काठमाडौं– आजदेखि संघीय संसदको हिउँदे अधिवेशन सुरु हुँदैछ।
यसअन्तर्गतको प्रतिनिधिसभामा सभामुख चयन यो अधिवेशनको प्रारम्भिक कार्यसूचीमा परेको छ।
सभामुख कृष्णबहादुर महरालाई बलात्कार आरोप लागेपछि असोज १४ गतेदेखि उक्त पद रिक्त छ।
संसद सचिवालयका अनुसार यो अधिवेशन कानुन निर्माणमा केन्द्रीत हुनेछ। संघीय संसद सचिवालयका प्रवक्ता डा. रोजनाथ पाण्डेका अनुसार प्रतिनिधी सभामा मात्रै २७ विधेयक छन्। तीमध्ये ८ सांसदहरुका हातमा, १५ समितिमा र दुईवटा भर्खरै दर्ता भएका छन्। राष्ट्रियसभामा ६ विधेयक छन्। तीमध्ये दुई भर्खरै दर्ता भएका हुन्।
प्रतिनिधी सभामा रहेका २५ मध्ये सवैभन्दा विवादित नागरिकता विधेयक हो। अघिल्लै अधिवेशनमा यसलाई ऐनको रुप दिने भनिए पनि पार्टीका शीर्ष नेतृत्व तहमा सहमति नजुट्दा रोकिएको छ।
राज्य तथा सुशासन समितिमा रहेको विधेयकमा सहमति समितिको बुता बाहिरको काम भएको छ। त्यसैले विवादित विषय यथावत राखेर संसद्मा पठाउने विषयमा समेत छलफल भइरहेको छ। वैवाहिक अंगीकृत नागरिकताको विषय सबैभन्दा पेचिलो बनेको छ। यो विषयमा पार्टीका मत बाझिएका छन्।
विवादित विषयमा सबै पार्टीकै सहमति जुटाउन गठन गरिएको उपसमिति निष्प्रभावी बनेको छ। विवाद यथावत राखेर प्रतिवेदन पेश गरेको छ। समिति सभापति शशी श्रेष्ठ भने सहमति जुटाएर यही अधिवेशनमा विधेयक पेस गर्न सकिने बताउँछिन्।
यसमा गृहकार्य भइरहेको उनको दाबी छ। उनले भनिन्, 'हामी यही अधिवेशनबाट पास हुनेगरी विधेयक पेश गर्ने तयारीमा छौं।'
यही समितिमा रहेको संघीय निजामती सेवा विधेयक, २०७५ पनि विवादित छ। कर्मचारीको सेवा प्रवेश र अवकासको उमेरलगायत सेवासँग सम्बन्धित व्यवस्थामा विवाद छन्। तर नागरिकता विधेयकको तुलनामा सहमति जुटाउन सहज देखिन्छ।
आज राष्ट्रिय सभाले यसबिचमा दिवंगत पूर्व सांसदहरुको शोक प्रस्ताव पारित गर्नेछ। राष्ट्रियसभाका समितिमा ६ विधेयक छन्। तीमध्ये नेपाल मिडिया काउन्सिल विधेयक, २०७५ विवादित बनेको छ। विवादित बनेपछि गठित संसदीय उपसमितिले आफ्नो प्रतिवेदन हालै बुझाएको छ। यसबीचमा विधेयकलाई लिएर विरोधमा उत्रिएका पत्रकारका संघ संगठनसँग सरकारले संशोधन गर्ने सहमति समेत जनाएको छ।
प्रतिनिधिसभामा विधेयक
बीमा विधेयक
नेपाल नागरिकता विधेयक
पारमाणविक विधेयक
संघीय निजामती सेवा विधेयक
सूचना प्रविधिसम्बन्धी विधेयक
ज्येष्ठ नागरिक सम्बन्धी विधेयक
खानेपानी तथा सरसफाइ विधेयक
विरुवा संरक्षण विधेयक
बीउ बिजन विधेयक
राष्ट्रिय खेलकुद विकास विधेयक
प्रमाण विधेयक
मदन भण्डारी विज्ञान तथा प्रविधि विश्वविद्यालय विधेयक
नागरिक लगानी कोष विधेयक
लोकसेवा आयोग विधेयक
शिक्षा सम्बन्धी केही नेपाल ऐन संशोधन गर्न बनेको विधेयक
पशु स्वास्थ्य तथा पशु सेवा परिषद् सम्बन्धमा व्यवस्था गर्न बनेको विधेयक
कारागार सम्बन्धी कानुनलाई संशोधन र एकीकरण गर्न बनेको विधेयक
शान्ति र सुरक्षा विधेयक
राष्ट्रिय प्राथमिकताप्राप्त आयोजनाको द्रुततर निर्माण तथा विकास सम्बन्धी विधेयक
राष्ट्रिय सुरक्षा परिषद विधेयक
राष्ट्रिय मानवअधिकार आयोग विधेयक
सार्वजनिक ऋण व्यवस्थापन विधेयक
बैंक तथा वित्तीय संस्था सम्बन्धी (पहिलो संशोधन) विधेयक
नेपाल राष्ट्र बैंक (तेस्रो संशोधन) विधेयक
धितोपत्रसम्बन्धी (पहिलो संशोधन) विधेयक
राष्ट्रियसभामा विधेयक
नेपाल विशेष सेवा विधेयक
नीति अनुसन्धान प्रतिष्ठान विधेयक
नेपाल मिडिया काउन्सिल विधेयक
यसका अलावा राष्ट्रियसभामा संघ, प्रदेश र स्थानीय तह (अन्तरसम्बन्ध व्यवस्थापन) विधेयक
नेपाल इन्जिनियरिङ परिषद (पहिलो संशोधन) विधेयक
काठमाडौं उपत्यका सार्वजनिक यातायात (व्यवस्थापन) प्राधिकरण विधेयक
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
