काठमाडौं– आइसिसी एकदिवसीय विश्वकप अन्तर्गत नेपालले बिहीबार स्कटल्यान्डसँग प्रतिस्पर्धा गर्दैछ।
पहिलो खेलमा बलियो मानिएको अफगानिस्तानलाई ७ विकेटको फराकिलो अन्तरले पराजित गरेको स्टकल्यान्डले नेपालसँग खेल्नुअघि मंगलबार हङकङसँग प्रतिस्पर्धा गर्नेछ। बिहीबार नेपालका लागि दोस्रो तथा स्कटल्यान्डका लागि तेस्रो खेल हुनेछ। यसअघि नेपाल पहिलो खेलमा आयोजन जिम्बावेसँग १ सय १६ रनले पराजित भएको थियो।
जिम्बावेसँग स्वभाविक हार बेहोरेको नेपालले सुपरसिक्समा पुग्न स्कटल्यान्डलाई पराजित गर्नु पर्ने अवस्था छ। जितका लागि नेपालले स्कटल्यान्डका उच्च फर्ममा रहकेा खेलाडी रोक्नु पर्नेछ। किनकी बलियो अफगानिस्तान विरुद्ध उत्कृष्ट प्रदर्शन गरेका खेलाडीमाथि हाबी हुने नसके नेपाललाई गाह्रो हुने पक्का छ। टिममा सबै खेलाडीको उतिकै भूमिका रहेने भएपनि फर्ममा रहेका स्कटल्यान्डका ३ खेलाडी नेपालले रोक्नु पर्ने देखिन्छ।
कोलुम म्याकलियोर्ड – ब्याट्सम्यान
स्कटल्यान्डका मध्यक्रमका ब्याट्सम्यान कोलुम म्याकलियोर्डले अफगानिस्तान विरुद्धको खेलमा सानदार शतक प्रहार गरेका थिए। उनले १ सय ४६ बल खेलेर नटआउट १ सय ५७ रन जोडेपछि स्कटल्यान्डले अफगानिस्तानमाथि सहज जित हात पारेको थियो। खेलमा उनले २३ चौका र १ छक्का प्रहार गरेका थिए। एकदिवसीय खेलका नम्बर एक बलर रसिद खानमाथि लगातार हाबी देखिएका २९ वर्षीय कोलुमले ५१ एकदिवसीय खेल खेलिसकेका छन्। जसमा उनले ६ शतक र ५ अर्धशतक प्रहार गरेका छन्। ३५ को औसत भएका कोलुमको स्ट्राइक रेट ८१.२५ छ।
रिची बेरिङटन– अलराउन्डर
पहिलो खेलमा अफगानिस्तानलाई पराजित गर्ने क्रममा ३० वर्षीय बेरिङटनको प्रदर्शन महत्वपूर्ण रह्यो। बलिङमा अफगानिस्तानको सुरुवाती चार मध्ये ३ ब्याट्सम्यानलाई सिकार बनाएका उनले ब्याटिङमा तर्फ पनि उत्कृष्ट प्रदर्शन गरे। उनले ६७ रनको योगदान दिए। अफगानिस्तान विरुद्धको खेलमा उनले म्याकलियोर्डसँग तेस्रो विकेटका लागि २ सय ८ रनको सानदार साझेदारी गरेका थिए। दक्षिण अफ्रिकामा जन्मिएका उनले अहिलेसम्म ६४ एकदिवसीय खेल खेल्दै १ शतक र ११ अर्धशतक प्रहार गरेका छन्। तीव्र गतिका बलिर उनले एकदिववसीय खेलमा ४१ इनिङमा २८ विकेट लिएका छन्।
ब्राड ह्विल– बलर
तीव्र गतिका युवा बलर ब्राड ह्विलले अफगानिस्तान विरुद्धको खेलमा ३ विकेट लिए। अफगानिस्तान विरुद्ध पहिलो ओभरमा विकेट लिएका २१ वर्षीय ब्राडले ३ मध्ये २ ब्याट्सम्यानलाई क्लिन बोल्ड गरेका थिए। अफगानिस्तान विरुद्धको खेलमा सबैभन्दा कम इकोनोमीमा बलिङ गरेका उनले ९.४ ओभरमा ३६ रन खर्चिएका थिए। उनको बलमा अफगानिस्तानका खेलाडीले २ चौका र १ छक्का प्रहार गर्दा ३८ बल डट खेलेका थिए। २ वर्षअघि राष्ट्रिय टिममा डेब्यू गरेका ब्राडले ६ एकदिवसीय खेल खेल्दै १० विकेट लिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
