काठमाडौं- साग खेलकुदको ११औँ संस्करणमा खेलेर सक्दा कराते खेलाडी अनु अधिकारीको अनुहारमा आँशुले भरिएको निराशा देखिन्थ्यो। ठूलो हारबाट गुज्रिएको पीडा महसुस गरेकी उनी अहिले खुलेर हाँसेकी छन्। नौ वर्षअघिको पीडा भुलाएर।
अहिले उनी गौरवान्वित हुँदै भन्छिन्, ‘राष्ट्रलाई स्वर्ण दिलाउँदा खुसीको सीमा छैन।’
अनु अधिकारीले सोमबार सातदोबाटोस्थित कराते हलमा भएको १३औं दक्षिण एसियाली खेलकुद (साग) प्रतियोगिताको करातेतर्फ कुमुते ५० केजी तौल समूहमा स्वर्ण जितिन्।
फाइनलमा उनले श्रीलंकाकी डन पाउलु बादल्गेलाई नकआउट नै गरिन्। निर्धारित समयभन्दा अघि नै ८–० को नतिजा सजिलै निकालिन्। अनुभन्दा अग्ली भए पनि चलाखीपूर्ण अनुले डन पाउलु लाई हराइन्।
त्यसो त उनले फाइनल अघि बंगलादेशकी फमिदा अख्त्तरलाई पनि नकआउट नै गरिन्। निर्धारित समय भन्दा २ मिनेट अघि नै खेल समाप्त गरेकी अनुको अनुहारमा खुसीको अनौठो उचाइ स्पष्ट देखिन्थ्यो।
उनी यतिधेरै खुसी हुनुको पछिको राज पुरानो हारसँगै जोडिएको छ। सन् २०१० मा बंगलादेशमा सम्पन्न ११औं साग खेलकुदमा उनले स्वर्ण नजिक पुगेर पनि हारेकी थिइन्। त्यसले उनमा एउटा इख बस्यो। त्यही इखले ९ वर्ष पछि स्वर्ण जित्न सकेको अहिले उनलाई नै लाग्छ।
‘११औं सागमा रजत पदकमा चिक्त बुझाएँ। तर यो पटक स्वर्ण पदक जितेर निकै खुसी छु। राष्ट्रको नाममा स्वर्ण पदक लेखाएँ’ उनले भनिन्।
तर प्रतिस्पर्धा गर्न मैदान जानुअघि नतिजा के हुने हो भन्दै डर लागेको उनी सुनाउँछिन्, ‘सय प्रतिशत दिन्छु भन्नेमा म विश्वस्त थिएँ तर यस्तो नतिजा निकाल्छु जस्तो लागेको थिएन। पहिलेको जुन गल्तिहरु गरेको थिएँ त्यो गल्ती फेरि गर्दिन भन्ने लागेको थियो।’
एउटा अनुभवि खेलाडीमा देखिएको आत्मविश्वास अनुमा देखिन्थ्यो। उनी नेपालका लागि निकै अनुभवि खेलाडी हुन्। त्यहि अनुभवले उनलाई विजयी बनायो।
‘बंगलादेश र श्रीलंका मेरो प्रतिस्पर्धीहरु निकै राम्रा नै थिए। श्रीलंकाको एकदमै राम्रो खेलाडी हो भनेर मलाई कोचहरुले सचेत गराउनु भएको थियो। त्यसैले निकै प्रतिस्पर्धात्मक हुन्छ होला भनेर सोचेको थिएँ। तर मैले नकआउट नै हानें।’
दंग कुसुम
साग खेलकुदमा स्वर्ण पदक विजेता कुसुम खड्का अनुजस्तै दंग छिन्। पहिलो पटक साग खेलकुदमा महिला ४५ केजी तौल समूह थप गरिएको हो। यहि तौल समूहमा स्वर्णको स्वाद चाखिन् कुसुमले।
कुसुम भन्छिन्, ‘राष्ट्रका लागि स्वर्ण जिताउन पाउँदा निकै खुसी लागिरहेको छ। जित्नै पर्छ भन्ने दबाब पनि थियो। जिते गर्व महसुस भइरहेको छ।’
कुसुमले फाइनलमा बंगलादेशकी मोन्जिरा बोर्नालाई ३–२ अंकले पराजित गर्दै स्वर्ण जितेकी हुन्। त्यो भन्दा अघि उनले श्रीलंकाकी आराचिगेलाई ७–६ अंकले पराजित गर्दै फाइनल पुगेकी थिइन्।
पहिलो पटक ठूलो अन्तर्राष्ट्रिय प्रतियोगिताको रिङमा जादै गर्दा मुटु कामेको भए पनि खेल्दै जाँदा उर्जा मिलेको कुसुमले सुनाइन्। ‘रिङमा जानुअघि मुटु ढुकढुक भएको थियो। जिन्दगीमा अवसर थोरै आउँछ। त्यसैले पनि म नर्भस थिएँ। अवसर गुमाउँदिन भन्ने हिम्मत थियो। त्यही हिम्मतले सफल भएँ।’
यता, ५५ केजी तौल समूहमा स्वर्ण जितेका लक्ष्मण तामाङ आफूले पाएको अवसर सदुपयोग गरेको बताउँछन्। ‘एकदमै गौरव महसुस भइरहेको छ। अन्तर्राष्ट्रिय एक्सपोजर निकै थोरै नै थियो। त्यसैले मलाई डर भने लागिरहेको थियो। जे पनि हुन सक्थ्यो। तर आज मैले सावित गरे। निकै खुसी छु,’ २५ वर्षीय लक्ष्मणले भने।
करातेको पहिलो दिन ९ स्वर्णका लागि प्रतिस्पर्धा हुँदा नेपालले ७ स्वर्ण र २ रजत पदक जित्न सफल भयो। त्यस्तै, २ स्वर्ण भने पाकिस्तानको पोल्टामा गयो।
पुरुष एकल कातातर्फ मन्डेकाजी श्रेष्ठले स्वर्ण पदक जित्दै नेपाललाई १३औं सागमा पहिलो स्वर्ण दिलाउने खेलाडी बने। त्यसो त, पुरुष टिम कातातर्फ पनि नेपालले श्रीलंकालाई पराजित गर्दै स्वर्ण चुम्यो। जहाँ टिम कातामा मन्डेकाजी श्रेष्ठ, महशुस तामाङ र प्रविण मानन्धर थिए।
त्यस्तै, महिला टिम कातामा पनि नेपालले पाकिस्तानलाई पराजित गर्दै स्वर्ण चुम्यो। महिला टिम कातामा सरु कार्की, निर्मला तामाङ र संगीता मगरले २४.८८ अंक ल्याउँदा पाकिस्तानका खेलाडीले २३.३ अंक ल्याए।
नेपालका लागि ८४ केजी तौल समूह माथि भएको स्पर्धामा विप्लवलाल श्रेष्ठले स्वर्ण जिते। उनले पाकिस्तानका मोहम्मद बजलाई ६–५ को अंकमा पराजित गर्दै स्वर्ण दिलाएका थिए।
स्टामिनाले चुक्यो दिवस
दिवस श्रेष्ठ नेपालका लागि स्वर्ण पदकको दाबेदार थिए। स्वर्ण पदक नै जित्छ भनेर खेलअघिसम्म अनुमान लगाइएको थियो।
८४ केजी चौल समूहमा भएको प्रतिस्पर्धामा बंगलादेशका मोहम्मद रमजनमाथि ६–१ को फराकिलो जितले पनि दिवसले स्वर्ण जित्ने आधारहरु बनेको थियो। तर उनी स्वर्ण नजिक पुगेर पनि चुके।
पाकिस्तानका अवाइस मोहम्मदसँग फाइनलमा दिवसको प्रतिस्पर्धा भइरहेको थियो। सुरुमै एक अंक बटुलेका दिवसले अन्ततः २–२ अंक बनाउँदा डिसक्वालिफाइ हुन पुगे। योसँगै पाकिस्तानका मोहम्मदले स्वर्ण जिते।
सागका लागि सुपरिवेक्षण प्रशिक्षकको जिम्मा पाएका दीपक श्रेष्ठ दिवसले स्वर्ण पदक जित्नबाट चुक्नुको मुख्य कारण स्टामिना नभएको बताए। उनले भने, ‘दिवस अनुभवि खेलाडी हो। स्वर्ण जित्छ भन्ने सबैको आश थियो। तर उनीमा फाइनलमा स्टामिनाको कमि देखियो। जितिसकेको स्वर्ण पनि यसै कारणले हार्यो।’
यता, एकल महिला कातातर्फ चञ्चला दनुवारले पनि रजत पदकमा चिक्त बुझाइन्। पाकिस्तानका खेलाडीसँग पराजित हुन पुगेकी चञ्चलाबाट पनि स्वर्णको अपेक्षा भने गरिएको थियो। प्रशिक्षक दिपक भन्छन्, ‘चञ्चलाले निकै उत्कृष्ट खेलिन् तर उनका प्रतिस्पर्धी नै निकै कडा थियो। त्यसैले हारिन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
