‘कमेडी प्रेस मिट'मा आइजीको प्रशंसा, एनसिबीलाई धन्यवाद!

सुरक्षा/अपराध

नारायण अधिकारी बुधबार, पुस ९, २०७६ १९:००

काठमाडौं-
पत्रकार- पक्राउ परेका १ सय २२ चिनियाँलाई किन अभद्र व्यवहार मुद्दा?

डिआइजी निरज शाही- पक्राउका बेला महिला प्रहरीमाथि हातपात गरे।

शाहीको उत्तरपछि प्रहरीको केन्द्रीय अनुसन्धान ब्युरो (सिआइबी)को पत्रकार सम्मलेन हलमा हाँसो गुन्जिन्छ।

पत्रकार- यस्तो योजनाबद्ध अपरेसन तर आकस्मिक र सबैभन्दा झिनो मुद्दा किन?

डिआइजी शाही- प्रचलित कानून बमोजिम हुन्छ।

पत्रकार- पक्राउ परेकाहरु चीनको कुन-कुन प्रान्तका रहेछन्, नाम के रहेछ?

डिआइजी शाही- अनुसन्धान गर्दैछौं।

पत्रकार- कहिले आएका रहेछन्?

डिआइजी शाही- अनुसन्धान गर्दैछौं।

पत्रकार- अनि यिनीहरूले अपराध चाहिँ के गरेका रहेछन्?

डिआइजी शाही- अनुसन्धान गर्दैछौं।

पत्रकार- यी चिनियाँ राख्ने घरबेटी किन अनुसन्धानको दायरामा आएनन्?

डिआइजी शाही- अनुसन्धान गर्दैछौं ।

पत्रकार- काठमाडौंबाहेक अन्य ठाउँमा पनि चिनियाँ टोली छन् भन्ने छ नि?

डिआइजी शाही- अनुसन्धान गर्दैछौं। प्रचलित कानून बमोजिक कारबाही हुन्छ।

पत्रकार- अनि पक्राउ गर्नुपर्ने चिनियाँ अरु पनि छन् कि यति मात्र हुन्?

डिआइजी शाही- छन् भए खबर पाऊँ।

शाहीको यो उत्तरपछि त झन् उपस्थित पत्रकार मन थाम्नै सकेनन्। गलल्ल हाँसे। हल गुन्जियो। 'यो त कमेडी सो जस्तो पत्रकार सम्मलेन भयो,' आपसमा पत्रकारबीच कुराकानी भएको सुनियो।

पत्रकार- तपाईंहरुको अपरेसनबाट चिनियाँ टोली सन्तुष्ट छ त?

डिआइजी शाही- अँ, एनसिबी (इन्टरपोलको देशीय कार्यालय नेसनल सेन्ट्रल ब्युरो) लाई धन्यवाद नै आइसक्यो।

डिआइजी शाहीको उत्तर सुनेर पत्रकार फेरि मुसुमसु हाँसे। प्रश्न सोध्ने पत्रकारलाई भने उत्तर चित्त बुझेन वा मजाक गरेजस्तो भान भयो। लगत्तै प्रश्न सोध्ने ती पत्रकार बाहिर निस्किए। अन्य पत्रकार र प्रहरी अधिकारीबीचको संवाद भने जारी रह्यो।

पत्रकार- तपाईंहरूले कुटनीतिक माध्यमबाट यी चिनियाँ....

डिआइजी शाही- यहाँ कुनै कुटनीतिक माध्यम होइन, छैन। इन्टरपोलमार्फत् हो यो। (पत्रकारको प्रश्न नै पूरा गर्न नदिई शाहीले उत्तर फर्काइदिए)

यी संवाद सुन्दा कुनै कमेडी शो हेरेजस्तो लागे पनि यथार्थ भने त्यो भन्दा फरक छ। १ सय २२ जना चिनियाँ नागरिक पक्राउबारे जानकारी दिन सिआइबीले आयोजना गरेको पत्रकार सम्मेलनमा भएको वास्तविकता हो यो।

प्रहरीले गरेको पत्रकार सम्मलेनमा धेरै प्रश्न सोधिएको मध्येको पत्रकार सम्मलेनमध्ये यो पनि एक हो।

तर पत्रकारले सोधेका अधिकांश प्रश्नको उत्तरमा प्रहरीको एउटै जवाफ थियो, 'हामी अनुसन्धान गर्दैछौं। प्रचलित कानून बमोजिम कारबाही हुन्छ।'

प्रहरीले आयोजना गरेको पत्रकार सम्मेलनमा पत्रकार र प्रहरीबीचको सवालजवाफ मध्येको केही अंश मात्र हो माथिको संवाद। पत्रकारले सोधेका कुनै पनि प्रश्नको अपेक्षित उत्तर पाएएनन्।

यसअघि १ सय २२ चिनियाँ नागरिक पक्राउबारे प्रहरीले संक्षिप्त जानकारी गराएको थियो। जसको मुख्य उद्देश्य थियो, यो अपरेसन आइजी सर्वेन्द्र खनालको सूचना, योजना र निर्देशनमा भएको हो।

इन्टरपोलको ८८औं महासभा सान्टियागो चिलीमा भएको बैठकमा हेड अफ इन्टरपोल एनसिबी बेइजिङ, चीन र एनसिबी काठमाडौंका प्रमुखहरुबीच ट्रान्सबोर्डर साइबर अपराधजस्ता अपराध नियन्त्रणका लागि छलफल भएको थियो। सोही बेला एनसिबी बेइजिङ, चीन र एनसिबी काठमाडौंबीच जानकारी आदानप्रदान भएकाले १ सय २२ चिनियाँ पक्राउ गर्न सफल भएको दाबी गरिएको छ।

अपरेशन कसको निर्देशनमा भयो? को खटियो? कसले पक्राउ गर्‍यो? यसअघिका पत्रकार सम्मेलनमा यस्ता विषय गौण हुन्थे। यी प्रश्न पत्रकारले सोध्दा प्रहरीले जवाफ फर्काउथे- जसले गरे पनि नेपाल प्रहरीले गर्‍यो। किन चाहियो अपरेसन अधिकारीको नाम?

तर बुधबारको पत्रकार सम्मलेनमा विगतको त्यो परम्परा तोडियो। 'तपाईंलाई जानकारी छैन भने थाहा पाउनुहोस्, यो अपरेसन आइजीको प्रत्यक्ष निर्देशनमा भएको हो है,' डिआइजी शाहीले पावरप्वाइन्ट प्रजेन्टेसनमार्फत् यही जानकारी गराएका थिए पत्रकार सम्मेलनमा।

यति मात्रै होइन, प्रहरी प्रधान कार्यालयले पठाउने समाचार बुलेटिनमा समेत आइजीको योजनामा अपरेसन भएको भनेर समाचार लेखेर पठाइयो। जसले काम गरे पनि 'जस' आइजीलाई नै जाने हो।

अझ रोचक त पत्रकार सम्मेलनमा सिआइबी प्रमुख, इन्टरपोल प्रमुख, काठमाडौं प्रहरी प्रमुख, अपराध महाशाखाका प्रमुखदेखि मेट्रो प्रहरीका प्रतिनिधिसमेत उपस्थित थिए।

यति ठूलो मात्रामा प्रहरी मातहतका कार्यालयका प्रहरी अधिकारीहरु उपस्थित भएपछि चिनियाँ पक्राउबारेका केही नयाँ कुरा सार्वजनिक हुनेमा पत्रकार आशावादी थिए।

पत्रकारको उपस्थिति पनि ठूलै थियो। तर हाता लाग्यो शून्य। नयाँ सूचना/जानकारी केही पनि आएन। सायद पत्रकार सम्मेलनमार्फत् सूचना दिने प्रहरी अधिकारीहरु मिडिया अपडेट थिएनन् होला। मिडियामै आएका सूचनाहरु उनीहरुले भट्याए।

पक्राउ परेका १ सय २२ मध्ये ६७ वटा मात्रै राहादानी फेला परेको जानकारी डिआइजी शाहीले गराए। केही पत्रकारलाई यो नयाँ सूचना लागेको लाग्यो। तर अर्का एक पत्रकारले समाचारै देखाइदिए यो त लेखिसकेको छ।

चिज नयाँ केही आएन। उही पूरानै। मनमैजु, बुढानीलकण्ठ, महाराजगञ्जका ९ घरमा छापा। ८ महिलासहित १ सय २२ चिनियाँ नागरिक पक्राउ। बरामद ल्यापटप, मोबाइलहरुको विवरण पनि नयाँ थिएन।

७ सय ४७ थान मोबाइल, ल्यापटप ३ सय ३१ थान, सिपियू ९८ थान, मोनिटर ९९ थान, पेनड्राइभ २२ थान, सिमकार्ड ३ सय २७ थान बरामद भएको जानकारी दोहोर्‍याइयो।

पत्रकार सम्मेलन त सकियो। सोधिएका प्रश्नको जवाफ केही पनि आएन। तर लेख्ने चाहिँ के? पत्रकार यही दोसाँधमा परे? नयाँ त केही आएन लेख्ने चाहिँ के? धरैजसो पत्रकारको यो साझा प्रश्न बन्यो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।