डडेल्धुरा– सुदूरपश्चिम प्रदेश सरकारले १६ अत्याधुनिक एम्बुलेन्स वितरण गरेको छ। झण्डै सवा ६ करोड रुपैयाँमा ठेक्का प्रकृयाबाट खरिद गरिएका एम्बुलेन्सहरू ९ वटै जिल्लाका अस्पताल र स्वास्थ्यचौकीलाई हस्तान्तरण गरिएको सामाजिक विकास मन्त्रालयका प्रवक्ता हेमराज खड्काले बताए।
बुधबार धनगढीमा एक कार्यक्रमको आयोजना गरी स्थानिय तहका जनप्रतिनिधीमार्फत एम्बुलेन्स वितरण गरिएको हो। एम्बुलेन्स हस्तान्तरण कार्यक्रममा बोल्दै सुदूरपश्चिम प्रदेशका सामाजिक विकासमन्त्री कृष्णराज सुवेदीले अब सुदूरपश्चिम प्रदेशका दूरदराजमा बस्ने नागरिकले एम्बुलेन्सको अभावमा ज्यान गुमाउनु नपर्ने बताए। उनले अत्याधुनिक एम्बुलेन्सको सेवालाई प्रभावकारी बनाउन मन्त्रालयले नियमित अनुगमन निगरानी गर्ने जानकारी दिए।
वितरण गरिएका १६ वटा एम्बुलेन्समा एयरकन्डिसनसहित मुटुको धड्कन नाप्ने मनिटर, अक्सिजन सिलिन्डर, स्वास्थ्य र सुरक्षाका अन्य उपकरणको पनि व्यवस्था गरिएको छ। एम्बुलेन्स चालकलाई तालिम दिएपछि मात्रै एम्बुलेन्सको प्रयोग गरिने मन्त्रालयले जनाएको छ। तालिम दिन समय लागेकाले एम्बुलेन्स विरणमा ढिला भएको मन्त्रालयले जनाएको छ।
सामाजिक विकास मन्त्रालयले सेती प्रादेशिक अस्पताल, प्राथमिक स्वास्थ्य केन्द्र कमलबजार अछाम, जोगबुडा अस्पताल डडेल्धुरा, जिल्ला अस्पताल दार्चुला, बैतडी र बझाङ, टाटे स्वास्थ्यचौकी बाजुरा, रुद्रेश्वर स्वास्थ्यचौकी बैतडी, खार स्वास्थ्यचौकी दार्चुला, रायल स्वास्थ्यचौकी बझाङ, नवदुर्गा स्वास्थ्यचौकी डडेल्धुरा, डोटीमा जिल्ला अस्पताल र चवराचौतार स्वास्थ्यचौकी, अछामको जिल्ला अस्पताल, बाब्ला स्वास्थ्यचौकी र बान्नीगढीमा एम्बुलेन्स वितरण गरेको हो।
अत्याधुनिक एम्बुलेन्स ग्रामिण सडकका लागि उपयुक्त नभएको सार्वजनिक सवारी चालकहरूले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
