कोलम्बो- श्रीलङ्काको सरकारले डेङ्गुलाई निर्मुल गर्नका लागि विशेष प्रकारको ब्याक्टेरियालाई प्रयोग गर्ने भएको छ।
स्थानीय सञ्चारमाध्यमहरूले बिहीबार श्रीलङ्काको स्वास्थ्य मन्त्रालयलाई उद्धृत गर्दै भनेका छन्, ‘सरकारले अब डेङ्गुको सङ्क्रमणलाई रोक्न विशेष प्रकारको ब्याक्टेरियाको प्रयोग तथा परीक्षण गर्न लागेको छ।’
मन्त्रालयका उप-महानिर्देशक पावा पालिहवादानले भने, ‘डेङ्गु सङ्क्रमणलाई रोक्न ‘वोल्बाचिया’ नामक एक प्रकारको ब्याक्टेरियालाई कोलम्बोका नगर क्षेत्रमा सन् २०२० को फेब्रुअरीदेखि छोडिनेछ। नगरका घरहरूमा लामखुट्टेका फुल र ‘फुड क्याप्सुल’ पानीमा दुईहप्तासम्म बन्द गरिनेछ। यसबाट वयस्क लामखुट्टे पैदा हुनेछन् र तिनीहरूलाई डेङ्गु प्रतिरोधी ब्याक्टेरिया फैलाउनका लागि खुलास्थानमा छोडिनेछ।’
विश्व लामखुट्टे नियन्त्रण कार्यक्रमका अनुसार ‘वोल्बाचिया’ ले लामखुट्टेको भाइरस सङ्क्रमण गर्ने क्षमतालाई कमजोर पारिदिने गर्छ। यसका कारण लामखुट्टेबाट मानिसमा भाइरस सङ्क्रमण हुने र आत्मनिर्भरतामा व्यापक मात्रामा वृद्धि हुन्छ। ‘वोल्बाचिया’ले लामखुट्टेबाट सर्ने डेङ्गु, एलो फिवर र जाइकाजस्ता भाइरसहरूसँग लड्छ र भाइरस सङ्क्रमण गर्ने क्षमतालाई कम गर्छ।
लामखुट्टेबाट सर्ने रोग नियन्त्रणका लागि ‘वोल्बाचिया’को परीक्षण गर्ने पहिलो मुलुक अष्ट्रेलिया हो र विगत आठ बर्षयता लामखुट्टेको टोकाइबाट हुने समस्या अष्ट्रेलियामा नदेखिएको बताउने गरिएको छ।
सन् २०१७ मा श्रीलङ्कामा १ लाख ८६ हजार १ सय १ जनालाई डेङ्गुको सङ्क्रमण भएको थियो भने ३ सय २० जनाको मृत्यु भएको थियो। स्वास्थ्य मन्त्रालय सरूवा रोग नियन्त्रण एकाईका अनुसार सन् २०१९ मा श्रीलङ्कामा डेङ्गुको सङ्क्रमण भएर अस्पताल पुग्ने बिरामीको सङ्ख्या ८६ हजार ४ सय ८४ रहेको छ। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
