काठमाडौं- भारतमा नागरिक संशोधन विधेयकलाई लिएर देशभर प्रदर्शन फैलिएको छ। यो प्रदर्शनमा राजनीतिक नेतादेखि इतिहासविद् र बलिउड कलाकारसम्म उत्रेका छन्। देशका विभिन्न भागमा विद्यार्थी र नागरिकले आन्दोलन गरिरहँदा सरकार भने यसको प्रतिरोधमा उत्रिरहेको छ।
नागरिक संशोधन विधेयकलाई लिएर प्रदर्शनमा प्रहरीले चरम दमनसमेत गरिरहेको छ। नागरिक संशोधन विधेयक संविधानविपरीत रहेको भन्दै प्रमुख प्रतिपक्षले संसदमा चर्को आलोचना गरिरहँदा बहुमतले पारित गराएर लागू गराएको सरकारले प्रर्दशनमा उत्रनेविरुद्ध पनि कडा रुपमा पेश हुन थालेको छ। सरकारले विभिन्न राज्यहरुमा इन्टरनेट बन्द गर्नेदेखि फोन सञ्चालनमा बाधा गर्ने र कर्फ्यू लगाउनेसम्मका कार्य गरेको छ।
प्रधानमन्त्री नरेन्द्र मोदीले नै सम्बोधन गरेर नागरिकता संशोधन कानुनको बचाउ गरे पनि जनताभने सडकमा प्रदर्शन गरिरहेका छन्। बिहीबार नागरिकता संशोधन विधेयकको विरोधमा सडकमा उत्रिएका प्रसिद्ध इतिहासकार रामचन्द्र गुहालाई पनि पक्राउ गरिएको छ।
राजधानी दिल्लीमा फोन बन्द
देशभर चलिरहेको आन्दोलनलाई ख्याल गर्दै सरकारको आदेशमा भारतको राजधानी दिल्लीमा एयरटेल कम्पनीले टेलिफोन नै बन्द गरिदिएको छ। सरकारको आदेशमा दिल्लीको केही क्षेत्रमा टेलिफोन सेवा बन्द गरिएको एयरटेलको दाबी छ। एयरटेलले सामाजिक सञ्जाल ट्वीटरमै सूचना सार्वजनिक गरेर यस्तो दाबी गरेको छ।
‘सरकारको निर्देशनको आधारमा भ्वाइस,इन्टरनेट र एसएमएस सेवा हालका लागि बन्द गरिएको छ’ उसको सूचनामा भनिएको छ। सरकारले प्रतिबन्ध आदेश हटाएपछि यी सेवा पुनः सुचारु हुने पनि उसले जनाएको छ। त्यस्तै अर्को मोवाइल कम्पनी भोडाफोनले पनि सरकारकै निर्देशनका कारण सेवा बन्द गरेको उल्लेख गरेको छ। अर्को आदेशपछि हाल बन्द रहेको सेवा सुचारु हुने उसको दाबी छ।
उत्तर प्रदेशमा धारा १४४ जारी
नागरिकता संशोधन कानुनको विरोधमा उत्रिएका उत्तर प्रदेशका प्रदर्शनकारीलाई लक्षित गर्दै संविधानको धारा १४४ लागू गरिएको छ। राज्य पुलिस महानिर्देशक ओपी सिंहले सामाजिक सञ्जाल ट्वीटरमार्फत १९ डिसेम्बरका दिनमा मानिसहरुलाई भेला हुन पाउने अधिकार नभएको उल्लेख गरेका छन्। ‘१९ डिसेम्बर २०१९ मा पुरै प्रदेशमा धारा १४४ लागू भएको छ कसैलाई कुनैपनि सभा गर्ने छुट छैन’ उनले उक्त सूचनामा उल्लेख गरेका छन्।
त्यस्तै युपि प्रहरीले पनि ट्वीटमार्फत उत्तर प्रदेशमा धारा १४४ लागू भएको जानकारी आफ्ना नागरिकलाई गराएको छ। संविधानको उक्त व्यवस्थाविपरीत कसैलाई पनि उपस्थित भएर सभा समारोह र विरोध र्याली ननिकाल्न प्रहरीले चेतावनी दिएको छ।
ममता बनर्जीदेखि कन्हैया कुमारसम्म विरोधमा
नागरिकता विधेकयले देश असंवैधानिक बाटोमा जाने भन्दै सर्वप्रथम भारतीय कांग्रेस पार्टीले संसदमा विरोध जनाएको थियो। राहुल गान्धी , पि चिदम्बरम र सोनिया गान्धीले नै यसको कडा विरोध गरेका थिए। कांग्रेसका अर्का सांसद शशी थरुरले मोदीले उग्र हिन्दु राज्य बनाउन संविधानलाई कुल्चिदै गएको टिप्पणी गरेका थिए।
यो विधेकयको विरोधमा अन्य नेताहरु पनि सक्रिय भएका छन्। नागरिकता विधेयकको विरोधमा पश्चिम बंगालकी ममता बनर्जीदेखि युवा सामाजिक कार्यकर्ता कन्हैया कुमारसम्म सडकमा उत्रिएका छन्। ममता बनर्जीले त पश्चिम बंगालमा राष्ट्रिय जनसंख्या रजिष्टर अपडेट कार्य पनि रोकिदिएकी छन्। सबै जिल्ला अधिकारीहरुलाई निर्देशन दिँदै उनले जनताको हितका लागि यसलाई रोक्नु परेको दाबी गरेकी छन्। उनले आफ्नो प्रदेशमा नागरिकता संशोधन कानुन लागू नगर्ने धम्की समेत केन्द्रीय सरकारलाई दिएकी छन्।
त्यस्तै युवा नेता कन्हैया कुमारले पनि नागरिकता कानुनको विरोधमा सडक प्रर्दशनमा उत्रेका छन्। बिहार बेगुसरायका उनले देशमा भइरहेको नागरिकता विधेयकमा विद्यार्थीमाथि र नागरिकमाथि भएको दमनको जनताले प्रतिवाद गर्ने बताए। संविधान र गरिबीविरोधी नागरिकता कानुन खारेज गर्न माग गरे।
इतिहासकारदेखि वकिलसम्म
नागरिकता संशोधन विधेयकको विरोधमा प्रर्दशनमा उत्रेका वरिष्ठ इतिहासकार रामचन्द्र गुहालाई प्रहरीले पक्राउ गरेको छ। त्यस्तै दिल्लीमा प्रर्दशनमा उत्रेका वरिष्ठ अधिवक्ता प्रशान्त भुषण, स्वराज इन्डियाका अध्यक्ष योगेन्द्र यादव , सामाजिक कार्यकर्ता हर्ष मन्दरलगायतलाई दिल्ली प्रहरीले पक्राउ गरेको छ।
धर्मवीर गान्धी, युवा विद्यार्थी नेता उमर खालिदलगायतलाई प्रहरीले नियन्त्रणमा लिएको छ। मोवाइल फोन कम्पनीहरु एयरटेल भोडाफोन, जियो लगायतलाई सरकराले दिल्लीको मन्डी हाउस, सीलमपुर,जाफरावाद,मुस्ताफावाद,जामिया नगर,शाहीन वाग , बवना एवं उत्तरी र केन्द्रीय दिल्लीका विशेष इलाकामा मोवाइल फोन सेवा बन्द गर्न निर्देशन गरेको थियो। सोही निर्देशनअनुसार उक्त क्षेत्रमा टेलिफोन सेवा बन्द रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
