इंग्ल्यान्ड- म्यान्चेस्टर सिटी तनावपूर्ण खेलमा विगन एथलेटिकसँग पराजित भएको छ। एफए कपको अन्तिम ८ मा प्रवेशका लागि गएराति भएको सो खेलमा इंग्लिस प्रिमियिर लिग लिडर सिटी १–० ले पराजित भएको हो।
एफए कपको सम्भावित विजेताको रुपमा लिइएकाे सिटीले अधिकांश समय खेललाई आफ्नो पकडमा राखे पनि गोल गर्न भने सकेन। खेलमा ८३ प्रतिशत समय बल विगनको क्षेत्रमा राखेको सिटीले २९ वटा सट प्रहार गरेको थियो। तर ५ वटा मात्रै प्रहार गोल पोष्ट केन्द्रित रहेपनि गोल भने हुन सकेन।
आफ्नै घरेलु मैदानमा भएको खेलमा विगनका लागि डिफेन्डर चेइ डुन्क्लीले १३ पटकसम्म सिटीको प्रहारलाई डाइभर्ट गरिदिएका थिए। त्यस्तै सेन्टर ब्याक डान बर्नले पनि प्रतिरक्षा पंक्तिलाई मजबुत बनाउन निकै मेहनत गरेका थिए।
उता खेलअवधिभर विपक्षीको पोष्टतर्फ ४ मात्र सट प्रहार गरेको विगनले २ सट तार्गेटमा प्रहार गरेको थियो। जसमध्ये खेल सकिन ११ मिनेट बाँकि रहँदा विगनका विल ग्रिगले करिब २० यार्डको दुरीबाट हानेको प्रहारले भने गोल पोष्टको दिशा लिएको थियो। सोहि एक गोलको मदतले लिग वान क्लब विगन एफ ए कपको क्वाटरफाइनल पुगेको छ।
एक गोलसँगै ग्रिग एफए कपको यो सिजनका सर्वाधिक गोलकर्ता कनेका छन्। उनको गोल संख्या ७ पुगेको छ।
यसअघि सिटीका फर्नाडिन्होले पहिलो हाफमा गोल गर्ने एक सुनौलो मौका गुमाएका थिए। पहिलो हाफको थप समयमा विगनका म्याक्स पावरलाई लडाएका सिटीका फाबियन डेल्फले रातो कार्ड खादैँ मैदान बाहिरिएपछि खेल तनावपूर्ण बन्यो।
करिअरकै दोस्रो रातो कार्ड खाएका डेल्फले आगामि आइतबार आर्सनलसँग हुने लिग कपको फाइनल खेल गुमाउने छन्। पहिले पहेँलो कार्ड झिक्दै रेफ्री एन्थोनी टेलरले नाम लेखिरहेको भएपनि पछि भने डेल्फलाई रातो कार्ड नै देखाएका थिए।
सोहि घटनाका कारण सिटीका म्यानेजर पेप ग्वार्डिवालाले पनि आफ्नो आक्रोशलाई नियन्त्रणमा राख्न सकेनन्। पहिलो हाफको खेल सकेर बाहिरिदै गर्दा करिडोरमा सिटीका म्यानेजर ग्वार्डिवाला विगनका समकक्षी पौल कुकमाथि हातपातमा उत्रीए।
खेलको अन्त्यलगत्तै सिटी स्ट्राइकर सर्जियो अग्वुइरोले घरेलु दर्शकमाथि दुव्र्यवहार गरे। रंगशालामा उपस्थित सिटीका समर्थकले मैदानमा बोत्तल लगायतका वस्तुहरु प्रहार गरेका थिए।
यो हारसँगै सिटी, एफए कपको जारी सिजनमा डिडब्लु रंगशालामा हार्ने तेस्रो टोली बनेको छ।
ग्वार्डिवालको सिटीले यो सिजनमा गोल गर्न नसकेकोे तेस्रो पटक हो। यसअघि इएफएल कपमा वुल्भ्स तथा प्रिमियर लीगमा क्रिस्टल प्यालेसमाथि सिटी गोल गर्न चुकेको थियो।
सन् २००४/००५ सिजनमा तेस्रो चरणबाटै आउट भएपछि सिटी एफए कपको नक आउट चरण नपुग्दै बाहिरिएको भने यो पहिलो पटक हो।
जितपछि क्वाटरफाइनलमा विगनले साउथह्याम्पटनसँगको भेट पक्का गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
