एजेन्सी– च्याम्पियन्स लिगमा गएराति भएको खेलमा म्यान्चेष्टर सिटी पराजित भएको छ। अन्तिम १६ अन्तर्गत दोस्रो लेगको खेलमा स्विस टोली एफसी बसेलबाट २–१ को हार बेहोरे पनि म्यान्चेस्टर सिटी क्वार्टरफाइनलमा प्रवेश गरेको छ।
बसेलको घरेलु मैदानमा भएको पहिलो लेगमा ४–० ले नतिजा आफ्नो पक्षमा पारेको सिटीले आफ्नै मैदान इतिहाद स्टेडियममा भने बसेललाई खेल सुम्पिएको हो। समग्रमा ५–२ को नतिजा निकाल्दै सिटीले अन्तिमा ८ मा प्रवेश पाएको छ।
सिटीले सन् २०१६ पछि घरेलु मैदानमा हार बेहोरेको यो पहिलो अवसर हो। बर्नान्डो सिल्भाको क्रसमा गाब्रियल जीससले ८ मिनेटमा गोल गर्दै सिटीलाई सुरुवाती अग्रता दिलाए। गोलीगाँठोको चोटबाट ग्रसित जीससको गत नोभेम्बर १८ पछि यो पहिलो गोल हो।
त्यसको मात्र ९ मिनेटपछि नै बसेलका मोहमेद इल्योनौसीले खेल बराबरीमा ल्याए। दोस्रो हाफको ७१ मिनेटमा मिचेल ल्याङले निर्णायक गोल गरेर बसेललाई जिताए। तर त्यो जित बसेलका लागि प्रतियोगिताको अन्तिम ८ मा पुग्नका लागि पर्याप्त बन्न सकेन।
सिटी च्याम्पियन्स लिग अर्थात युरोपियन लिगको क्वार्टरफाइनलमा प्रवेश गरेको यो दोस्रो पटक हो। यसअघि सन् २०१५÷०१६ सिजनमा उसले रियल मड्रिडलाई हराएर क्वार्टरफाइनलमा प्रवेश पाएको थियो।
सो हारसँगै सिटीले घरेलु मैदानमा लगातार १३ खेलमा निकालेको जितको यात्रामा बिराम लागेको छ। त्यस्तै इतिहाद स्टेडियममा सिटी पछिल्लो ३६ खेलपछि मात्रै पराजित भएको हो। उसले पछिल्ला २९ खेलमा जीत तथा ७ खेलमा बराबरी खेलेको छ।
च्याम्पियन्स लिगको पछिल्लो १६ खेलमा उसले लगातार हार बेहोर्दै आएको छ।
यसैबिच गएराति नै भएको अर्को खेलमा जुभेन्टसले इंग्लिस टोली टोटनह्याम हट्सपरलाई समग्रमा ४–३ गोल अन्तरले पराजित गर्दै क्वार्टरफाइनलमा प्रवेश पाएको हो। पहिलो लेग २–२ को बराबरीमा सकिएको भएपनि दोस्रो लेगमा भने हट्सपर जुभेन्टससँग २–१ ले पछि पर्यो।
वेम्ब्लीमा पहिलो हाफ सकिन ६ मिनेट बाँकि रहँदा टोटनह्यामका सोन हेयुङ मिनको गोलबाट सुरुवाती अग्रता लिएको टोटनह्यामले दोस्रो हाफमा २ गोल खाएको थियो।
३ मिनेटको अन्तरमा जुभेन्टसका गोन्जालो हिग्वुइन र पौलो डाइबालाले गोल गरेपछि जुभेन्टस पछिल्लो ४ मध्ये ३ सिजनमा च्याम्पियन्स लिगको अन्तिम ८ मा पुगेको हो। पछिल्लो ५ भेटमा पहिलो पटक इंग्लिस टोलीलाई हराएर जुभेन्टस क्वार्टरफाइनलमा पुगेको यो पहिलो अवसर हो।
सिटी र जुभेन्टससँगै च्याम्पियन्स लिगमा प्रवेश गर्ने ४ टोलीको टुंगो लागेको छ। हालसम्म म्यानचेस्टर सिटी, लिभरपुल, रियल मड्रिड तथा जुभेन्टसले क्वार्टरफाइनलमा आफ्नो स्थान पक्का गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
