काठमाडौं- १३औँ दक्षिण एसियाली खेलकुद (साग)अन्तर्गत महिला भलिबलको फाइनलमा नेपाल भारतसँग बेस्ट अफ फाइभमा पुगेर ३-२ले पराजित भयो। पहिलो सेट हारेको नेपालले त्यसपछिका दुई सेट लगातार जिते पनि पछिल्लो दुई सेट हार्न पुग्यो।
भलिबलको इतिहासमा पहिलोपटक नेपाली टिम साग खेलकुदको फाइनल खेलेको हो। सेमिफाइनलमा श्रीलंकालाई सोझो सेटमा हराएर नेपाली महिला टिमले ऐतिहासिक उपलब्धि पाएको थियो। फाइनलमा भारतलाई हराएर साग भलिबलमा पहिलो स्वर्णको इतिहास बनाउने अवसर भने चुकेको छ।
सेमिफाइनलमा श्रीलंकालाई हराएपछि नेपाली टिमकी कप्तान अरुण शाहीले फाइनलका लागि हौसला बढेको र दबाबबिना खेलेर स्वर्ण जित्ने आश रहेको बताएकी थिइन्। उनले भनेजस्तै खेल देखिए पनि स्वर्ण भने आउन सकेन। बाजागाजासहित घरेलु समर्थकको हौसला पाएको टिम फाइनलमा प्रतिस्पर्धात्मक खेल देखाउँदा देखाउँदै पनि अभागी सावित भयो। पाँचौँ सेटमा सम्हालिन नसक्दा नेपालले खेल गुमाउन पुग्यो।
यसअघि समूह चरणको खेलमा नेपाल भारतसँग नै सोझो सेटमा पराजित भएको थियो। पहिलो सेट प्रतिस्पर्धात्मक खेलेको नेपाल त्यसपछिको दुई सेटमा कमजोर बनेको थियो। समूह चरणमा नेपालले बंगलादेशलाई भने सोझो सेटमा हराएको थियो।
यसअघि साग खेलकुदमा महिला टिमले नै तीनपटक कास्य पदक जितेको थियो। महिला टिमले नै सन् १९९९, २००६, २०१६ को सागमा कास्य पदक जितेको थियो। त्यसैले फाइनलमा भारतसँग पराजित भए पनि नेपालको रजत पदक ऐतिहासिक उपलब्धि हो।
त्रिपुरेश्वरस्थित दशरथ रंगशालाको कभर्डहलमा भएको खेलमा पहिलो सेटको सुरुवात प्रतिस्पर्धात्मक रह्यो। नेपालले लगातर दुई अंक ल्याउँदा भारतले लगातार तीन अंक ल्यायो। नेपालले तेस्रो अंक ल्याएपछि पुनः भारतले लगातार तीन अंक जोड्यो। त्यसपछि नेपालले खेलमा फर्कंदै लगातर तीन अंक जोड्यो। ७ बराबरीको प्रतिस्पर्धात्मक अवस्थाबाट बढेको पहिलो सेटमा नेपालको केही रिसिभ बिग्रिन पुग्दा भारतले ५ अंकको बढोत्तरीलाई अझ बढाउँदै लग्यो। र पहिलो सेटमा नेपाल १७-२५ ले पराजित भयो।
पहिलो सेटमा तालमेल बिग्रिएको नेपालको दोस्रो सेटमा सुरुवातमा प्रतिभा मालिले दुई सर्भिस नै भारतको कोर्टमा गिराइदिइन्। सम्हालिएको खेल देखाउँदै ७ अंक हुँदासम्म ३ अंकको अग्रता बनाए पनि त्यसपछि लगातार दुई अंक गुमायो। ८ बराबरीमा पुगेको खेलमा भारतले पहिलोपटक अग्रता बनाएर ९-८ मा लग्यो। त्यसपछि नेपालले १२ मा पुगेर बराबरी गर्न सक्यो। र, १३-१२ मा नेपालले बनाएको अग्रता १४ बराबरीमा पुग्यो। १७-१६ मा अंग्रता बनाएको नेपाल पुनः १७ बराबरीमा पुग्यो।
रोमाञ्चक बनेको दोस्रो सेटमा नेपालले २१-१७ मा ४ अंकको अग्रता बनायो।
त्यसपछि भारतले एक अंक ल्यायो र नेपालकी कप्तान अरुणा र स्पाइकर प्रतिभा मालीको उत्कृष्ट तालमेलले नेपालले अर्को अंक जोढ्दै खेल २२-१८ मा लग्यो। त्यसपछि भारतले लगातार ३ अंक जोडेर खेल अझ रोमाञ्चक बनायो। महत्वपूर्ण अवस्थामा प्रतिभाको सर्भिस आउट जाँदा खेल २३-२२ मा पुग्यो। ४ अंकको अग्रता बनिसकेको सेटमा अंक गुम्दा नेपाल दबाबमा परे पनि सरस्वतीले खेल २४-२२ मा लगिन्। उनैको उत्कृष्ट स्पाइकमा नेपालले दोस्रो सेट २५-२३ ले जित्यो।
तेस्रो सेटमा नेपालको खेलको सुरुवात प्रतिस्पर्धात्मक नै रह्यो। सुरुदेखि पछि परे पनि ७ बराबरीमा पुगेको खेलमा नेपालले अग्रता बनाएर खेल ८-७ मा लग्यो। बराबरकै स्थितिमा बढिरहेको खेलमा १३ बराबरीपछि नेपालले २ अंकको अग्रता बनायो। १६ बराबरीबाट बढेको खेलमा भारतले लगातार तीन अंक ल्यायो। पुनः नेपालले १७ बराबरी बनाएको खेलमा एक अंक जोडेर अग्रता बनायो। त्यसमा लगातार थप ३ अंक ल्याएर अग्रता ३ अंकको बनायो। त्यसमा १ अंक भारतले लैजाँदा अर्को १ अंक नेपालले थपेर खेल २२-१८ मा पुग्यो। प्रतिभाको उत्कृष्ट दुई स्पाइकले खेल २४-१९ मा पुग्यो। त्यसमा भारतले लगातार २ अंक जोडेर खेल २४-२१ मा पुग्यो। सेट २५–२१ मा नेपालले जित्यो।
चौथो सेटमा पनि पछिल्लो दुई सेटमा जस्तै नेपालले प्रतिस्पर्धात्मक सुरुवात गर्दै बढ्यो। ५ बराबरीबाट बढेको खेल ८ बराबरी हुँदै नेपालले ९-८ को अग्रता बनायो। खेल पुनः १० बराबरीमा पुग्यो। १२-११ बनाउँदै अग्रता बनाएको भारतले खेल १३–११ बनायो। १३ बराबरीमा पुगेको खेलमा नेपाल १४-१७ ले पछि पर्यो।
भारतीय खेलाडीले सर्भिस मिस गर्दा अंक दुरी घटाएको नेपालले सरस्वती चौधरीको सर्भिस बिग्रँदा पुनः अंक गुमायो। २०-१७ ले पछि परेको नेपाल २२-१८ ले पछि हुन पुग्यो। चौथो सेट नेपालले २०-२५ ले हार्न पुग्यो।
बेस्ट अफ फाइभमा पुगेको अन्तिम १५ अंकको सेटमा नेपालले पहिलो ३ अंक नै गुमायो। त्यसपछि पनि नेपाल पाँचौँ सेटमा सम्हालिन सकेन। भारतले ५ अंक जोडिसक्दा नेपालको १ अंक मात्रै थियो। त्यसपछि लगातार दबाबमा राख्दै भारतले अन्तिम सेट १५-६ ले जित्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770527955.jpg)
-1764146706.png)
