एजेन्सी- नोबेल शान्ति पुरस्कार विजेता म्यानमारकी नेतृ आङ सान सुकीले मानवता विरुद्धको अपराधमा बयान दिन अन्तर्राष्ट्रिय अदालत हेग पुगेकी छिन्।
कुनै समय प्रजातन्त्र र महिलाहरुका लागि आईकन मानिएकी सुकी आफ्नै सरकारले गरेको मानवताविरुद्धको अपराधमा बचाउ गर्न हेग पुगेकी हुन्।
उनी परम्परागत बर्मेली पोशाकमा अदालत पुगेकी हुन् । सुकी अदालत पुग्दा सञ्चार माध्यमहरु उनको प्रतिक्षामा रहेका थिए ।
म्यानमार सरकारले सन् २०१७ मा रोहिंग्या मुसलमान समुदायमाथि दमन गरेको भन्दै ५७ मुस्लिम मुलुकका तर्फबाट गाम्बियाले अन्तर्र्राष्ट्रिय अदालतमा उजुरी हालेको थियो।
उनलाई विश्वका महान राजनीतिक हस्तिहरु नेल्सन मन्डेला र महात्मा गान्धीसँगै सम्मानका साथ नाम लिइन्थ्यो। तर आफ्नै देशका नागरिकमाथि दमन हुँदासमेत मौन रहेको भन्दै विश्वभर सुकीको आलोचना हुदै आएको थियो।
म्यानमार सरकारको दमनपछि देश छाडेका ७४ हजार रोहिंग्या समुदाय बंगलादेशमा शरणार्थीको रुपमा रहँदै आएका छन्।
‘म न्यायको पक्षमा छु,’ एक रोहिंग्या नहुर करिमले भने, ‘मैले सरकारको दमनमा हजुरबुबा र दाजु गुमाउनु परेको थियो उनीहरुले न्याय पाउनु पर्दछ ।’ टुलाटोली गाउँमा बस्दै आएको उनको परिवार नै बंगलादेश विस्थापन हुनु परेको थियो ।
राष्ट्रसंघका अनुसन्धानकर्ताहरुले पनि स्थलगत अध्ययन गरेर आम नरसंहार भएको प्रतिवेदन दिएको थियो । यो सुनुवाई तीन दिनसम्म अन्तर्राष्ट्रिय अदालतमा हुने छ।
रोहिंग्यामाथि आमदमन मात्र नभई बालबालिकामाथिा हिंसा, बलात्कार र सामूहिक हत्या भएको विषयमा समेत अन्तर्राष्ट्रिय अदालतमा सुनुवाई हुनेछ।
म्यानमारका अधिकारीहरुले आफ्नो मुलुकको पक्षमा प्रतिरक्षा गर्ने बताए।
मानव अधिकार हननको मुद्दामा अन्तर्राष्ट्रिय अदालतमा उपस्थित हुने सुकी पहिलो महिला नेतृ हुनेछिन्। उनले बिहीबार अदालतमा आफ्नो कुरा राख्नेछिन। उनले अन्तर्राष्ट्रिय अदालतलाई म्यानमारको क्षेत्राधिकारमा प्रवेश गर्ने अधिकार नहुने तर्क गर्नेछिन् ।
सुकीले आफ्नो युरोप भ्रमणलाई नरोक्न समेत हेगसँग माग गर्ने छिन् ।
म्यानमारकी छोरीको नाममा चिनिने सुकी अन्तराष्ट्रिय अदालतमा उपस्थित हुदाँ उनलाई दिइएको नोवेलको बारेमा पनि चर्चा परिचर्चा भईरहेको छ । १९९१मा नोवेल पाएकी सुकी देशभित्र ‘द लेडी’ को नाममा परिचित छन् ।
यो सुनुवाई केही लामो समय लाग्ने भएकाले तत्कालै कुनै निर्णय भने आउने छैन ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
