जनकपुरधाम– प्रदेश २ को अस्थायी राजधानी जनकपुरधामको सबैभन्दा ठूलो समस्या हो अव्यवस्थित ढल र सरसफाइ। यो समस्यालाई समाधान गर्न सरकार र जनकपुर उपमहानगरपालिका बीच २ अर्ब रुपैयाँ बराबरको सम्झौतामा हस्ताक्षर भएको छ।
जनकपुर उपमहानगरपालिका भित्र एसियाली विकास बैंकको ऋण सहयोगमा निर्माणधीन करिब ९ किलोमिटर सडक र ३२ किलोमिटर नालाको निर्माण कार्य नसकिँदैन जनकपुर नगरका लागि २ अर्बको सम्झौता भएको जनकपुर उपमहानगरपालिकाका मेयर लालकिशोर साहले पत्रकार सम्मेलन गरी जानकारी दिए।
खानेपानी तथा सरसफाइ मन्त्री महेन्द्र यादव र जनकपुर उप–महानगरपालिकाका मेयर साहद्वारा हस्ताक्षरित सम्झौता अनुसार ५५ किलोमिटर बाटो, २२ वटा पोखरीको सौन्दर्यीकरण र नगरभित्र १ सय डिलक्स बाथरुम तथा शौचालय निर्माण गरिने उल्लेख छ।
सरकारको सह–लगानी आयोजना अन्तर्गत जनकपुरको ढल विकास आयोजनाका लागि झन्डै डेढ अर्ब रूपैयाँको सहयोग सम्बन्धी परिपत्रमा हस्ताक्षर भएको र जनकपुरको सरसफाइ तथा पोखरी प्रवर्धनका लागि ५० करोड़ रूपैयाँ छुट्याइएको छ। सम्झौतामा यी आयोजना ३ वर्षभित्र पूरा गरिने लक्ष्य लिइएको छ।
आयोजनाका लागि छिट्टै डिपिआर तयार पारिने मेयर साहले बताए। आयोजनाका लागिसरकारले ८५ प्रतिशत रकम उपलब्ध गराउनेछ भने १५ प्रतिशत रकम टिडिएफ ऋण मार्फत उपलब्ध गराइनेछ।
यसैगरी मेयर साहले जनकपुरधामलाई विश्व सम्पदा सूचीमा सूचीकृत गराउनका लागि आउँदो वर्षदेखि पहल गरिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
