काठमाडौं- निमा घर्तिमगर त्यस्ता स्वर्णधारी हुन् जसले दक्षिण एसियाली खेलकुद (साग) मा कीर्तिमान कायम गरिन्। उसुमा दुई पटक स्वर्ण जित्ने निमा मात्रै एक खेलाडी हुन्।
बिहीबार बिहान लगनखेलस्थित आर्मी कभर्डहलमा उसुकी निमाले स्वर्ण पदक जित्दै कीर्तिमान कायम गरेकी हुन्। सन् २०१६ भारतमा भएको १२औं सागमा स्वर्ण जितेकी निमाले १३औं साग खेलकुदमा पनि स्वर्ण जितिन्।
अहिलेसम्म उसुमा कुनै खेलाडीले पनि साग खेलकुदमा दुई पटक स्वर्ण पदक जित्न सकेका छैनन्। त्यसैले निमाले लगातार दुई पटक स्वर्ण जित्दै उसुमा कीर्तिमान कायम गरेकी हुन्।
उसुको थाउलोअन्तर्गत महिला नान्दोमा निमाले स्वर्ण जितेकी हुन्। उनले कुल १८.९१ अंक जोडेर स्वर्ण जितेकी हुन्। १६.३ अंक बटुलेकी बंगलादेशकी मोर्जिना अख्त्तरले रजत पदक पाइन्।
जितेपछि निमा भन्छिन्, ‘म निकै खुशी छु। १२औं सागमा मैले स्वर्ण जिते। यहाँ मेरो परिवार नै आउनु भएको थियो। बाबा आमाकै अगाडि स्वर्ण जित्दा निकै खुशी छु। यो मेरो स्वर्ण अभिभावकलाई समर्पण गर्न चाहन्छु। त्यसपछि प्रशिक्षकहरुलाई।’
दंग छिन् निमा। एउटा सपना उनको साकार भएको छ। हुन त १२औं सागमा स्वर्ण जितेकी निमालाई यो पदक पनि स्वर्ण जित्न जित्न चुनौतीसँगै दबाब थियो। तर आफु सफल भएकोमा उनी मात्रै हैन यतिबेला सिंगो देश खुशीमा छ।
मान्छे की त दुःखी भएर रुन्छन् की खुशीले। खेल हेर्दै गरेकी निमाको आमाको आखाँमा पनि आशु खस्यो तर दुःखको होइन। छोरीको उपलब्धिमा खुशीले थाम्न नसकेर उनकी आमा भावुक भइन्। यतिबेला निमाको आमाको मात्रै हैन सिंगो देशकै छाती चौडा भएको छ।
लामो तपस्याको बाबजुत स्वर्ण हात पारेकी निमा भन्छिन्, ‘तयारी निकै राम्रो भएको थियो। हामीले करिब ६ महिनादेखि नै क्लोज क्याम्पमा बसेर अभ्यास गरिरहेका थियौं। हामीलाई सरकारको लगानी पनि निकै ठूलो थियो। १३औं सागको लागि भनेर हामी पहिलेदेखि नै राम्रो तयारीमा थियौं।’
त्यसो त नेपाली उसु खेलाडीले केही दिनअघि १३औं सागकै लाागि भनेर विश्व च्याम्पियनसिप खेल्न गएका थिए। चीनमा भएको खेलमा नेपालका १२ जना खेलाडीले सहभागिता जनाएका थिए। उसुमा स्वर्ण जित्न यसले पनि निकै मद्दत गर्यो। यो कुरामा निमा पनि सहमत छिन्। ‘विश्व च्याम्पियनसिपमा राम्रो नतिजा नआएपनि हामीले धेरै कुरा सिक्ने मौका पाएका थियौ। यसले पनि मद्दत गर्यो।’
उसुमा नेपालले आजसम्म चार वटा गोल्ड मेडल जितेका छन्, निमासँगै विजय सिँजाली, सुस्मिता तामाङ र दिपक हमालले स्वर्ण जितेका छन्।
भौतिक संरचनाकै अभावमा छट्पटाइ रहेको उसुले यति राम्रो नतिजा ल्याउनु निकै राम्रो हो। साग खेलकुदका लागि भनेर उसुले त्रिपुरेश्वरस्थित सेमिकभर्डहलमा अभ्यास गर्ने गरेको थियो। जहाँ वरिपरि खुल्ला भएको कारण खेलाडीले भनेको जस्तो अभ्यास गर्न पाएनन् भने म्याटकै अभावमा एउटा खेलाडीले अभ्यास गर्दा अर्को खेलाडी कुरेर बस्नु पर्ने नाजुक अवस्था थियो।
यस्तो स्थितिबाट आएपनि नेपालले उसुमा निकै राम्रो नतिजा ल्याएको छ।
निमा भन्छिन्, ‘अझै राम्रो भन्दा राम्रो खेल्ने मेरो चाहना छ। हुन त हामीसँग पर्याप्त भौतिक संरचना पनि छैन। म्याट देखि कभर्डहल छैन। अझै राम्रो गर्न यतिले पुग्दैन जस्तो लाग्छ। हामीले हरेक कुरामा सुधार गर्दै जानु पर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
