बर्मिङ्घम– बेलायतकी क्याट्रिना जोनसन थोम्पसनले वल्र्ड इन्डोर एथलेटिक्स च्याम्पियनसिपमा आफ्नो जीवनकै पहिलो विश्वस्तरको स्वर्ण पदक जितेकी छन्। एरिना बर्मिङ्घममा भएको पेन्टाथ्लोन खेलमा उनले स्वर्ण हात पारेकी हुन्। पेन्टाथ्लोन हरेक प्रतिस्पर्धीका लागि ५ वटा खेल समावेश भएको इभेन्ट हो।
शुक्रबार बिहान भएका अन्य २ स्पर्धामा समेत उनले उत्कृष्ट खेल प्रदर्शन गरेकी थिइन्। लङजम्पमा उनले ६.५० मिटरको दुरी उफ्रिएकी थिइन्। २५ वर्षीय थोम्पसनले अष्ट्रियाकी इभोना डाडिकभन्दा २ सेकेन्ड कम समयमा दौड पुरा गर्दै ८ सय मिटर दौडको अन्तिम स्पर्धामा पहिलाे भइन्।
खेलका क्रममा सहज र निर्धक्क देखिएकी थोम्पसनले उत्कृष्ट सुरुवातलाई जीतमा बदलेकी थिइन्।
‘मलाई विश्वास नै लागेको छैन।’, उनले भनिन्,‘मैले यसका लागि लामो समयदेखि सपना देख्दै आएकी थिएँ। यो अस्थिर दिन थियो। तथापि मैले अवसर पाएँ निकै खुशी लागेको छ।’
‘लिभरपुलकी शिकारी कुकुर’को उपनाम पाएकी थोम्पसनले ३ सय मिटरबाट ८ सय मिटरसम्मको दुरीमा पहिलो स्थानमा रहँदै दौड पार गरे पनि अन्तिम ल्यापमा भने उनलाई डाडिकले कडा चुनौती दिएकी थिइन्।
उनले निर्धारित ८ सय मिटरको दुरी २ मिनेट १६ दशमलब ६३ सेकेन्डमा पुरा गरिन्। सो स्पर्धापछि समग्रमा थोम्पसनले ४ हजार ७ सय ५० अंक प्राप्त गरिन्। थोम्पसनभन्दा मात्र ५० अंक कम जोडेकी डाडिक दोस्रो स्थानमा रहिन्। क्युवाकी योर्गेलिस रोड्रगुइज ४ हजार ६ सय ३७ अंकका साथ तेस्रो स्थानमा रहन सफल भइन्।
सन् २०१५ मा युरोपियन इन्डोर पेन्टाथ्लोनको उपाधी हात पारेपछि थोम्पसन सबै प्रतिस्पर्धामा कमजोर देखिदै आएकी थिइन्। उनले सोहि वर्ष भएको आउटडोर वल्र्ड च्याम्पियनसिपमा लङ जम्पतर्फ ३ वटा ‘फल’ गरेपछि २८औँ स्थानमा चित्त बुझाएकी थिइन्। सन् २०१६ को ओलम्पिकमा उनले छैटौँ स्थानमा आफुलाई उभ्याउँदा गत वर्ष लन्डनमा भएको वल्र्ड च्याम्पियनसिपमा पाचौँ भएकी थिइन्।
उता पुरुषतर्फको लङजम्पमा भने क्युवाका १९ वर्षीय जुवान मिग्वोइलले ८.४६ मिटरको दुरी उफ्रिदैँ स्वर्ण जिते। उनले यसअघिका वल्र्ड च्याम्पियन लुभो मानयोन्गा(८.४४ मिटर)लाई पछि पारेका हुन्। अमेरिकी एथलेट माक्र्वीस डेन्डीले ८.४२ मिटर टाढा उफ्रिदैँ कास्य पदक हात पारे।
बिहिबारदेखि इंग्ल्यान्डमा सुरु भएको प्रतियोगिता भोलिसम्म चल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
