आन्ध्र प्रदेश, आफ्नो खेतीमा कसैको आँखा नलागोस् भन्न भारत आन्ध्र प्रदेशको नेल्लोर जिल्लाका एक किसानले खेतमा चर्चित मोडल तथा अभिनेत्री सन्नी लियोनीको तस्वीर झुन्डाएका छन्। बंदकिंडपल्ली गाउँका स्थायी बासिन्दा चेंचु रेड्डीले कृषि उत्पादनमा कसैको नजर नलागोस् भन्न लियोनीको तस्वीर झुन्डाएको बताएका छन्।
रेड्डीसँग १० एकड जमीन छ। उनले भेन्टा, काउली, बन्दा, खुर्सानीलगायतका तरकारीहरुको उत्पादन गर्छन्।
रेड्डीका अनुसार यो वर्ष उब्जनी निकै राम्रो भएकोले तरकारी खेतीले गाउँले तथा बटुवाहरुको ध्यान तानिरहेको छ। उनले भने,‘त्यसकारण मानिसको ध्यान भड्काउन सन्नी लियोनीको तस्वीर खेतको वरिपरी झुन्डाएको हुँ।’
सन्नी लियोनी अंकित सो पोष्टरमा ‘मलाई देखेर नरुनुहोला’ भनेर समेत लेखिएको छ। आफ्नो तरिकाले आजकल काम गरेको उनी दावी गर्छन्। यो कार्यबाट मानिसहरुको ध्यान भड्किएकोले उत्पादन पनि राम्रो भएको उनको बुझाइ छ।
दक्षिण भारतमा खराब नजर नलागोस् भन्न हरेकको घरबाहिर एक डराउने खालको मुर्ति वा मुखौटा राख्ने प्रचलन नै हुन्छ। कतिपय भारतीय यो पनि मान्छन् कि खेत तथा कृषि उत्पादनमासमेत यो कुरा लागु हुन्छ।
मानिसको खराब नजर यदि बालीनालीमा पर्यो भने उब्जनी घट्ने गर्दछ। किनकी केहि मानिसको खराब दृष्टिले बालीनालीमा खराब उर्जाको सञ्चार गर्छ भन्ने उनीहरु मान्यता राख्दछन्।
कतिपय मानिस भने यसका लागि चरा तथा जनावरलाई पनि प्रयोगमा ल्याउँछन्। रेड्डीले भने,‘मैले मात्रै यो तरिकामा थोरै परिवर्तन गरेको हुँ। जसले काम पनि गरिरहेको छ।’
तर केहि किसान भने यस्तो कुरामा विश्वास गर्दैनन्। सोहि स्थानका अर्का किसान गोगिनेनी बाबुले यो सबै अन्धविश्वासलाई बढावा दिने काम मात्र भएको टिप्पणी गरे। उनले मानिसको नजरबाट कसरी कसैको नोक्सान हुनसक्छ? भनि प्रश्न गरे।
उनले भने,‘उनीहरुले भनेजस्तै यदि कसैले खराब नजर लगाएर नोक्सान हुने हो भने त सन्नी लियोनीलाई केहि भयो भने के अब यी किसानलाई जिम्मेवार ठान्न मिल्छ?’
बाबुले तर्क गरे,‘उनीहरुकै तर्कका हिसाबले त सन्नी लियोनीले अव आफ्नो सुरक्षा लागि भन्दै ती किसानमाथि मुद्दा हाल्नुपर्छ।’
सो पोस्टरका कारण बरु खेतमा काम गर्ने महिला कामदारहरुलाई असहज महशुष हुनसक्ने बाबुको भनाइ छ। यसबारेमा रेड्डीले सोच्नुपर्ने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
