बिर्तामोडको चोरी शृंखला रोक्न ५० ठाउँमा सिसी क्यामेरा जडान

ब्लग

नेपाल लाइभ सोमबार, चैत ५, २०७४ ०७:५७

सुरुंगा- एक साताअघि आँगन एफएमका समाचार वाचक मदन संग्रौला बिर्तामोडको भद्रपुररोडस्थित अन्नपूर्ण चोक नजिक अफिसको प्यासेजमा मोटरसाइकल राखेर रेडियो स्टेसन छिरे। समाचार वाचन गरिसकेलगत्तै उनी घर फर्कन अफिसबाट तल ओर्लिए तर उनको मोटरसाइकल गायब थियो।

प्रहरीमा उजुरी दिए पनि उनको मोटरसाइकल अझै भेटिएको छैन।

त्यस्तै चन्द्रगढी निवासी अधिवक्ता दीपेन्द्र भट्टराईको पनि यसै साता बिर्तामोडबाटै मोटरसाइकल चोरी भयो। मोटरसाइकल संवाद समूहको सचिवालयबाटै चोरी भएपछि उनले इलाका प्रहरी कार्यालय बिर्तामोडमा निवेदन दर्ता गएका छन्।

चालू आवको यो अवधिमा संग्रौला र भट्टराईसहित ५४ जनाको मोटरसाइकल चोरी भएको इलाका प्रहरी कार्यालय बिर्तामोडमा निवेदन दर्ता भएको प्रहरी निरीक्षक ज्ञानबहादुर विष्टले बताए।

विशेषगरी पार्किङ गरेर राखेको ठाउँबाट मोटरसाइकल हराउने गरेका छन्। विष्टले भने, 'उजुरीका आधारमा खोजतलास गर्दा केही मोटरसाइकल फेला परे पनि सबै मोटरसाइकल फेला पार्न सकिएको छैन।'

१२ वटा बेवारिसे अवस्थामा भेटिएका मोटरसाइकल सवारी धनीलाई बुझाइएको छ भने ६ वटा भन्सार पठाइएको प्रहरी निरीक्षक विष्टले बताए। प्रहरीले फेला पारेका मोटरसाइकल कोशीपारि, कोशीपारिबाट चोरिएका मोटरसाइकल पूर्वमा फेला पर्ने गरेको प्रहरीले जनाएको छ।

मोटरसाइकल मात्रै नभई बिर्तामोडमा नगद तथा गरगहना चोरीका घटनामा पनि कमी आउन सकेको छैन। इलाका प्रहरी कार्यालय बिर्तामोडका प्रहरी नायब उपरीक्षक कृष्णप्रसाद कोइरालाका अनुसार साउनदेखि माघसम्म गरगहना र सामान चोरीका दर्जन बढी उजुरी परेका छन्।

'भारतसँगको खुल्ला सिमानाका कारण चोरीका घटना नियन्त्रणमा हामीलाई चुनौती छ,' प्रहरी नायब उपरीक्षक कोइरालाले भने, 'बिर्तामोड क्षेत्रमा आपराधिक गतिविधि हुन नदिन नयाँनयाँ सुरक्षा रणनीति अपनाए पनि आपराधिक गतिविधिमा उल्लेख्य कमी भने आउन सकेको छैन।'

५० ठाउँमा सिसी क्यामेरा
यसैबीच प्रहरीले प्रमाणसहितको अनुसन्धानका लागि सहजता होस् भन्दै झापाको मुख्य बजार बिर्तामोडका प्रत्येक टोलटोलमा सिसी क्यामेरा जडान गरेको छ।

दिनप्रतिदिन बिर्तामोडमा क्षेत्रमा आपराधिक क्रियाकलाप बढ्दै गएपछि स्थानीय निकाय, उद्योगी व्यवसायी र विभिन्न संघ संस्थाको सहयोगमा प्रहरीले पूर्व–पश्चिम राजमार्गसहित बिर्तामोडका प्रत्येक टोल–टोलमा सिसी क्यामेरा जडान गरेको हो। झण्डै रु ३० लाखको लागतमा यहाँका ५० बढी ठाउँमा सिसी क्यामेरा जडान गरिएको छ। जडित सिसी क्यामेराको अनुगमन जिल्ला ट्राफिक प्रहरी कार्यालय, इलाका प्रहरी कार्यालय र सिसी क्यामेरा जडित टोल समितिबाटै गर्न सकिने व्यवस्था मिलाइएको छ।

– सुरेन्द्र भण्डारी/रासस

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

काठमाडौँबाट हङकङ उडेका २८ यात्रुलाई ‘फुड पोइजन’, छानबिन समिति गठन

कुलमानले बुझाए स्पष्टीकरण, मन्त्रालयले लगाएका आरोपको खण्डन

लसएन्जलस: मृतकको संख्या १६ पुग्यो, आगो अझै अनियन्त्रित