राजविराज– कुनैवेला शिक्षामा निकै राम्रो मानिने सप्तरी जिल्ला अहिले पछाडि पर्दै गएको छ। अध्ययन-अध्यापनको सट्टा चिट चोर्ने/चोराउने प्रवृत्तिले जिल्लाको शैक्षिक अवस्था दिनप्रतिदिन खस्कदो छ।
चिट प्रवृत्ति यति मौलायो कि, सांसद तथा मन्त्रीहरू समेत मुख खोलेर भन्न थालेका छन्, ‘अब चिट प्रवृत्तिको अन्त्य गर्नुपर्छ।’ गत बैशाख १५ गते सप्तरीको राजविराजस्थित गजेन्द्रनारायण सिंह सगरमाथा अस्पताल हाताभित्र ‘रामराजा प्रसाद सिंह स्वास्थ्य विज्ञान प्रतिष्ठान नर्सिङ कलेज’ भवनको शिलान्यास गर्न आएका उपप्रधान एमव् स्वास्थ्यमन्त्री उपेन्द्र यादवले भनेका थिए, ‘अब चिट चोराउने मास्टरको पनि काम छैन।’
गुणस्तरिय शिक्षा नभएको जनशक्तिले कुनै उपलब्धि हाँसिल गर्न नसक्ने भन्दै वर्षभरि पढाएर पनि चिट चोराएर विद्यार्थी पास गराउनु पर्ने अवस्थाको अन्त्य गर्न उनले आग्रह गरेका थिए। तर, सप्तरीको शैक्षिक अवस्थामा भने अहिले पनि खासै सुधार देखिएको छैन।
शिक्षक, कर्मचारी तथा विद्यालय व्यवस्थापन समितिका पदाधिकारी नै शिक्षाको गुणस्तर सुधारमा जिम्मेवार देखिँदैनन्। विद्यार्थी र अभिभावकले समेत खासै चासो राख्दैनन्। जिल्लामै नमूनाकाे पहिचान बनाएको सदरमुकाम राजविराज स्थित एक माद्यमीक विद्यालय अहिले यसको उदाहरण बनेको छ।
पठनपाठन बन्द गरी कवड्डी
सप्तरीमा आधारभुत, माध्यमिक विद्यालय तथा मदर्सासहित करिब ४१५ विद्यालय छन्। सबै विद्यालय संचालनमा छन्, तर राजविराज– १६, वोरियास्थित नरेन्द्र मेमोरियल माविको पठन–पाठन यतिवेला बन्द छ। स्थानीय लक्ष्मी युवा क्लबले कवड्डी प्रतियोगिता संचालन गर्न थालेपछि कार्तिक २६ गतेदेखि मंसिर २ गतेसम्मका लागि विद्यालय बन्द गरिएको हाे।
क्लबले प्रतियोगिता संचालनका लागि लेखेको पत्रको वोधार्थ शिक्षा विकास तथा समन्वय इकाइ र राजविराज नगरपालिकामा पनि पठाइएको छ। तर, ति दुवै निकायले पनि पठन–पाठन बन्द गर्न नहुने विषयमा प्रतिक्रिया जनाएनन्।
(1).jpg)
प्रतियोगिताका कारण करिब १ हजार ८ सय बालबालिकाकाे पठन–पाठन प्रभावित छ। मंसिर महिनामै संचालन हुने अर्धवार्षिक परीक्षा तयारीमा जुट्नुपर्ने समयमा विद्यालयको पठन–पाठन अवरुद्ध पारेको भन्दै केहि अभिभावकले असन्तुष्टि व्यक्त गरेका छन्।
पठन-पाठन प्रभावित छैनः प्रअ
विद्यालयका प्रधानाध्यापक खिलानाथ गौतमले विद्यालयको पठन–पाठनमा कुनै बाधा नपरेको दाबी गर्छन्। प्रतिगोगिता संचालन भएको दिनको पठन–पाठन बिदा भएको दिनमा सारेर शैक्षिक क्यालेन्डर अनुसार पूर्ति गरिएको उनले दाबी छ।
‘प्रदेशस्तरिय भएकाले शिक्षा विकास तथा समन्वय इकाइ र राजविराज नगरपालिकाकै समन्वयमा प्रतियोगिता संचालन हुँदैछ’–गौतमले भने।
मुख्य जिम्मेवार विद्यालय र पालिका होः इकाइ प्रमुख
शिक्षा विकास तथा समन्वय इकाइ सप्तरीका प्रमुख फणिन्द्र खत्रीले स्थानीय सरकारको अनुमति लिएर विद्यार्थीको पढाइ र समयलाई ख्याल गरी त्यस्ता प्रतियोगिता संचालन गर्नुपर्ने बताए। ‘मुख्य जिम्मेवार भनेको विद्यालय र पालिका हो। हामीले त समन्वय गर्ने मात्रै हो’ उनले भने, ‘त्यो सबै गरे/नगरेको विषमा धेरै जानकारी भएन।’
जानकारी छैनः नगरपालिका
राजविराज नगरपालिकाका मेयर शम्भुप्रसाद यादवले विद्यालयको पठन–पाठन बन्द गरेर कवड्डी प्रतियोगिता संचालन भएको विषयमा जानकारी नभएको बताए। उनले भने ‘व्यक्तिगत रुपमा मसँग समन्वय छैन, कार्यालयलाई जानकारी हुनसक्छ।’ सूचना अधिकारी मनोजकुमार यादवले पनि सो विषयमा कार्यालयमा कुनै पत्राचार नभएको प्रतिक्रिया दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
