पोखरा- १३औं दक्षिण एसियाली खेलकुद (साग) को भारोत्तोलनमा नेपालले २ स्वर्ण, ३ रजत र ११ कास्य पदक जितेको छ।
पोखरामा आज सम्पन्न भारोत्तोलन खेलमा नेपालले आइतबार थप १ रजत र १ कास्य पदक जित्दै भारोत्तोलनमा कुल २ स्वर्ण ३ रजत र ११ कास्य पदक जितेको हो।
आइतबार नेपालका लागि सागर भण्डारीले पुरुष १०९ केजी तौल समूहमा रजत पदक जित्न सफल भएका हुन्। यो समूहमा पाकिस्तानी खेलाडी हन्जाला दस्तगिर वुटले स्वर्ण जिते। उनले स्न्याचतर्फ १५० र क्लीन एण्ड जर्कमा १८१ सहित कुल ३३१ किलो भार बहन गरेका हुन्।
नेपालका लागि रजत जितेका सागरले राष्टिय रेकर्ड सहित रजत जिते। उनले स्न्याचतर्फ १२० र क्लीन एण्ड जर्कमा १५५ गरी कुल २७५ तौल उठाएका हुन्। यसअघि सागको छनोट चरणमा आफ्नो नाममा तीनै विधाको रेकर्ड १३ औं सागमा उनले भंग गरेका हुन्।
प्रतियोगितामा बंगलादेशका खेलाडी मोहम्मद अब्दुल्लाह अई मुमिनले कास्यमा पदक पाए। उनले स्न्याचतर्फ १२० र क्लीन एण्ड जर्कमा १४७ सहित कुल २६७ तौल उठाएका हुन्।
आइतबार नै भएको १०९ प्लस तौल समूहमा पाकिस्तानकै मोहम्मद नुह दस्तगीर वुटले स्वर्ण जिते। उनले स्न्याचमा १६५ र क्लीन एण्ड जर्कमा २१५ गरी कुल ३८० तौल उठाएका हुन्। त्यस्तै, श्रीलंकन खेलाडी डब्लु पी यु चरुकाले रजत जितेका हुन्। उनले स्न्याचमा १४० र क्लीन एण्ड जर्कमा १८० गरी कुल ३२० भार बहन गर्दा नेपालका लागि पुकार गुरुङले कुल २७५ तौल उठाए। उनले स्न्याचतर्फ १३२ र क्लीन एण्ड जर्कमा १४३ भार बहन गरेका हुन्। नेपालका लागि रजत र कास्य जित्ने दुवै खेलाडीले समान २७५ तौल उठाएका हुन्। पुकारको लागि स्न्याच विधामा राष्टिय रेकर्ड हो।
२० स्वर्ण सहित कुल ६० पदकको लागि महिला तथा पुरुषतर्फ १०–१० तौल समूहमा भएको खेलमा नेपालले कुल १६ क्याटागोरीमा भाग लिएको थियो। सबै इभेन्ट्समा नेपाल पदक विहीन भएन। यसरी साग भारोत्तोलनमा नेपालले २ स्वर्ण, ३ रजत र ११ कास्य पदक जित्दै यात्राको सुखद अन्त्य गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
