सुर्खेतमा यस वर्षको एसइईमा दुई सय ८० विद्यार्थी वञ्चित हुने

ब्लग

नेपाल लाइभ सोमबार, चैत ५, २०७४ १४:५७

सुर्खेत– सुर्खेतका साढे दुई सयभन्दा बढी विद्यार्थीले यस पटकको माध्यमिक शिक्षा परीक्षा (एसइई) मा सहभागी हुन नपाउने भएका छन्। जिल्ला शिक्षा कार्यालय सुर्खेतका अनुसार, जिल्लाका दुई सय ८० जना विद्यार्थी परीक्षा दिनबाट वञ्चित हुने भएका हुन्।

शैक्षिक सत्रको सुरुमा भर्ना भएका सात हजार चार सय ५४ जनामध्ये सात हजार एक सय ७४ जनाले मात्रै परीक्षा दिन पाउने भएका छन्। केही विद्यार्थीको हाजिरी नपुगेको र केहीले राजस्व नबुझाएका कारण परीक्षामा सहभागी हुन नपाउने शिक्षा कार्यालयले जनाएको छ।

कार्यालयका अनुसार ७५ प्रतिशत हाजिर नपुगेका र परीक्षामा सहभागी हुनका लागि तिर्नुपर्ने शुल्क नबुझाएका विद्यार्थी परीक्षामा सहभागी हुन नपाउने भएका हुन्। यस्ता विद्यार्थीको संख्या जिल्लामा दुई सय ८० रहेको जिल्ला शिक्षा कार्यालय सुर्खेतले जनाएको छ।

शिक्षा कार्यालयका अनुसार सुर्खेतमा एसइई परीक्षाको तयारी पूरा भएको छ। बिहीबारदेखि सुरु हुने परीक्षाका लागि जिल्लाका सबै केन्द्रमा आवश्यक प्रश्नपत्रका साथै स्वास्थ्य सामग्री पठाइएको छ। सोमबार केन्द्राध्यक्ष समेत तोकिएको छ।

परीक्षालाई व्यवस्थित बनाउन ३७ बुँदे आचारसंहिता लागू गरिएको छ। आचारसंहितामा विद्यालयबाट सम्मिलित परीक्षार्थीले अनिवार्य रुपमा नियमित पोशाक लगाउनुपर्ने, प्रवेशपत्र अनिवार्य बोक्नुपर्ने, परीक्षामा होहल्ला, कुराकानी र छलफल गर्न नपाइने लगायत रहेका छन्।

परीक्षालाई मर्यादित र व्यवस्थित बनाउन एउटा बेञ्चमा दुई जना र हलमा एउटै विद्यालयका परीक्षार्थी मात्र नरहने गरी बसाइ व्यवस्थापन गरिने जिल्ला शिक्षा अधिकारी जितबहादुर शाहले बताए।

जिशिअ शाहले परीक्षामा स्वास्थ्य उपचार तथा महिलामैत्री बनाइएको बताए। सबै परीक्षा केन्द्रमा अनिवार्यरुपमा सेनेटरी प्याड, आवश्यक औषधि व्यवस्थापनका लागि जिल्ला जनस्वास्थ्य कार्यालय, स्थानीय स्वास्थ्य संस्थाहरुसँग सहकार्य भइरहेको उनले जानकारी दिए।

शिक्षा कार्यालयको तथ्यांक अनुसार जिल्लामा आठ सय १८ जना आंशिक परीक्षार्थी छन्। चैत आठ गतेदेखि सुरु हुने परीक्षाका लागि जिल्लाभरि ३० वटा परीक्षा केन्द्र तोकिएको छ।

परीक्षालाई मर्यादित रुपमा सम्पन्न गर्न विद्यालय व्यवस्थापन समिति, अभिभावक, स्थानीय बुद्धिजीवी, समाजसेवी, प्रहरी, प्रशासनलाई आवश्यक सहयोग गर्न जिल्ला शिक्षा कार्यालयले आग्रह गरेको छ। परीक्षाका मर्यादा उल्लंघन भएमा शिक्षा ऐन २०२८ को दफा १७(१क) बमोजिम ६ महिनासम्म कैद वा एक लाख रपैयाँसम्म जरिवाना वा दुवै सजाय हुनसक्ने व्यवस्था छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

काठमाडौँबाट हङकङ उडेका २८ यात्रुलाई ‘फुड पोइजन’, छानबिन समिति गठन

कुलमानले बुझाए स्पष्टीकरण, मन्त्रालयले लगाएका आरोपको खण्डन

लसएन्जलस: मृतकको संख्या १६ पुग्यो, आगो अझै अनियन्त्रित