नेपाल भर्सेस अफगानिस्तान
स्थान : बुलावायो एथलेटिक, बुलावायो, जिम्बावे
प्रतिस्पर्धा : एकदिवसीय विश्वकप छनोट, म्याच १६
मिति : फागुन २६ गते शनिबार, दिउँसो : १:१५ बजे
काठमाडौं– आइसिसी विश्वकप छनोट प्रतियोगिताअन्तर्गत शनिबार नेपाल र अफगानिस्तानबीच प्रतिस्पर्धा हुँदैछ। चार वर्षपछि एकदिवसीय खेलमा प्रतिस्पर्धा गर्न लागेका दुवै टिमका लागि खेल दबाबपूर्ण हुने पक्का छ।
किनकी यही वर्ष टेस्ट मान्यता प्राप्त अफगानिस्तानका लागि नेपाल विरुद्धको खेल प्रतिष्ठको लडाइँ मात्र हुनेछैन। नेपालविरुद्ध जित हात पारे अफगानिस्तानको सुपर सिक्समा पुग्ने झिनो आशा बाँकी रहन्छ।
अफगानिस्तान सुरुवाती ३ खेलमा पराजित भएको थियो। पहिलो खेलमा स्टकल्यान्डसँग पराजित भएको अफगानिस्तान जिम्बावेविरुद्ध पनि हार्यो। जिम्बावेविरुद्ध अफगानिस्तान केवल २ रनले पराजित भएको थियो।
तेस्रो खेलमा हङकङसँग पराजित हुनु अफगानिस्तानका लागि पीडदायी साबित भयो। हङकङसँग ३० रनले पराजित भएपछि कप्तान रसिद खानले खेलाडीले गैरजिम्वारीपन देखाएको आरोपसमेत लगाउन भ्याए। विश्वकप छनोट सुरु हुनुअघि जिम्बावे विरुद्धको सिरिज ४–१ ले जितेको अफगानिस्तान उच्च मनोबलमा थियो। लगत्तै युवा बलर रसिद खान एकदिवसीय वरीयताको नम्बर एक बलर बनेका थिए। तर कप्तान अस्घर स्टानिक्जाईले एपेन्डिक्सका कारण खेल गुमाए। त्यसपछि कप्तानको जिम्मेवारी रसिदले पाएका थिए। जिम्बावे विरुद्धको खेलमा अभद्र व्यवहार देखाएका विकेटकिपर ब्याट्सम्यान मोहमद शेहजाद पनि दुई खेलको प्रतिबन्धमा परे।
प्रतियोगितामा नेपालको सुरुवात पनि गतिलो हुन सकेको छैन। सुरुवाती दुई खेल गुमाइसकेको नेपालको सुपर सिक्समा पुग्ने आशा बने बाँकी नै छ। त्यसका लागि नेपालले शनिबार अफगानिस्तान र सोमबार हङकङलाई पराजित गर्नुपर्ने हुन्छ। नेपालका कप्तान पारस खड्काले पनि सुपर सिक्समा पुग्ने आशा बाँकी रहेको प्रतिक्रिया दिएका छन्।
नेपालका लागि दुवै खेल जित्नु कठिन चुनौती छ। किनकि नेपालले प्रतियोगितामा अपेक्षाकृत ब्याटिङ गर्न सकेको छैन। पहिलो खेलमा ३ सय ८१ रनको विशाल लक्ष्य पछ्याएको नेपाली ब्याट्सम्यानले खुलेर ब्याटिङ गरेका थिए। तर स्कटल्यान्डसँग भने नेपालका लागि कप्तान पारस खड्काबाहेक अन्य ब्याट्सम्यानले खराब ब्याटिङ गरे। ओपनिङको समस्या पनि नेपालको अर्को चुनौती हुनेछ। नेपाली स्पिनरले प्रतियोगितामा राम्रो खेल्नु नै नेपालको बलियो पक्ष हो।
अंक तालिका
मैदानको अवस्था
अफगानिस्तानले बुलावायो मैदानमा दुई खेल खेल्दा दुवै खेलमा हार बेहोरेको छ। यो मैदानमा नेपालले पहिलो पटक खेल्न लागेको हो। त्यसैले मैदानको बारेमा नेपालभन्दा अफगान टिम बढी जानकार छ। अफगानिस्तानविरुद्ध हङकङले २ सय ४१ र बनाएको थियो। जवाफमा अफगानिस्तानले १ सय ९ ५ रन मात्र बनाउन सक्यो। यस्तै अफगानिस्तानले स्कटल्यान्डविरुद्ध पहिले ब्याटिङ गरेर २ सय ५० रन कटाएको थियो। यो लक्ष्य स्कटल्यान्डले सहज रुपमा पछ्याएको थियो। शनिबार २९ सेन्टिग्रेड हुने अनुमान गरिएको छ।
प्लेयर्स टु वाच
पारस खड्का– नेपाल
स्कटल्यान्ड विरुद्धको खेलमा कप्तान पारस खड्काले 'लिस्ट ए' को खेलमा एक हजार रन पूरा गरेका थिए। सुरुवाती दुई खेलमा कप्तान पारसले नेपालको ब्याटिङ सम्हालिरहेका छन्। जिम्बावे विरुद्धको पहिलो खेलमा ४० रन बनाएक पारसले स्कटल्यान्डविरुद्ध ६३ रन बनाए। बलिङमा भने पारसले विकेट लिन सकेका छैनन्। कठिन परिस्थितिमा ब्याटिङलाई गति दिने पारसकै भरोसमा नेपाली टिम रहने गरेको छ। आइसिसी विश्व क्रिकेट लिग डिभिजन–२ शतकसहित सर्वाधिक रन प्रहार गरेका शनिबार पारस अफागानिस्तानका लागि पनि बाधक बन्न सक्छन्।
मोहम्मद नाबी– अफगानिस्तान
सुरुवाती ३ खेलमा अफगानिस्तान पराजित भए पनि मोहम्मद नाबीले अलराउन्ड प्रदर्शन गरिरहेका छन्। स्कटल्यान्डविरुद्ध नाबीले ९२ रन जोडेका थिए। जिम्बावेविरुद्ध उनले ५१ रन जोड्दा १ विकेट लिन सफल भए। हङकङविरुद्ध रनआउटको सिकार बन्नु उनका लागि दुर्भाग्यपूर्ण साबित भयो। उनी ३८ रनमा रनआउट भए। यद्यपि उनले बलिङतर्फ हङकङका ३ ब्याट्सम्यानलाई सिकार बनाएका थिए। टिमका अनुभवी खेलाडी नाबी पूर्व कप्तानसमेत हुन्। उनको उपस्थितिले टिममा आशाको सञ्चार हुने गरेको छ।
नेपाली टिम
पारस खड्का (कप्तान), ज्ञानेन्द्र मल्ल, शक्तिप्रसाद गौचन, बसन्त रेग्मी, शरद भेषावकर, सोमपाल कामी, करण केसी, आरिफ शेख, सन्दीप लामिछाने, दीपेन्द्रसिंह ऐरी, दिलीप नाथ, ललित भण्डारी, अनिलकुमार साह, रोहितकुमार पौडेल र ललितनारायण राजवंशी।
अफगानिस्तान टिम
रसिद खान (कप्तान), जाभेद अहमादी, इहसनुल्लाह जानत, नाजीबुल्लाह जार्डान, रहमात शाह, समिउल्लह शेनवारी, नासिर जमल, मोहम्मद नाबी, गुब्लादिन नइब, मुजिव उर रहमान, सराफुद्दिन असरफ, दाउलत जार्डान, सापूर जार्डान, अफ्सर जाजइ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
