भैरहवा - रुपन्देही क्रिकेट संघको आयोजनामा भैरहवामा सम्पन्न नेपाल टेलिकम रुपन्देही सुपर लिग क्रिकेट प्रतियोगिताको उपाधि लुम्बिनी खुकुरी क्रिकेट क्लब भैरहवाले हात पारेको छ।
शनिबार भएको फाइनल खेलमा शिवशक्ति क्रिकेट क्लब भैरहवालाई १ सय ९२ रनको फराकिलो अन्तरले हराउँदै खुकुरीले उपाधि हात पारेको हो । जितसँगै खुकुरीले नगद ७० हजार रुपैयाँ र ट्रफी प्राप्त गरेको छ । उपविजेता शिवशक्तिले नगद ३५ हजार रुपैयाँ र ट्रफी प्राप्त गर्यो।
सिद्धार्थ रंगशालामा टस जितेर पहिला व्याटिङ गरेको खुकुरीले निर्धारित ५० ओभरको खेलमा ४९ ओभर ४ बलमा सबै विकेट गुमाई २ सय ९० रनको योगफल बनाएको थियो । उसका लागि प्रज्वल थापाले सर्वाधिक ६९, अन्तिम थापाले ६५ तथा प्रकाश जैशीले ४३ रन बनाए । बलिङमा शिवशक्तिका कृष्ण कार्की, विष्णु कटरिया र हरजित सिंहले समान २÷२ विकेट लिए ।
२ सय ९१ रनको लक्ष्य पाएको शिवशक्तिले २७ ओभर २ बलमा सबै विकेट गुमाई जम्मा ९८ रनमै समेटियो । उसका लागि हरजित सिंहले २५ तथा प्रथम पराजुलीले २० रन बनाए पनि अन्य ब्याट्सम्यानले दोहोरो अंक बटुल्न नसक्दा टिमले उपाधि गुमाउन पुग्यो । उसलाई सस्तैमा समेट्ने क्रममा म्यान अफ द फाइनल समेत रहेका साहव आलमले २१ रन खर्चेर ७ विकेट लिए । यस्तै मानबहादुर थापाले २ विकेट लिए ।
प्रतियोगितामा शिवशक्ति क्रिकेट क्लबका कृष्ण कार्की म्यान अफ दि सिरिज घोषित भए । उनले नगद १० हजार रुपैयाँ हात पारे। होराइजनका नूरध्वज सेन बेष्ट ब्याट्स म्यान तथा होराइजनकै शुसान भारी बेष्ट बलर घोषित भए । उनीहरुले समान ५-५ हजार रुपैयाँ हात पारे ।
विजेता खेलाडीहरुलाई प्रदेश नम्बर पाँचका सदस्य सन्तोष पाण्डेय, क्रिकेट संघका अध्यक्ष प्रशान्त विक्रम मल्ल तथा खेल संयोजक विनय ज्ञवालीले पुरस्कार प्रदान गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
