काठमाडौं- बंगाली नागरिक ताहिरा शशीले सोमबार श्रीमान् रेज्वानुल हक साहोनसहित सामाजिक सञ्जाल फेसबुकमा खुसी हुँदै नेपाल आउन लागेको फोटो पोस्ट गरिन्।
बंगालादेशको ढाकास्थित हजरत सहजलाल अन्तर्राष्ट्रिय विमानस्थलबाट उनले आफू र श्रीमान् नेपालमा आउन लागेको सन्देशसहितको तस्बिर पोस्ट गरेकी थिइन्। उनले विवाहको वर्षगाँठको अग्रिम उत्सव र नेपालतर्फको यात्रा सुरु भएको सन्देश फेसबुकमा लेखेकी थिइन्।
‘एन्ड हियर द जोर्नी विगिन्स, एड्भान्स सेलिब्रेसन अफ एनिभर्सरी, स्पेसल मार्च’ उनको फेसबुकमा लेखिएको छ। तर, यो दम्पत्तीको नेपालतर्फको यात्रा भने त्रिभुवन अन्तर्राष्ट्रिय विमानस्थलमा आइपुगेपछि भताभुंग भयो।
सोमबार दिउँसो २ बजेर १८ मिनेट जाँदा उनीहरु सवार युएस बंगला बिमान त्रिभुवन अन्तर्राष्ट्रिय विमानस्थलमा अवतरका क्रममा दुर्घटना भयो। दुर्घटनामा श्रीमती ताहिरको निधन भइसकेको छ भने श्रीमान् रेज्वानुलको चाबहिलस्थित ओम अस्पतालमा आइसियूमा उपचार भइरहेको छ।
यसैगरी, सोही दुर्घटनामा अर्का एक बंगाली दम्पत्तीको समेत निधन भएको छ। इमराना कविर हासी र रोकिबुल हसनको दुर्घटनामा निधन भएको छ। उनीहरु बंगलादेशबाट बिदा मनाउन नेपाल आएका थिए।
इमरानाले श्रीमान् हसनसहितको तस्बिर र बिदाको शुरुवात भएको सन्देश ढाकाबाट उड्नु अघि सामाजिक सञ्जाल फेसबुकमै पोस्ट गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
