सरकारको दुई तिहाई दम्भ सकिएको छ : उपेन्द्र यादव

राजनीति

नेपाल लाइभ बुधबार, पुस ९, २०७६ १४:४९

काठमाडौ- समाजवादी पार्टीले सरकारमा जाँदा भएको दुई बुँदे सहमतिबाट प्रधानमन्त्री केपी शर्मा ओली र नेकपा पछि हटेको आरोप लगाएको छ।

उक्त पार्टीले सरकारलाई दिएको समर्थन पनि फिर्ता लिएको घोषणा गरेको छ। बुधबार आयोजित पत्रकार सम्मेलनमा अध्यक्ष उपेन्द्र यादवले संविधान हतारमा घोषणा गरिएको र त्यसमा धेरै त्रुटी रहेको सबैले स्वीकारेकाे बताए। ‘आधा गिलास पानीजस्तै संविधान जारी भएको थियो,’ उनले भने, ‘दमनका आधारमा बनेको संविधान सच्चिने आसका साथ सरकारमा गएका थियौं, त्यो पुरा नभएपछि बाहिरिनु ठिक लाग्यो।’

उनले सहकार्यको संस्कृति हटाउँदै एकलौटी निर्णय नेकपाबाट हुँदै आएकाे र आफूहरुको मुख्य माग संविधान संशोधन रहेको उल्लेख गरे। संविधान संशोधन हुनसक्ने सम्झेर कानुन मन्त्रालयको जिम्मेवारीलाई आफूले अवसरको रुपमा लिएको तर आफूले काम गर्न खोज्दा प्रधानमन्त्रीले ठाडै उल्लंघन र अस्वीकार गर्नु गलत भएको उनले दाबी गरे। संविधान संशोधनको आवश्यकता नै छैन भन्ने प्रधानमन्त्रीको भनाइ गलत भएको उनको दाबी छ। अध्यक्ष यादवले संविधान सबैको बनाउन आफ्नो पार्टीले प्रतिपक्षमा रहेर प्रयास गर्ने पनि बताए।

‘लिखित सम्झौता गरेपछि विश्वास गरिएको थियो, तर धोका दिनेको दोष हो विश्वास गर्नेको होइन,’ उनले भने, ‘अब सरकारको दुई तिहाईको दम्भ समाप्त भएको छ, सरकार अब कम्युनिष्टको मात्र छ।’

यादवले संविधान संशोधनको विषय संसदमा र मन्त्रिपरिषद्मा पटक–पटक स्मरण गराएको पनि बताए। पुस ७ गते मन्त्रिपरिषद्मा विज्ञ सुझाव समिति गठन गर्न उपप्रधानमन्त्रीको हैसियतमा प्रस्ताव प्रस्तुत गरे पनि प्रधानमन्त्री यसबाट पछाडी हटेपछि सरकारमा बस्नुको औचित्य नभएको यादवको दाबी छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

अवैध रुपमा लाओस भई थाइल्यान्ड छिरेका नेपालीलाई फर्काइयो नेपाल

एक महिनादेखि रेसुङ्गा विमानस्थलमा हवाई सेवा बन्द

ट्रम्पको शपथग्रहणकै दिनबाट गैरकानूनी आप्रवासी पक्राउ र डिपोर्ट हुँदै, सिकागोबाट सुरु हुने