गत महिना इन्डियन प्रिमियर लिग (आइपिएल) टिम दिल्ली डेयरडेभिल्समा आबद्ध हुँदै नेपालका युवा लेग स्पिनर सन्दीप लामिछानेले इतिहास बनाएका थिए। त्यसबीच नामिबिया र जिम्बावेमा राष्ट्रिय टिमबाट खेलेका सन्दीप अहिले नेपाल फर्किएका छन्। स्वदेश फर्किएको दोस्रो दिन सन्दीपलाई जर्सी हस्तान्तरण गर्न दिल्ली डेयरभिल्सका सिइओ हेमन्त दुवा काठमाडौं आए। सन्दीप मार्च २६ मा दिल्ली उड्नेछन्।
दुवासँग नेपाल लाइभका सीताराम कोइरालाले लिएको विशेष अन्तर्वार्ता :
नेपालमै आएर सन्दीपलाई जर्सी हस्तान्तरण गर्नुको कारण के हो?
सन्दीप नेपाली क्रिकेट जगतका उज्याला नक्षत्र हुन्। उनी अहिले नेपाली क्रिकेटको केन्द्रविन्दुमा छन्। त्यसैले हामी प्रधानमन्त्रीको हातबाट जर्सी सार्वजनिक गर्न चाहन्थ्यौं। यद्यपि खेलकुद परिषदका सदस्य-सचिवबाट सार्वजनिक गर्न सक्यौं। नेपालमै आएर जर्सी सार्वजनिक गर्नुको कारण युवा खेलाडीलाई प्रोत्साहन र आसा जगाउनु हो। यदि राम्रो खेल्यौ भने आफ्नो सपना पूरा गर्न सकिन्छ भन्ने सन्देश दिनु हो।
दिल्लीले सन्दीपले खेलेका पछिल्ला खेलहरु पछ्याइरहेको छ। सन्दीपले लिएका विकेटमा खुसी मनाइरहेको छ। के सन्दीपको पछिल्लो प्रदर्शनबाट दिल्ली प्रभावित छ?
सन्दीपले एकदमै राम्रो क्रिकेट खेलिरहेका छन्। उनी एकदमै राम्रा बलर हुन्। एसोसिएट स्तरमा क्रिकेट खेल्नु र आइपिएल स्तरमा खेल्नु भने बिल्कुलै फरक कुरा हो। आइपिएलमा संसारका उत्कृष्टमध्येका पनि खारिएका खेलाडी भिड्छन्।
नेपालमा सन्दीपले आइपिएलमा खेल्न पाउँछन् कि पाउँदैनन्न भन्ने ठूलो चासो रहेको पाएको छु। मलाई पनि सन्दीप खेलोस् भन्ने इच्छा छ। तर, सन्दीपले खेल्ने-नखेल्नेबारे प्रशिक्षक र कप्तानको निर्णयमा भर पर्छ।
सन्दीपले क्रमिक रुपमा लक्ष्य पछ्याउने हाम्रो विश्वास छ। उनले पहिलो खेल खेल्न पनि सक्छन्, अथवा दोस्रो, तेस्रो, चौथो जुनसुकै म्याचमा उनी सहभागी हुन सक्छन्। यो निर्णय प्रशिक्षकले गर्नेछन्। उनले ड्रेसिङ रुमबाट पनि धेरै कुरा सिक्न सक्छन्, त्यहाँको क्रिकेट वातावरणमा धेरै ज्ञान हासिल गर्न सक्छन्। त्यहाँ गएर उनले अमित मिश्रा जस्ता स्पिनरसँग प्रतिस्पर्धा गर्नुपर्नेछ। मिश्रा आइपिएलकै उत्कृष्ट लेग स्पिनर मात्र होइनन्, धेरै विकेट लिने बलरमध्येमा पर्छन्। सन्दीपले मिश्रा जस्तै उत्कृष्ट खेलाडीसँग प्रतिस्पर्धा गर्नुपर्नेछ। यो उनका लागि ठूलो मौका पनि हो।
सन्दीपका लागि दिल्ली डेयरडेभिल्सका आगामी दिन जीवनको उत्कृष्ट क्षण हुनेछ। राम्रो खेलेको खण्डमा सन्दीप लिजेन्ड बन्ने पक्का छ।
दिल्ली डेयरडेभिल्सको जर्सीमा सन्दीप लामिछाने
आइपिएलको अक्सनमा धेरै खेलाडी दर्ता थिए। सन्दीपलाई नै लिनुको कारण के हो?
हामीले सन्दीपको क्षमता छुट्टै किसिमले बुझेका थियौं। उनी क्षमतावान् क्रिकेटर हुन्। हामीले क्षमतालाई कदर गरेका हौं। कहिलेकाहीँ आइपिएलमा केही सरप्राइज हुन्छ। त्यो सरप्राइज उनले अक्सनमा छनोट भएर दिएका छन्। सन्दीपलाई आइपिएलका अधिकांश खेलाडीले देखेका समेत छैनन्। त्यसैले उनले आइपिएलमा अर्को सरप्राइज दिन सक्छन्। उनले नेट र अभ्यास खेलमा राम्रो बलिङ गरेमा पहिलो रोजाइमा मौका पाउन सक्छन्। जीवन सुन्दर छ, जे पनि हुन सक्छ।
सन्दीपलाई आइपिएलमा लिनुअघि देखि नै दिल्लीले उनका खेल पछ्याएको कुरा सार्वजनिक भएका थियो। खासमा तपाईंहरुले कहिलेदेखि उनलाई पछ्याउनुभएको थियो?
केही समयदेखि सन्दीपलाई पछ्याइरहेका थियौं। उनले खेलेका भिडियोहरु मात्र देखेका थियौं, प्रत्यक्ष हेर्ने मौका पाएका थिएनौं। हामी उनलाई प्रत्यक्ष रुपमा भेट्न चाहन्थ्यौं। हामीले उनलाई अक्सनको केही दिनअघि दिल्ली बोलाएका थियौं। दुर्भाग्यवश हामीले बोलाएको दिन दिल्लीमा पानी पर्यो। हामीसँग इन्डोर हल नभएकाले उनलाई बलिङ गराउने ठाउँ खोजी गर्यौं। एउटा निजी इन्डोर नेटमा उनलाई बलिङ गर्न लगायौं। उनले आधा घन्टा बलिङ गरे। त्यो हामीले भिडियो खिच्यौं। उनले एकदमै राम्रो बलिङ गरेका थिए, हामी निकै प्रभावित भयौं। भिडियो हामीले प्रशिक्षक रिकी पोन्टिङ र गौतम गाम्भीरलाई देखायौं। उनीहरुले मन पराएपछि हामीले अक्सनमा छनोट गरेका हौं।
सन्दीपलाई आबद्ध गर्दा दिल्लीलाई कस्तो फाइदा भएको छ?
सन्दीप छनोट हुनु हाम्रो लागि पनि ठूलो कुरा हो। हाम्रा समर्थकहरु ह्वात्तै बढेका छन्। उत्साहित बनेका छन्। यसले नेपाली क्रिकेटलाई पनि फाइदा पुगेको छ। नेपाली क्रिकेटलाई अझै माथि पुर्याउन सिँढी बनेको छ।
तपाईंलाई नेपाली क्रिकेट र क्रिकेटरबारे के थाहा छ?
नेपाली क्रिकेटर क्षमतावान् भएको पाएको छु। धेरैभन्दा धेरै प्रतियोगिता खेल्न पाएमा नेपाली क्रिकेटरले निकै राम्रो गर्न सक्छन्। नेपालले पछिल्लो समय एकदिवसीय मान्यता पाएकोमा बधाई दिन चाहन्छु। नेपालको क्रिकेट संघ निलम्बनमा भएको अवस्थामा पनि खेलाडीले आफ्नो क्षमता प्रमाणित गरेका छन्। खेलाडीलाई व्यवस्थापन गर्ने निकाय नहुँदा पनि राम्रो खेलेका छन्। क्रिकेट संघ भएमा नेपालले अझै राम्रो गर्न सक्छ। अर्कोतर्फ, नेपाली क्रिकेटरलाई एक्पोजर र सहयोग चाहिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
