अमरगढी- डडेल्धुराको परशुराम नगरपालिकाबासीलाई कसैसँग मोबाइल सम्पर्क गर्नुपरे दुई घण्टा पैदल हिँडेर अग्लो डाँडा जानुपर्ने बाध्यता छ।
दुई घण्टा उकालो हिँडेर गाउँभन्दा माथि डाँडामा पुग्नु उनीहरुको रहर नभई बाध्यता हो। आफन्तको खबर बुझ्न र घरको कुरा जानकारी गराउनका लागि परशुराम नगरपालिकाका तीनवटा वडाबासी दैनिक दुई घण्टा हिँडेर डाँडा जाने गरेको परशुराम नगरपालिका-८ का धनबहादुर जाग्रीले बताए।
उनले भने, ‘मजस्तै यहाँका सबै व्यक्तिलाई फोन गर्न दुई घण्टा हिँडेर डाँडा चढ्नैपर्ने बाध्यता रहेको छ, के गर्नु? आफन्तको खबर सुन्न मन लाग्छ।’
डडेल्धुरा जिल्लाको भित्री मधेश क्षेत्रमा रहेको परशुराम नगरपालिका-८ मा पर्ने करेनी, जमरेनी र काँफलगैराका स्थानीयबासीहरुले फोन गर्नकै लागि घरबाट दुई घण्टा पैदल हिँडेर माथि डाँडामा पुग्ने गरेको जाग्रीले बताए।
परशुराम नगरपालिका-८ का तीनवटा गाउँमा यस्तो समस्या भएको उनले बताए। त्यो पनि घाम लागेको बेला स्काइफोन लाग्ने र अन्य बेलामा त्यसमा पनि समस्या आउने गरेको उनले भने, ‘ऐनसेल र नमस्तेको मोबाइलको नेटकर्वमा
नै समस्या देखिएको छ।’
दैनिक फोनमा धेरै काम पर्छ, त्यसैले डाँडामा पुग्नु बाध्यता भएको उनको भनाइ छ। फोन नभएकाले स्थानीय सरकारका कामदेखि प्रहरी चौकीमा समेत सूचना आदान-प्रदान गर्न मुस्किल भएको छ।
डडेल्धुरा जिल्ला भन्ने बित्तिकै सबैले धेरै विकास भएको जिल्लाका रुपमा बुझ्छन्। त्यहाँ सञ्चार क्षेत्र तथा टेलिफोन सेवा अझै पनि पुग्न नसकेको भन्दा धेरैलाई विश्वास नलाग्ला तर कुरा सत्य हो। डडेल्धुरामा परशुराम नगरपालिका स्थापना भएको तीन वर्ष बितिसक्दा पनि धेरै ठाउँमा फोन सेवा पुग्न सकेको छैन।
परशुराम नगरपालिका-७ मलासबासी पनि हालसम्म फोन सेवाबाट वञ्चित हुनुपरेको छ। कञ्चनपुर सीमा क्षेत्रमा रहेको मलासका स्थानीयबासीमा यस्तै समस्या रहेको छ। फोन गर्नेका लागि डाँडा चढ्नुपर्ने बाध्यता रहेको स्थानीयको भनाइ छ।
यस्तै डडेल्धुरा जिल्लाको अर्काे गाउँपालिका आलिताल गाउँपालिका-२ गाम्खेतमा पनि स्काइबाहेक कुनै फोेन नेटवर्क टिप्दैन। त्यो पनि बेलुकी ४ बजेपछि अवरुद्ध हुने गरेको आलिताल गाउँपालिका-२ का स्थानीय पदमबहादुर विकले बताए। यस्तै आलिताल गाउँपालिका-३ भित्रीसैनमा पनि कुनै पनि फोन सेवा सञ्चालन छैन।
उक्त क्षेत्रका बासिन्दाले फोन गर्नका लागि करिब १० किलोमिटर पैदल हिँडेर बजार क्षेत्रमा पुगेर मात्र फोन गर्ने गरेको स्थानीयबासीको भनाइ छ। यस्तै नवदुर्गा गाउँपालिका-४ मा पर्ने चलकट्टेमा स्मार्ट सेल कम्पनीका सेटको मात्र फोन सेवा सञ्चालनमा छ। स्मार्ट सेलका पनि कतिखेर नेटर्वक हुन्छ कतिखेर हुँदैन। यस्तो समस्या रहेको नवदुर्गा गाउँपालिका-४ का स्थानीयबासी गणेश कैनीले बताए।
यस्तै डडेल्धुरा जिल्लामा सातवटा स्थानीय तह रहेका भए पनि धेरै ठाउँमा राम्रोसँग फोन नेटवर्क नभएको हुँदा अमरगढी नगरपालिकाबाहेकका अन्य स्थानीय तहमा राम्रोसँग टेलिफोन नेटवर्क नहुँदा टेलिफोन सेवा अवरुद्ध हुँदै आएको छ।
अमरगढी नगरपालिकामै टेलिफोन छैन
डडेल्धुरा सदरमुकाम अमगरढी नगरपालिका डडेल्धुरासँग जोडिएका बजारलगायतका १९ वटा साविक गाविसका अन्य ठाउँका टेलिफोन लाइनसमेत १६ वर्ष बितिसक्दा पनि जोडिएको छैन। नेपाल टेलिकमले सुरक्षाको अवस्था देखाउँदै तत्कालीन माओवादीद्वारा द्वन्द्वकालीन अवस्थामा बन्द गरिएका मार्च र भिएचएफ टेलिफोन लाइन हालसम्म सञ्चालन नभएको स्थानीयबासीको भनाइ छ।
डडेल्धुरा जिल्लाको सदरमुकाममा रहेको अमरगढी नगरपालिकाका पोखरा बजार, अनारखोली बजार र आइतबजारमा सञ्चालनमा रहेका टेलिफोन लाइन हालसम्म सञ्चालनमा नरहेको नेपाल टेलिकम डडेल्धुरा शाखाले जनाएको छ।
विसं २०५८ सालमा द्वन्द्वकालीन अवस्थामा सुरक्षाको अवस्था देखाउँदै बन्द गरिएका टेलिफोन लाइन हालसम्म बन्द अवस्थामै छन्। नगरपालिकामा पहिले सदरमुकाममा टेलिफोन लाइन थियो र गाउँबाटै भए पनि जनता टेलिफोन सेवाको पहुँचमा थिए तर लामो समय बितिसक्दा पनि टेलिफोन लाइन नजोडिएको अमरगढी नगरपालिका-७ का स्थानीय कमल साहुले बताए।
अमरगढी नगरपालिका-७ पोखरा बजार र अनारखोली बजार क्षेत्रमा द्वन्द्वकालीन अवस्थामा बन्द गरिएको टेलिफोन लाइन सुचारु हुन नसकेको नेपाल टेलिकम डडेल्धुरा शाखाका निमित्त प्रमुख शिवराज बोहाले बताए। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
