लन्डन– इंग्लिस प्रिमियर लिगअन्तर्गत वार्टफोर्डसँगको खेलमा विजयी हुँदै आर्सनलले हारको श्रृंखलालाई रोकेको छ। प्रिमियर लिगका पछिल्ला ३ खेलमा पराजित भएको आर्सनललाई विजयको बाटोमा फर्काउन स्कोड्रान मुस्ताफी, इमेरिक औवामियाङ र हेनरिख मखितर्यानले एक–एक गोल गरे।
फेब्रुअरी ३ मा इभर्टनलाई ५–१ को जित निकालेको आर्सनलले प्रिमियर लिगका पछिल्ला ३ खेल गुमाएको थियो।
खेलको आठौँ मिनेटमा मेसुट ओजिलको फ्रिकलाई मुस्ताफिले गोलपाष्टको दिशा दिएका थिए। पछिल्ला १५ खेलमा पहिलो गोल गरेका मुस्ताफिले जारी सिजनमा गरेको यो तेस्रो गोल हो।
मुस्ताफिको गोलसँगै प्रिमियर लिगअन्तर्गत घरेलु मैदानमा आर्सनलले गोल संख्या १ हजार पुर्याएको छ। यो आँकडा पार गर्ने आर्सनल प्रिमियर लिगको दोस्रो टिम बनेको छ। यसअघि म्यानचेस्टर युनाइटेड(१ हजार ६६ गोल)ले पहिलो पटक यो आँकडा पार गरेको थियो।
दोस्रो हाफको सुरुवाती १५ मिनेट सकिनुअघि नै औवामियाङ गोल गर्दै आर्सनलको अग्रतालाई दोब्बर पारे। बोरुसिया डर्टमन्डबाट गत जनवरीमा ५६ मिलियन पाउन्डमा आर्सनल आएका औवामियाङले पछिल्ला ६ खेलमा गरेको यो तेस्रो गोल हो।
त्यसको केहि समयपछि नै रोवर्टो पेरियरालाई डिबक्सभित्र लडाइएपछि वार्टफोडले पेनाल्टी पायो। तर कप्तान ट्रोए डिनीले हानेको पेनाल्टीलाई आर्सनलका गोल किपर पेटर चेकले सहज बचाउ गरे। जारी सिजनको २३ खेलमा ६ गोल गरेका कप्तान डिनीले आर्सनलसँगको गोल अन्तरलाई कम गर्ने मौका खेर फाले।
उता आर्सनल किपर चेकले भने प्रिमियर लिगमा २ सयाैँ पटक पेनाल्टी बचाएका छन्। जुनसुकै प्रतियोगितामा यो इतिहास बनाउने उनी संसारमा एक मात्र गोलकिपर हुन्। यसअघि चेल्सीको जर्सीबाट १ सय ६२ वटा प्रहारलाई गोल हुनबाट रोकेका चेकले आर्सनलमा आएपछि ३८ वटा पेनाल्टी बचाएका छन्। सन् २०११ को फेब्रुअरीमा म्यान्चेस्टर युनाइटेडका इरिक क्यानटोनाको पेनाल्टी रोकेपछि प्रिमियर लिगमा उनको यो पहिलो पेनाल्टी बचाउ हो।
खेल सकिन १३ मिनेट बाँकि रहँदा हेनरिखले गोल गर्दै आर्सनलको गोलमा ह्याट्रिक गरे। खेलको म्यान अफ दि म्याचसमेत बनेका हेनरिखले गोलका लागि एक पास मिलाउनुका साथै खेलअवधीभर ५३ पास तथा ३ वटा ट्याकल गर्न सफल भएका थिए।
यो जितसँगै आर्सेन वेन्गर म्यानेजर भएपछि कुल १ हजार २ सय २२ खेलमा आर्सनल कुल ७ सय खेलमा विजयी भएको छ।
जितसँगै आर्सनलको ३० खेलबाट ४८ अंक भएको छ। अंक तालिकामा आर्सनल पाँचौ स्थानमा रहेको चेल्सीभन्दा ८ अंकले पछाडि छ। दशौँ स्थानको वार्टफोडको ३६ अंक छ।
उता गएराति नै भएको अर्को खेलमा टोटनह्यामले बर्नमाउथलाई ४–१ ले पराजित गर्दै फेरि तेस्रो स्थानमा उक्लिएको छ। टोटनह्यामका लागि सोन हियुङ मिनले २ तथा अली र औरिएरले एक–एक गोल गरे।
टोटनह्यामका स्ट्रार ह्यारी केन घाइते भएको खेलमा बर्नमाउथका स्टानिसलासले खेलको सातौँ मिनेटमा गोल गरे पनि सुरुवाती अग्रतालाई कायम राख्न नसक्दा बर्नमाउथ पराजित भएको हो।
प्रिमियर लिगको अंक तालिकामा टोटनह्याम लिभरपुलभन्दा १ अंक बढि प्राप्त गर्दै तेस्रो स्थानमा उक्लिएको छ।
पहिलो स्थानको म्यानचेस्टर सिटीको २९ खेलमा ७८ अंक रहँदा एक खेल बढी खेलेको म्यानचेस्टर युनाइटेडको ६५ अंक छ। आज स्टोक सिटीसँग हुने खेलमा सिटी विजयी भएका म्यानचेस्टर युनाइटेडसँगको अंकदुरी १६ पुग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
