काठमाडौं- नेपाली कांग्रेसभित्रको किचलो झनै थपिएको छ। सहमतिनजिक पुगेको बताइएको दुई पक्षीय वार्ता बुधबार वरिष्ठ नेता रामचन्द्र पौडेल पक्षको बैठकले ब्रेक लागेको छ।
१४ औं महाधिवेशनको कार्यतालिका केन्द्रीय समितिको बैठकमा पेश गर्न माग गर्दै आएको पौडेल पक्षले थप माग कार्यान्वयनको अडान लिएपछि विवाद बढ्दै गएको छ। संस्थापन र पौडेल पक्षका नेताहरु सम्मिलित कार्यदलको बैठकले करिब सहमतिनजिक पुगेको बताइरहँदा बुधबारको पौडेल निवासमा भएको बैठकले सहमतिलाई टाढा पुर्याइदिएको छ।
तेश्रो धारका नेता कृष्णप्रसाद सिटौलासमेत सहभागी बैठकले इतरसमूहका नेताहरु एक स्थानमा हुने आन्तरिक तयारी समेत गरेको छ। भ्रातृ संस्था र विभागको विषयमा अडानबाट पछि नहट्ने निर्णय पौडेल पक्षले गरेको छ। पछिल्लो समय पौडेल पक्षले विभागको संख्या बढाउनै नदिने अडान लिने तयारी गरेको छ। उक्त समूहले विभाग गठनको औचित्य नहुने प्रष्टाएको छ। संस्थापन पक्षले विभाग गठन गर्नै चाहे विधानअनुसार २८ विभागमात्रै राख्नुपर्ने अडान छ। गठन हुने २८ विभागमा समान हैसियतका आधारमा भागबण्डा गर्नुपर्ने शर्तसमेत राखिएको छ। पौडेलनिकट नेता नविन्द्रराज जोशीले भने, ‘शक्तिशाली विभागमा समान हैसियतका आधारमा स्थान दिनुपर्छ। उपयुक्त व्यक्तिलाई उपयुक्त विभाग दिनुपर्छ।’
अर्को विवादित संगठन तरुण दलमा चार जनाको स्थानमा नयाँ अनुहार ल्याउन विकल्प सुझाइएको छ। नयाँ अनुहार ल्याउन नसक्ने अवस्था भए वर्तमान कार्यसमितिमै रहेका चार जनालाई निरन्तरता दिएर संगठनलाई पूर्णता दिनुपर्ने प्रस्ताव गरिएको छ। गत माघमा भंग गरिएको नेविसंघको तदर्थ समिति ३२ वर्षे उमेर हद कायम गरि गठन हुनुपर्ने बताइएको छ। संस्थापन पक्षले ३२ वर्ष माथिबाट तदर्थ समिति बनाए ३२ वर्ष मुनिको समानान्तर कार्यसमिति गठन गर्ने चेतावनी दिएको छ। देउवा पक्ष दुबै भ्रातृ संस्थाको नेतृत्व अन्य खेमालाइ नदिने पक्षमा छ।
पौडेल निवासमा भएको बैठकमा उनी निकटका शीर्ष तहका नेतासहित अन्य केन्द्रीय सदस्य थिए। पौडेल, सिटौला, महामन्त्री डा शशांक कोइराला, नेताहरु रामशरण महत, अर्जुननरसिंह केसी, डा रामशरण महत, डा शेखर कोइराला, नविन्द्रराज जोशी, कल्याण गुरुङ लगायतका नेताहरु बैठकमा थिए।
कार्यतालिका सार्वजनिक गर्न संस्थापन पक्ष करिब सहमतिमा पुगेको छ। क्रियाशील सदस्यता छानबिन समिति गठन हुनुपर्ने माग पनि उठाइएको छ। नेता नरहरि आचार्यको कार्यदलले तयार गरेको क्रियाशील सदस्यको नाम र संख्या संस्थापनइतर समूहका नेताहरुलाई पनि उपलब्ध गराउनुपर्ने मागसमेत उठाइएको छ।
बैठकमा संस्थापन इतरसमूह समान प्रस्तावका लागि एउटै माग बनाएर जाने सहमतिसमेत भएको छ। संस्थापन समूह र पौडेल समूहलाई समन्वय गरिरहेका नेता सिटौला बुधबारको बैठका सहभागी हुनुलाई पौडेल पक्षले बल पुगेको ठहर गरेको छ। सिटौलाको भनाई उधृत गर्दै एक नेताले भने, ‘महाधिवेशनमा को सभापतिको उम्मेदवार बन्ने त्यसैबेला थाहा हुन्छ। त्यो कुरा त्यसैबेला गरौला। अहिले मिलेर जाऔं।’ सहमति नहुन्जेलसम्म केन्द्रीय समितिको बैठकमा उपस्थित नहुने विषयमा संस्थापनइतरका नेताहरु एकमत भएका छन्।
पौडेल पक्षले संस्थापनइतरको बैठक बोलाएपछि बुधबार बोलाइएको केन्द्रीय समिति बैठक बस्दै नबसी स्थगित भएको छ। अर्को बैठक शुक्रबारलाई बोलाइएको छ। सहमतिका लागि बिहीबार आन्तरिक छलफल हुनसक्ने नेता जोशीले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
