राजविराज- प्रमुख प्रशासकीय अधिकृत लामो समयदेखि कार्यालयमा अनुपस्थित रहँदा सप्तरीको राजविराज नगरपालिकाका विकासका काम पूर्ण रुपमा प्रभावित भएका छन्। प्रमुख प्रशासकीय अधिकृत श्यामकुमार सिंह ६ महिनादेखि नै अनुपस्थित छन्।
सिंह गत साउनदेखि नै कार्यालयमा नआएको मेयर शम्भुप्रसाद यादवले बताए। वैशाखमा कार्यालयमा हाजिर भएका सिंहले सुरुदेखि नै कार्यालयमा बस्न रुचि नदेखाएको र साउनदेखि आउनै छाडेको उनको भनाइ छ। ‘हाजिर भएपछि असारसम्म महिनाको १०÷१२ दिन कार्यालय बस्थे,’ उनले भने, ‘साउनदेखि त कार्यालयमा आउनै छाडे।’
सिंह काठमाडौं नै बस्न थालेपछि कर्मचारीको तलब भत्ताका लागि पनि चेक बोकेर काठमाडौं कुद्नु परेको उनले दुखेसो गरे। ‘महिना मरेपछि कर्मचारीहरु चेक बोकेर काठमाडौं पुग्छन्’, उनले थपे, ‘एकतिर सबै काम रोकिएका छन्, अर्कोतर्फ हरेक महिना काठमाडौं धाउनु पर्दा अनावश्यक बोझ पनि थपिएको छ।’
कार्यालयमा अधिकृत नवस्दा कार्यपालिकाको वैठक, नक्सापास, विकास निर्माण र आपूर्तिको टेण्डरलगायतका सम्पूर्ण क्रियाकलाप ठप्प भएको मेयर यादवले जानकारी दिए । ‘नक्सा पासका लागि दिनहुँ सेवाग्राहीको भीड लाग्छ। काम त हुँदैन, उनीहरुलाई सम्झाएर पठाउनकै लागि कर्मचारी खटाउनु पर्ने अवस्था छ,’ उनले भने।
सेवाग्राही बढीजसो प्रमुख कार्यकारीसित सम्वन्धित काम लिएर कार्यालय आउने गरेको तर काम हुन नसकेपछि सेवाग्राहीलाई सम्झाएर पठाउन मुस्किल परेको यादवको भनाइ छ।
मन्त्रालयले पनि सुनेन
लामो समयदेखि काम प्रभावित भएपछि संघीय मामिला तथा सामान्य प्रशासन मन्त्रालय र मन्त्रीलाई पटक–पटक आग्रह गर्दासमेत प्रमुख प्रशासकीय अधिकृतको व्यवस्था गर्न नसकेको यादवले बताए ।
‘कार्यालयमा समस्या आएपछि मैले पटक–पटक सम्बन्धित मन्त्री र सचिव भेटेर आग्रह गरे’ उनले थपे, ‘सबैले हुन्छचाहिँ भन्छन्, तर आश्वासनबाहेक अर्को व्यवस्था भएन।’
काठमाडौं पुगेर अनुरोध गर्नेदेखि टेलिफोनमार्फत् सम्झाए पनि प्रमुख प्रशासकीय अधिकृत पठाउने विषयमा मन्त्रालयले चासो नदिएको उनको गुनासो छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
