काठमाडौं- नेपाल कम्युनिस्ट पार्टी (नेकपा) को सचिवालय बैठक मंसिर २९ गतेको लागि बोलाइएको छ।
प्रचण्डको अध्यक्षतामा सोमबार पार्टी मुख्यालय धुम्बाराहीमा बसेको सचिवालय बैठकले स्थायी समितिको बैठकको मिति तय गरेको हो।
पार्टी विधानमा प्रत्येक तीन महिनामा बस्नुपर्ने भनिएको बैठक ठ्याक्कै एक वर्षपछि बस्न लागेको हो। अघिल्लो वर्ष पनि मंसिर २९ गतेदेखि सुरु भएको बैठक पुस १३ गतेसम्म लम्बिएको थियो।
'स्थायी समितिको बैठक यही मंसिर २९ गते ११ बजेबाट सुरु हुने गरी तय गरिएको छ', बैठकपछि प्रवक्ता नारायणकाजी श्रेष्ठले भने, 'सामान्यतया बैठक २ दिनमा सम्पन्न गर्ने सोच बनाइएको छ।'
त्यस्तै बैठकले यसभन्दा अगाडि बसेको स्थायी समितिको निर्देशनलाई मान्दै पार्टी विधानमा केही संशोधनहरु गरेको छ। त्यसका अतिरिक्त यसअघि सचिवालयबाटै भएका कतिपय निर्णयहरुलाई पनि आधार बनाई संशोधन प्रस्ताव तयार गरिने छ। 'यो प्रस्ताव स्थायी समिति र आवश्यकताअनुसार केन्द्रीय समितिमा प्रस्तुत गरेपछि कार्यान्वयमा जाने छ', श्रेष्ठले भने।
बैठकले हालै सम्पन्न निर्वाचनका सन्दर्भमा सम्बन्धित पार्टी कमिटीहरुलाई समीक्षात्मक रिपोर्ट पठाउन पाँच दिनको म्याद पनि थप गरेको छ। र सो मिति अनिवार्य बनाइएको छ। यसअघि बसेको सचिवालय बैठकले २२ गतेभित्र रिपोर्ट पठाउन भनेको थियो। तर कतिपय कमिटीबाट अझै रिपोर्ट प्राप्त हुन सकेको थिएन।
बैठकमा संगठन विभागले विभागको तर्फबाट एक कार्ययोजना सम्बन्धी प्रस्ताव प्रस्तुत गरेको छ।
बैठकले केन्द्रीय निकायहरु (सल्लाहकार कमिटी, निर्वाचन आयोग, ज्येष्ठ कम्युनिस्ट मञ्च, आयोगहरु र विभागहरु) को पूर्णताको निम्ति प्रमुख र उपप्रमुखहरुले सात दिनभित्र त्यससम्बन्धी प्रस्ताव महासचिव समक्ष प्रस्ताव गर्न भनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
