प्योङयाङ– उत्तर कोरियाली नेता किम जोङ उनले कोरियाली प्रायद्धिपको राष्ट्रिय एकीकरणमा नयाँ इतिहास लेख्न चाहेको बताएका छन्।
दक्षिण कोरियाली राष्ट्रपति मुन जाइ इनको विशेष दुतको रुपमा उत्तर पुगेको टोलीसँग भेट गर्दै नेता उनले दुई कोरियाबीचको निकट सम्बन्धलाई नयाँ उचाइमा पुर्याउन चाहेको बताएका उत्तर कोरियाली सरकारी समाचार एजेन्सी केसिएनएले जनाएको छ।
नेता उनले दक्षिणको टोलीका लागि स्थानीय समयानुसार साँझ ६ बजे विशेष रात्रीभोजको समेत आयोजना गरेका थिए।
सन् २०११ मा शक्तिमा आएपछि नेता उनले दक्षिणका उच्च अधिकारीसँग भेटेको यो पहिलो अवसर हो।
यसअघि शीतकालीन ओलम्पिकको उद्घाटन सत्रमा उत्तर कोरियाको विशेष प्रतिनिधि मन्डल दक्षिण पुगेको थियो। प्योङचाङमा गत फेब्रुअरीको ९–२५ मा सम्पन्न शीतकालीन ओलम्पिकमा उत्तरले सहभागिता जनाएपछि दुई कोरियाबिचको सम्बन्धमा सुधार आएको छ।
दक्षिण कोरियाली राष्ट्रपतिका प्रमुख सुरक्षा सल्लाहकार चुङ इवुइ योङको नेतृत्वमा रहेको टोलीमा ५ जना उच्च सरकारी अधिकारी तथा ५ जना सहयोगी कर्मचारी रहेको बताइएको छ।
सो टोलीमा योङका अलावा दक्षिया कोरियाको राष्ट्रिय गुप्तचर सेवा(एनआइएस)का निर्देशक सुह हुन, सहायक एकता मन्त्री चुङ हेइ सुङ, एनआइएसका दोस्रो कार्यकारी निर्देशक तथा राष्ट्रपति कार्यालय ब्लु हावसका उच्च अधिकारी युन कुन योङ सम्मिलित छन्।
नेता उनसँगकाे भेटअघि पत्रकारहरुसँग कुरा गर्दै सहायक एकता मन्त्री सुङले वार्ता र दुई कोरियाबीचको सम्बन्धलाई सुदृढ गर्न तथा कोरियाली प्रायद्धिपमा शान्ति कायम राख्न राष्ट्रपति इनले प्रेषित गरेको सन्देशलाई नेता उनसमक्ष पुर्याउने बताएका थिए।
भेटपश्चात् दक्षिण कोरियाली टोलीले नेता उनले आफुहरुलाई न्यानो स्वागत गरेका र दिल खोलेर कुराकानी गरेका बताए।
भेटका बारेमा केसिएनएले लेखेको छ–‘दुई कोरियाली प्रमुखबीचको भेटवार्ताका लागि दक्षिणका राष्ट्रपतिले राखेको चाहनालाई नेता उनले सुरुवातमा सुनेका थिए। त्यसपश्चात् दक्षिणको विशेष दुतको टोलीसँग आफ्ना धारणा साटासाट गर्दै नेता उनले एक विश्वासिलो सम्झौता गरेका छन्।’
नेता उनले दुई प्रमुख नेताको भेटवार्ताका लागि आवश्यक पर्ने प्रयोगात्मक कदमहरु चाल्ने विषयमा सम्बन्धित क्षेत्रका अधिकारीलाई महत्वपूर्ण सुझावहरु दिएका थिए।
यसअघि उत्तर कोरियास्थित सुनान आन्तराष्ट्रिय विमानस्थलमा सोमबार दिउसो २ः५० मा उत्रिएको दक्षिणको टोलीले सत्तारुढ वोर्कर्स् पार्टीको केन्द्रिय कमिटिमा उपाध्यक्ष किम योङ चोलसहितको टोलीसँग भेटवार्ता गरेको थियो।
सो क्रममा प्योङयाङमा २ दिन रहँदा दक्षिण कोरियी टोलीको भ्रमण तालिका, नेता उनसँग राष्ट्रपति कार्यालय ब्लु हाउसमा हुने भेटवार्ता र रात्रिभोजका बारेमा छलफल भएको थियो।
दुई दिन प्योङयाङमा रहँदा दक्षिण कोरियाली राष्ट्रपतिको विशेष दुतका रुपमा गएको टोलीले उत्तर कोरियाली आणविक कार्यक्रमलाई रोक्न आवश्यक रहेको त्रिपक्षिय वार्ताका लागि अवस्था तयार गर्ने तथा प्योङयाङ र अमेरिकाबीचको कुराकानीलाई पुनः सुचारु गर्न पहल गर्ने बताइएको छ।
उता अमेरिकाले भने दुई कोरियाबीचमा भएको सम्बन्ध सुधारबाट केहि हदसम्म आशावादी भएको बताएको छ। तर उत्तरले आफ्नो आणविक कार्यक्रमलाई नरोकेसम्म प्योङयाङसँग औपचारिक वार्ता भने गर्न नहुने स्पष्ट पारेको छ।
अमेरिकाको सो प्रस्तावलाई भने उत्तर कोरियाले अस्विकार गर्दै आएको छ।
उत्तर कोरियाको भ्रमणका सम्बन्धमा चुङ र सुहले आगामि साता वासिंगटनका सरकारी अधिकारीलाई जानकारी गराउने बताइएको छ।
ओलम्पिकअघि अमेरिका र उत्तर कोरियाबीचमा भएका कडा किसिमका वक्तव्यबाजीहरुले कोरियाली प्रायद्धिपमा संकटको स्थिती सिर्जना हुने खतरा पैदा भएको थियो।
तर दुई कोरियाबिचमा २ वर्षपछि भएको उच्च स्तरको वार्ताले शीतकालीन ओलम्पिकमा संयुक्त झन्डामुनि मार्चपास गर्ने निर्णय गरेको थियो।
(एजेन्सीको सहयोगमा)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
