काठमाडौं- दशरथ रंगशालामा १३औं दक्षिण एसियाली खेलकुद (साग) को पुरुष फुटबलमा नेपालले भुटानलाई २–१ गोलअन्तरले पराजित गर्दै स्वर्ण जित्यो। नेपालले सन् १९८४, १९९३ र २०१६ मा पनि साग फुटबलमा स्वर्ण जितेको थियो। यति नै बेला धेरैको स्मृतिमा भने २०१६ मा भारतमा भएको साग फुटबल आइरहेका छ।
२०१६ फेब्रुअरी १५ मा १२औं सागमा फुटबलको फाइनल खेल चलिरहेको थियो। त्यसअघि नेपालका लागि जुडोमा फुपुल्हामु खत्री र उसुमा निमा घर्तीमगरले मात्रै स्वर्ण पदक दिलाएका थिए। पदक तालिकामा नेपालको अवस्था निकै नाजुक थियो।
घरेलु टोली भारत र नेपालबीचको फुटबल फाइनल खेल जब इन्दिरा गान्धी अन्तर्राष्ट्रिय रंगशालामा सुरु भयो तब नेपाली दर्शकमा अर्को स्वर्णको आश सञ्चार भयो। तर, खेलको ३०औं मिनेटमा नै होलिचरण नर्जरीले गोल गर्दै भारतलाई अग्रता दिलाए। त्यसले केही दिनअघिसम्मको भारतको नाकाबन्दीले चिढिएका दर्शक अझ स्तब्ध भए।
कमजोर बनिरहेको जितको मानसिकता एकाएक उचालियो जब खेलको ६५औं मिनेटमा प्रकाश बुढाथोकीले उत्कृष्ट फ्रिकिक प्रहार गर्दै नेपाललाई बराबरी दिलाए। सागमा मात्रै होइन नेपाली फुटबलमा नै त्यो गोलको उचाइ ठूलो छ।
पहिलो गोलले हौसिएको नेपालका लागि सेमिफाइनलमा ह्याट्रिक गोल गरेका नवयुग श्रेष्ठले ७० औं मिनेटमा गोल गर्दै २–१ गोलको अग्रता दिलाए। त्यही गोल थियो जसले नेपालले आफूमाथिको नाकाबन्दीको बदला फुटबलमार्फत लिएको आम दर्शकलाई सन्तुष्टी मिल्यो।
दोस्रो गोलपछि नेपालले पूरै रक्षात्मक खेल खेल्दै स्वर्ण पदक जित्न सफल भयो। यहि त्यस्तो स्वर्ण पदक थियो जसले अन्य खेलमा आएको निराशा छोपिदियो। र भारतले जितेको १८९ स्वर्ण पनि फुटबल फाइनल हारेर खल्लो बन्यो।
.jpg)
अनन्त तामाङ, विक्रम लामा, सुनिल बल र विकेश कुथु। लगातार दुई पटक नेपाललाई स्वर्ण दिलाउने हिरोहरु हुन्। यी चार जना खेलाडीले नै हुन् जसले भारतलाई उसैको भूमिमा पराजित गर्दै स्वर्ण जित्दा महत्वपूर्ण भूमिका खेलेका थिए। विक्रम, अनन्त र विकेश त गुवाहाटीमा भएको साग फुटबलमा नेपालका लागि सबै खेलमा पूरै समय खेले।
संयोग नै मान्नु पर्छ करिब ३ वर्षपछि नेपालले लगातार साग खेलकुदमा स्वर्ण पदक उचाल्दा यी चार जनाकै मुख्य भूमिका रह्यो।
मंगलबार सम्पन्न १३औं सागमा पुरुष फुटबलमा भुटानलाई २–१ गोलको हार चखाउँदै नेपालले स्वर्ण जित्यो। यसपटक भुटान पनि कमजोर टिम भने थिएन। उसले नेपाल बाहेक बंगलादेशलाई १–०, माल्दिभ्सलाई २–१ र श्रीलंकालाई ३–० गोलअन्तरले पराजित गर्दै फाइनल खेलेको थियो।
टिम वर्क गेम
खेलको १६ औं मिनेटमा अभिषेक रिजालको गोलबाट अग्रता लिएको नेपालले खेलको ३७औं मिनेटमा गोल खान पुग्यो। भुटानका कप्तान चेन्चो ग्याल्सेनले उत्कृष्ट गोल गर्दै १–१ गोलको बराबरी दिलाए।
पहिलो हाफको अन्त्यतिर नेपाली खेलाडी निकै आतिएर खेले। भुटानका खेलाडीले बल पोजिसनमा राख्दै निकै राम्रो मुभहरु बनाइ रहँदा नेपाल खेलाडीमा भने तालमेल नमिलेको प्रष्टै देखिन्थ्यो। तर खेलको ५४औं मिनेटमा नेपालका मिडफिल्डर सुनिल बलले अप्रत्यासित हेडबाट गोल गर्दै नेपाललाई २–१ गोलको जित दिलाए।
बंगलादेश र माल्दिभ्सविरुद्धको खेलमा नेपालको लामो पास निकै सफल भयो। सर्ट पास पनि त्यतिकै चुस्त देखिन्थ्यो। भुटानविरुद्धको खेलमा सर्ट पास निकै सफल भए। तर केही खेलाडीले व्यक्तिगत प्रदर्शनका लागि मात्रै पनि खेलेको जस्तो देखियो। जसले नेपालको अझै स्तरीय खेल हुन सकेन।
मिडफिल्डर विक्रम लामालाई डिफेन्समा ल्याएर खेलाउने प्रशिक्षक बालगोपाल महर्जनको योजना पनि सफल भयो। यसअघि मिडिफल्डरकै रुपमा खेल्दै आएका विक्रमले साग फुटबलमा भने सेन्टर डिफेन्डरको भूमिका निभाए। जसमा उनी सफल पनि भए।
खेलकै दौरानमा अनुभवि विक्रमसँगै अनन्त तामाङ, विकास खवास र सुमन अर्यालले उतिकै योगदान दिए। सुजल श्रेष्ठलाई फरवार्डमा उतारिँदा मिडफिल्डमा अभिषेक रिजाल, सुनिल बल, नितिन थापा, मिक्चेन तामाङ र तेज तामाङलाई जिम्मा दिइयो। जहाँ भुटानविरुद्धको खेल मिडफिल्डरकै गोलमा जित बन्यो।
.jpg)
चार खेलाडी २ भूमिकामा २ स्वर्ण
१३औं सागमा नेपालले स्वर्ण जितेसँगै साग खेलकुदमा नेपाली पुरुष फुटबलले चार पटक स्वर्ण जितेको छ। सन् १८९४ मा काठमाडौंमा भएको पहिलो साग खेलकुदमा स्वर्ण जितेको नेपालले १९९३ र २०१६ मा स्वर्ण जित्न सफल भएको थियो।
बालगोपाल महर्जन, राजेश मानन्धर, मृगेन्द्र मिश्र र मिलन हाँडा १९९३ मा नेपालले स्वर्ण पदक जित्दा मुख्य खेलाडी थिए। यी चारै जना अहिले नेपाल यू–२३ टिमको प्रश्षिक हुँदा नेपालले स्वर्ण पदक जित्न सफल भयो।
बालगोपाल मुख्य प्रशिक्षक हुन् भने, राजेश सहायक र मृगेन्द्र गोलकिपर प्रशिक्षक हुन्। मिलन भने राष्ट्रिय खेलकुद परिषद्का मुख्य प्रशिक्षक हुन्। खेलाडी भएर नेपाललाई स्वर्ण पदक दिलाएका यी चारै ब्यक्तिले प्रशिक्षकमा पनि एकै पटक नेपाललाई स्वर्ण दिलाएका छन्।
साग खेलकुदकै सबैभन्दा लोकप्रीय खेल हो फुटबल। दशरथ रंगशालामा हरेक दिन फुटबल हेर्न आएका दर्शकको संख्याले पनि त्यसलाई पुष्टी गर्छ। फुटबलमा जसले जित्छ अन्य खेलको जित त्यसै छायामा परिदिन्छ। यो पटक घरेलु मैदानमै नेपालले करिब १५ हजार दर्शकलाई साक्षी राखेर स्वर्ण जितेको छ। यसले सिंगो देश उत्साहित भएका छन् भने खेलाडी प्रति गौरव गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
