’ उनले भने, ‘अधिकारप्राप्त निकायबाट निर्णय नभएकाले हामी नबोलेको हो।’
मन्त्रिपरिषद्को निर्णय प्राप्त भएपछि पत्रकारहरुलाई बोलाएर सार्वजनिक गरेको उनले दाबी गरे। ‘विगतमा के हो नहेरौं, वर्तमानमा हेरौं, सञ्चालक समितिले बसेर सिफारिस गरेपछि यो निर्णय भएको हो । यसलाई अन्यथा नलिऔ । विगतको कुरा नगरौं। कानुन संशोधन प्रस्ताव हामीले गरेका छौ।’
कानुन संशोधनको कार्य ट्रष्टको अधिकारभित्र नभएको र कानुन मन्त्रालयले गर्ने भएकाले त्यसबारेमा जानकारी नहुने उनले बताए।
सञ्चालक समिति १३ सदस्यीय भएकोमा अहिले सात किन कायम गरिएको भन्ने प्रश्नमा उनले त्यो प्रधानमन्त्री कार्यालयले गर्ने बताए।
गोकर्ण रिसोर्ट सुटुक्क भने नदिएको दाबी गर्दै उनले भने, ‘सूचना टाँस गराएरै काम गरेका हौं।’ निजी क्षेत्रको बाहुल्य हुने गरि ट्रष्टी किन बनाइयो भन्ने प्रश्नमा उनले आफूहरु कर्मचारी भएको र कानुनअनुसार गर्ने बताए।
उनले बोर्ड बैठकले ६ महिनामा ६ वटा निर्णय गरेको बताए। काठमाडौ प्लाजाको लिज अवधि असार ३ गते सकिने भएकाले ६० लाख न्युनतम दरमा लिजमा दिइने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
