भैरहवा– प्रथम बुद्ध क्लासिक लुम्बिनी अञ्चल स्तरीय बडी बिल्डिङ तथा मेन्स फिजिक प्रतियोगिताको उपाधि बुटवलका सुमित रानाले जितेका छन्।
बडी बिल्डिङ तथा फिटनेस एसोसिएसन रुपन्देहीको आयोजनामा भैरहवामा आइतबार सम्पन्न प्रतियोगितामा कृष्ण जिम बुटवलका खेलाडी रानाले समग्र टाइटलको उपाधि तौल समूहका विजेता ५ खेलाडीलाई पछि पार्दै रानाले उपाधि हात पारेका हुन्। उनले उपाधिसँगै नगद ३५ हजार प्राप्त गरे।
प्रतियोगितामा बुटवल फिटनेस आठ पदक जित्दै उत्कृष्ट टिम घोषित भएको छ।
यसैगरी, काठमाडौं बाहिर पहिलोपल्ट आयोजना भएको महिला स्क्वार्टको उपाधि ए एन्ड ए हेल्थ क्लबका विष्णुमाया पुनले जितेकी छन्। उनले १ सय १ केजी तौल उचाल्दै उपाधि चुमेकी हुन्। उपाधिसँगै उनले नगर ५ हजार हात पारिन्।
प्रतियोगितामा कोटिहवाको पावर एन्ड मसल जिमकी सुनिता थापा ९१ किलो तौल उचाल्दै दोस्रो भइन् भने बुटवल निर्बोध एरोबिककी रञ्जिता शेरचन ८६ केजी तौल उचाल्दै तेस्रो भइन्।
पुरुष फिजिक्सतर्फको प्रतियोगिता बुटवल फिटनेसका राजन श्रेष्ठ प्रथम, भैरहवाको एसएस फिटनेसका सुबिन विक दोस्रो तथा भलबारी जिमका अमित पंगेनी तेस्रो भए।
यसैगरी बडी बिल्डिङतर्फ ५५ केजी तौल समूहमा निर्बोधका कृष्ण राना प्रथम भएका छन्। ए एन्ड ए हेल्थ क्लबका कृष्ण रणपाल दोस्रो तथा बुटवल जिमका राजन श्रेष्ठ तेस्रो भएका छन्।
६० केजी तौल समूहमा बुटवल फिटनेसका नविन जिक प्रथम भएका छन्। उनी प्रतियोगिताकै उत्कृष्ट पोजर बन्दै समेत घोषित भए। उनी नगद १० हजारबाट पुरस्कृत भए। यसैगरी द जिमका अर्जुन श्रेष्ठ दोस्रो तथा बुटवल जिमका कोसिस गुरुङ तेस्रो भएका छन्।
६५ केजी तौल समूहमा कृष्ण जिमका सुमित राना प्रथम, बुटवल जिमका सुनिल आले दोस्रो तथा एसएस फिटनेसका विनोद बुढाथोकी तेस्रो भएका छन्।
७० केजी तौल समूहमा बुटवल फिटनेसका सुभाषमान श्रेष्ठ प्रथम भएका छन्। बुटवल फिटनेसकै सुरज थापा दोस्रो भए भने निर्बोधका रविबहादुर गाहा तेस्रो भए। ७० केजी माथिको तौल समूहमा एसएस फिटनेसका विष्णुकुमार निसाध प्रथम भएका छन्। बुटवल फिटनेसका अमर विक दोस्रो तथा बुटवल फिटनेसका वसन्तबहादुर थापा तेस्रो भए।
प्रतियोगितामा बेस्ट पोजरबाट बुटवल फिटनेसका नविन विक पुरस्कृत भए। तौल समूहको प्रत्येक विजेता तथा उत्कृष्ट खेलाडीहरु नगद ५ हजार तथा मेडल, प्रमाणपत्रबाट पुरस्कृत भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
