काठमाडौं– आइसिसी एकदिवसीय विश्वकप छनोटको सुरुवाती दुई खेलमा जित निकाल्दै समूह 'बी' को शीर्ष स्थानमा रहेको स्कटल्यान्डसँग नेपालले बिहीबार प्रतिस्पर्धा गर्दैछ।
गत संस्करणको छनोटको विजेता स्कटल्यान्डले पहिलो खेलमा सानदार जित निकाल्यो। पछिल्लो समय उत्कृष्ट फर्ममा रहेको अफगानिस्तानमाथि ७ विकेटको जित निकालेको स्कटल्यान्डले पहिलो दिन आफु बलियो भएको सन्देश दिएको थियो। दोस्रो खेलमा पनि हङकङसँग स्कटल्यान्डको फर्म उस्तै देखियो। पहिले ब्याटिङ गरेको हङकङलाई स्कटल्यान्डले ९१ रनमै अलआउट गरेको थियो। यद्यपी झिनो लक्ष्य भएपनि स्कटल्यान्डले ६ विकेट गुमाएर पार गरेको थियो।
अफगानिस्तान विरुद्धको खेलमा नटआउट १ सय ५७ रन प्रहार गरेका कोलुम म्याकलियोर्ड स्कटल्यान्डका भरपर्दा ब्याट्सम्यान हुन्। यस्तै हङकङ विरुद्ध टम सोल र एलास्डयर इभान्सले उत्कृष्ट बलिङ गरे। ४ विकेट लिन १५ रन मात्र खर्चिएका सोल खेलको म्यान अफ दि म्याच बनेका थिए। पहिलो खेलमा चुकेका कोइटर पनि स्कटल्यान्डको ब्याटिङ लाइनअपका खम्बा हुन्। यी खेलाडीले नेपालका लागि बाधक बन्न सक्छन्।
अर्को तर्फ स्कटल्यान्डले सुरुवातै दुवै खेल सहज रुपमा जितेको थियो। ब्याटिङतर्फ मध्यक्रम राम्रोसँग चल्नु र दुवै खेलमा फरकफरक बलर चम्कनु स्कटल्यान्डको बलियो पक्ष हो।
पहिलो खेलमा जिम्बावेसँग १ सय १६ रनले पराजित भएको नेपालले चार दिन आराम गरेपछि दोस्रो खेल खेल्दैछ। पहिलो खेलमै टेस्ट मान्यता प्राप्त टिमसँग प्रतिस्पर्धा गरेको नेपालको बलिङ अपेक्षाकृत हुन सकेन। तर ब्याटिङमा भने नेपालले सुदृढ प्रदर्शन गर्यो। खेलमा आरिफ शेख र सरद भेषावकरले अर्धशत प्रहार गरेका थिए।
नेपालका प्रशिक्षक जगट टमाटा पनि पहिलो खेलबाट अनुभव प्राप्त गरेकाले दोस्रो खेलमा दबाबरहित खेल्नेमा विश्वस्त छन्। उनले दोस्रो खेलमा जितका लागि खेल्ने जिम्बावेबाट नेपाल लाइभलाई बताए।
आइसिसीले नेपाललाई ठूलो टिम विरुद्ध कसरी जित निकाल्ने थाहा भएको विश्लेषण गरेको छ। आइसिसीको विश्लेषणको आधारमा पहिलो दुई खेलमा सानदार जित निकालेको स्टकल्यान्डलाई नेपालले पराजित गरे त्यो सामान्य हुनेछ।
मैदानको अवस्था
बुलावायो मैदानमा जिम्बावेले पहिलो खेलमा ३ सय ८० रन बनाएको थियो। यही मैदानमा जिम्बावेले १ सय ९७ रनको लक्ष्य पछ्याएको अफगानिस्तानलाई रोक्न सफल भयो। त्यसैले पीचको अवस्थाको पूर्वानुमान गर्न कठिन छ। तर दुवै खेलमा स्पिनरले राम्रो प्रदर्शन गरेका छन्। नेपाल र स्कटल्यान्डबीचको खेलमा पनि स्पिनरले राम्रो प्रदर्शन गर्न सक्नेछन्।
प्लेयर्स टु वाच
कोलुम म्याकलियोर्ड – स्कटल्यान्ड
स्कटल्यान्डका मध्यक्रमका ब्याट्सम्यान कोलुम म्याकलियोर्डले अफगानिस्तान विरुद्धको खेलमा सानदार शतक प्रहार गरेका थिए। उनले १ सय ४६ बल खेलेर नटआउट १ सय ५७ रन जोडेपछि स्कटल्यान्डले अफगानिस्तानमाथि सहज जित हात पारेको थियो। खेलमा उनले २३ चौका र १ छक्का प्रहार गरेका थिए। एकदिवसीय खेलका नम्बर एक बलर रसिद खानमाथि लगातार हाबी देखिएका २९ वर्षीय कोलुमले ५१ एकदिवसीय खेल खेलिसकेका छन्। जसमा उनले ६ शतक र ५ अर्धशतक प्रहार गरेका छन्। ३५ को औसत भएका कोलुमको स्ट्राइक रेट ८१.२५ छ।
सन्दीप लामिछाने – नेपाल
१७ वर्षीय सन्दीप लामिछानेलाई आइसिसीले विश्वकप छनोटको हेर्न लायक १० स्टार खेलाडीमा राखेको थियो। आइपिएल र सिपिएलमा छनोट हुँदै पछिल्लो एक महिना विश्व क्रिकेटमा तहल्का मच्चाएका सन्दीपको स्पिन आक्रमण जिम्बावेमा प्रभावकारी बन्ने आशा गरिएको छ। दुई साताअघि नामिबियामा भएको आइसिसी विश्व क्रिकेट लिग डिभिजन–२ मा १७ विकेट लिएका सन्दीप म्याच अफ दि सिरिज बनेका थिए। दुई वर्षअघि नेपाली टिममा डेब्यु गरेका सन्दीपले लिस्ट 'ए' का १६ खेल खेल्दै ३० विकेट लिइसकेका छन्।
हेड टु हेड
स्कटल्यान्ड र नेपालबीच एकदिवसीय खेलमा पछिल्लो चार वर्षमा तीन पटक प्रतिस्पर्धा भएको छ। पछिल्ला तीन वटै खेलमा नेपालले पराजय भोगेको छ।
सन् २०१४ को विश्वकप छनोटमा स्कटल्यान्डले नेपाललाई ९० रनको फराकिलो अन्तरले पराजित गरेको थियो। न्युजिल्यान्डको क्विन्सटाउनमा भएको खेलमा पहिले ब्याटिङ गरेको स्टकल्यान्डले ७ विकेटको क्षतिमा २ सय ४९ रन जोडेको थियो। २ सय ५० रनको लक्ष्य पछ्याएको नेपालले १ सय ५९ रन मात्र बनाउन सक्यो। नेपालका लागि ज्ञानेन्द्र मल्लले सर्वाधिक ३४ रन बटुलेका थिए।
सन् २०१५ मा आइसिसी विश्व क्रिकेट लिग च्याम्पियनसिपअन्तर्गत नेपाल र स्कटल्यान्डबीच पहिलो चरणमा दुई खेल भएका थिए। स्कटल्यान्डमा भएको दुवै खेलमा नेपाल पराजित भयो। पहिलो खेलमा स्कटल्यान्डले नेपालमाथि ३ रनको झिनो अन्तरको जित निकाल्यो। ३६ ओभरमा झारिएको खेलमा पहिले ब्याटिङ गरेको स्कटल्यान्डले २ सय ३५ रन जोडेको थियो। जवाफमा नेपालले ५ विकेटको क्षतिमा २ सय ३२ रन मात्र जोड्न सक्यो। खेलमा नेपालका ओपनर अनिल मण्डलले शतक र कप्तान पारस खड्काले ७० रन जोडेपनि जितका लागि पर्याप्त हुन सकेन।
दोस्रो खेलमा नेपाल ९ विकेटले पराजि भयो। पहिले ब्याटिङ गरेको नेपाल १ सय ६७ रनमा अलआउट भयो। खेलमा नेपालका लागि शरद भेषावकले सवैभन्दा बढी ३० रन जोडेका थिए। वर्षाले प्रभावित खेलमा स्कटल्यान्डका लागि १ सय ११ रनको लक्ष्य दिएको थियो। जुन लक्ष्य स्कटल्यान्डले १ विकेटको क्षतिमा पार गरेको थियो।
नेपाली टिम
पारस खड्का (कप्तान), ज्ञानेन्द्र मल्ल, शक्तिप्रसाद गौचन, बसन्त रेग्मी, शरद भेषावकर, सोमपाल कामी, करण केसी, आरिफ शेख, सन्दीप लामिछाने, दीपेन्द्रसिंह ऐरी, दिलीप नाथ, ललित भण्डारी, अनिलकुमार साह, रोहितकुमार पौडेल र ललितनारायण राजवंशी।
स्कटल्यान्ड टिम
केल कोइट्जर, रिची बेरिङटन, माथ्यु क्रस, एलास्डयर इभान्स, मिचेल जोन्स, मिचेल लेइस्क, कोलुम म्याकलियोर्ड, जर्ज मुन्सी, साफयान शरिफ, क्रिस सोल, टम सोल, क्रिस वालन्स, मार्क वाट, ब्राड ह्विल, स्टुवार्ड हिटिङघम।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1776414047.png)
-1764146706.png)
