काठमाडौं- प्रा डा गोविन्द केसीको मागमा समर्थन जनाउँदै टिचिङ अस्पतालका विद्यार्थीहरु आन्दोलनमा उत्रिएका छन्। डा. केसीले टिचिङ अस्पतालबाट अवकास प्राप्त गरिसकेको अवस्थामा त्यहाँका विद्यार्थी र आवासीय चिकित्सकहरूले समर्थन गर्दैनन् कि भन्ने संशयबीच उनीहरूले डा. केसीको आन्दोलनमा ऐक्यबद्धता जनाएका हुन्। उनीहरूले चरणबद्ध आन्दोलनका कार्यक्रमसमेत घोषणा गरेका छन्।
डडेल्धुरा पुगेर १७औं सत्याग्रहमा रहेका केसीको स्वास्थ्य अवस्था जटिल बन्दै गएपछि डा केसीको जीवनरक्षाको माग विद्यार्थीहरुले गरेका छन्।
डा केसीका मागमा समर्थन जनाउँदै उनीहरूले सोमबार साँझ त्रिवि शिक्षण अस्पताल परिसरमा बलेका मैनबत्तीले 'सेभ जिकेसी' लेखेका थिए। डा केसीको स्वास्थ्य अवस्थाप्रति सरकार संवेदनशील नभएको भन्दै विद्यार्थीहरु आक्रोशित देखिन्थे। डा केसीका मागमा सरकारले धोका दिँदै 'मरे मरोस्' भन्ने शैली अपनाएको उनीहरुको आरोप छ।
डा. केसीले सेवामा रहँदा अस्पतालमा पुर्याएको योगदानको स्मरण समेत उनीहरूले गरेका थिए।
'जब डा. केसी यहाँ हुनुहुन्थ्यो, तब उहाँले दिनरात नभनी बिरामी जाँच्नुभयो, हामीलाई अर्थोपेडिक्सको कखरा चिनाउनु भयो,' नेपाल मेडिकल स्टुडेन्ट सोसाइटिका अध्यक्ष डा. शक्ति चौरासियाले भने, 'त्यतिमात्र हाम्रो संस्थालाई राजनैतिक भागबन्डाले थङथिलो बनाएको थियो। त्यस्तो अवस्थामा डा केसीले ज्यानको बाजी थापेर अस्पतालका लागि लडिरहनु भयो। अहिले उहाँ सेवानिवृत्त हुनु भयो भन्दैमा हामी चुप बस्न मिल्दैन।'
डा केसीका विषयमा सरकार गम्भीर नभए अस्पतालको सेवा ठप्प पार्नेसम्मको कठोर कदम चाल्ने चेतावनीसमेत दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
