काठमाडौ- नेकपाका अध्यक्ष पुष्पकमल दाहाल ‘प्रचण्ड’ ले नेपालको सीमा मिचिएको बारेमा भारतले अहिलेसम्म कुनै जवाफ नदिएको बताएका छन्।
संसदीय दलको बैठकमा बोल्दै अध्यक्ष दाहालले सरकारले भारतलाई कूटनीतिक नोट पठाएको तर भारतका तर्फबाट कुनै जवाफ नआएकाले सरकार र पार्टीको आलोचना गर्न आवश्यक नभएको बताए। प्रचण्डले पार्टीको स्थायी समिति बैठक बसिरहेको र बैठकले भारतसँग कालापानी र लिम्पियाधुरा क्षेत्रमा भएको विवाद र अमेरिकाको मिलिनियम च्यालेन्ज कर्पोरेशन९एमसिसी०बारे धारणा बनाउने पनि बताए।
कालापानी नेपालको भाग हो भन्ने कुरामा विवाद गर्न आवश्यक नभएको तर यसलाई दीर्घकालीन समाधान खोज्ने पक्षमा लाग्नुपर्ने उनले बताए । ‘एमसीसी र इन्डो प्यासिफिक रणनीति एउटै हो कि होइन भन्ने बुझ्दै छौं। यदि एमसीसी इन्डो प्यासेफिकभित्र पर्दैन भने हामी स्वीकार्छौं,’ दाहालले भने।
‘सरकारको राम्रा काम प्रचार गर्नुस्’
अध्यक्ष दाहालले केपी शर्मा ओली नेतृत्वको सरकारले गरेका राम्रा कामबारे जनतालाई भन्न निर्देशन पनि दिएका छन् । बैठकलाई सम्बोधनमा क्रममा उनले सरकार र पार्टीबीच समन्वय नहुँदा सरकारले गरेका राम्रा कामबारे जनताले थाहा नपाएको भन्दै यस्तो निर्देशन दिएका हुन्। ‘संसदका काम प्रभावकारी रूपमा गर्नुपर्छ। पहिला हाम्रा कमिटीहरू पनि नभएकाले सरकारले गरेका राम्रा कामबारे पनि हामीले जनतालाई प्रभावकारी ढंगले भन्न सकेनौं’ उनले भने ‘अब तपाईंहरू सरकारले गरेका राम्रा कामबारे जनतालाई सूचना दिनुस्।’
उनले मंसिर १४ गते भएको उपनिर्वाचनको मतपरिणाम सकारात्मक भए पनि गम्भीर हुनु पर्ने खालको भएको बताए।
सभामुख र उपसभामुख दुवैको निर्वाचन हुने
संसदीय दलका उप नेता सुवास नेम्वाङले संघीय संसदको सभामुख र उपसभामुख दुवैको निर्वाचन हुने बताएका छन्। संसदीय दलको बैठकमा बोल्दै उनले संविधानमा फरक दलको हुनुपर्ने व्यवस्था भएकाले दुवै पदमा निर्वाचनमा जानु पर्ने बताएका हुन्। संसदीय दलको बैठकमा केही सांसदहरुले उपसभामुख अहिले कुनै दलको नरहेकाले सभामुखको मात्र निर्वाचनमा जान सकिने तर्क गरेका थिए। उक्त तर्कलाई अस्वीकार गर्र्र्दै उनले संविधानको व्यवस्था अनदेखा गर्न नमिल्ने बताएका हुन् । बैठकमा सांसदहरू भीम रावल र जनार्दन शर्माले दोहोरो छलफल हुनुपर्ने माग गरेका थिए। तर उनीहरूको मागबमोजिम सांसदहरूलाई छलफल गर्न भने दिइएन। बैठकको अध्यक्षता गरेका संसदीय दलका उपनेता सुवास नेम्वाङले नयाँ सभामुख र उपसभामुखको चयन प्रक्रिया पुस ११ गतेदेखि सुरू हुने जानकारी दिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
