सुदूरपश्चिममा प्रसिद्ध भुओ पर्व सुरु भएको छ। अघिल्लो पुस्ताले दशैं भन्दा भव्य रुपमा मनाउने यो चाड अहिले भने लोपोन्मुख जस्तै छ।
कति ठाउँमा त लोप नै भइसक्यो । आफूलाई असाध्यै मन पर्ने पर्व मन पर्व मनाउन छाडिएको पीरले पिरोलिएर एकजना पूर्व खेलाडि परदेशबाट नेपाल आइपुगेका छन्। उनी हुन्, पूर्व राष्ट्रिय कबड्डी खेलाडि र देउडा गीतकार लक्ष्मण अधिकारी।
सुदूरपश्चिमको महेन्द्रनगर हल्दुखालमा जन्मेहुर्केका हुन्। उनी सानो छँदा भुओ पर्व भव्य रुपमा मनाइन्थ्यो त्यहाँ । तर, पछिल्ला ३५ वर्षदेखि भुओ हुनै छाड्यो । पुरानो पुस्ता निष्क्रिय हुँदै गयो, नयाँ पुस्ताले ग्रहण गरेन।
उनी अझै सम्झिन्छन्, ‘त्यो समय देशपरदेश भएकाहरु दशैं आउँदैनथे । यो पर्व छुटाउँदैनथे । राम्रोनौलो लगाउने र मीठोमसिनो खाने पनि हुन्थ्यो।’
उनी हुर्किदै गए । पर्व मनाउन छाड्दै गए गाउँलेहरु । जीवनको भागदौडमा उनी कहिले बोर्डिङ चलाउन व्यस्त भए, कहिले देशका लागि कबड्डी खेल्दै ठिक्क।
ज्यानमा तरान हुन्जेल खेलाडी भए, खेलजीवन सकियो । त्यसपछि पनि जीवन हुन्छ । परिवारको दायित्व हुन्छ । राष्ट्रलाई विभिन्न अन्तर्राष्ट्रिय प्रतियोगीता जिताएर योगदान गरेपछि अफ्नै जीवनका लागि भने दुबइ भासिनुप¥यो । त्यो पनि खेलजीवनको रिटायर्ड समयमा ।
परदेश रहँदा सवथोक भुले । जीवनको सवैभन्दा प्रिय कबड्डी नै भुले । तर, भुओ भुलेनन् । उनलाई लाग्थ्यो, ‘एकदिन म मेरो गाउँमा भुओको रौनक फर्काउँछु।’
घरपरिवार धान्न परदेशमा हाडछाला घोटिरहेका उनले यसपालि भने भुओ मनाएरै छाड्ने अठोट लिए। दशैंतिहारमा पाएको बिदा स्वीकारेनन् । उतै काममा घोटिए । भुओमा भने फर्केर आए । नयाँ पुस्तालाई साथमा लिएर, पुरानो पुस्ताबाट सिकेर महेन्द्रनगरमा भव्य भुओ मनाउने तयारीमा उनी जुटेका छन्।
यसका लागि केही इच्छुकहरु जम्मा गरेर केही दिनदेखि ढालतरबार चलाउने कला सिकाइरहेका छन्। पुस १२ गतदखि उक्त कला कञ्चनपुरको भीमदत्तनगरमा देखाइदैछ। पुस १६ गते भव्य समापन समारोह गर्ने तयारी रहेको उनी बताउँछन्।
सानोमा बुवाको दौराको फेर समाएर देउडा खेलेको, भारी खेल भुओमा गाइने गीत) खेलेको सम्झनालाई यसपल्ट पुनरावृत्ति दिन खोजिरहेका छन्।
संस्कृति प्रेम त उनीसँग सानैदेखि थियो । विहेलगायतका अवसरमा हिन्दी गीतमा नाँच्थे उनका गाउँमा पनि । तर, उनले एउटा प्रचलन ल्याइदिए– देउडा खेल्नैपर्ने । उनी आफैं अघि सर्थे । आफैं देउडा भट्याउँथे । उनलाई लाग्थ्यो, ‘हाम्रो संस्कृति नै रमाउन काफी छ।’
उनले सकेसम्म आफ्नै भाषामा कुराकानी गर्न खोजे । अहिले पनि त्यो कायम छ ।
उनी देउडा खेल्नुका साथै गीत समेत लेख्छन् । केही गीत बजारमा आएका छन् । ‘खप्तडी रोल’ र ‘दुबइको लाहुर्या’ उनीद्वारा लिखित चर्चित गीत हुन्। उनले चाँडै देउडा गीतहरुको संग्रह पुस्तक बजारमा ल्याउने तयारी समेत गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
