बुटवल- बुटवलमा जारी तिलोत्तमा गोल्डकप नकआउट फुटबल प्रतियोगिताको तेश्रो क्वाटरफाइनलमा थ्रीस्टार फुटबल क्लब सेमिफाइनल प्रवेश गरेको छ।
बुटवल देवीनगरस्थित एन्फा टेक्निकल सेन्टरको खेल मैदानमा भएको खेलमा फ्रेण्ड्स क्लबलाई पेनाल्टी सुटआउटमा ४–३ गोल अन्तरको जित निकाल्दै थ्रीस्टार फुटबल क्लब सेमिफाईनलमा प्रवेश गरेको हो।
निर्धारित समयमा दुवै पक्षबाट २–२ गोल भएपछि खेल सुटआउटमा गएको थियो । जहाँ थ्रीस्टारका ४ खेलाडीले गोल गर्दा फ्रेन्ड्सका ३ जनाले मात्रै गोल गर्न सके।
यसअघि थ्रीस्टारका लागि विदेशी खेलाडी अजेई मार्टिन र सुसन श्रेष्ठले २ गोल गरेका थिए। खेलको पहिलो हाफको पाँचौ मिनेटमा फ्रेन्ड्सका लागि विदेशी खेलाडी जेनल ग्लोरीले सुन्दर गोल गर्दै खाता खोलेका थिए ।
फ्रेन्डस्का कुलदीप कार्कीले फउल गरेपछि खेलको २१ औं मिनेटमा निरज बस्नेतको फ्रि किकलाई अजेईले गोलमा परिणत गर्दै १–१ गोलको बराबरीमा ल्याएका थिए ।
दोश्रो हाफको तेश्रो मिनेटमा थ्रीस्टारका सुसन श्रेष्ठले रिवाउन्स बललाई सुन्दर गोलमा परिणत गरिदिएका थिए भने दोश्रो हाफको ४०औं मिनेटमा वर्षात् गुरुङको कर्नरलाई विदेशी खेलाडी सायलाले गोलमा परिणत गरिदिएका थिए । खेलमा उत्कृष्ट प्रदर्शन गर्ने थ्रीस्टारका गोलरक्षक ऐलन न्यौपाने म्यान अफ दि म्याच भए ।
मंगलबार अन्तिम क्वाटरफाइनल खेल तेश्रो झापा गोल्डकपको विजेता नेपाल आर्मी र मनाङ मस्र्याङ्दी क्लबका बीचमा हुने आयोजक रुपन्देही फुटबल संघका अध्यक्ष कुमार केसीले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
