काठमाडौं- सर्ज जर्नाब्रीले ४ गोल गरेपछि वायर्न म्युनिखले टोटनह्याम हट्सपरमाथि फराकिलो जित दर्ता गरेको छ।
च्याम्पियन्स लिगअन्तर्गत आज बिहान सकिएको खेलमा वायर्नले टोटनह्याम हट्सपरको पोष्टमा गोलको वर्षा नै गरेको थियो। कूल ९ गोल भएको खेलमा वायर्नले ७ गोल हानेको थियो।
पूर्व आर्सनल युवा स्टार जर्नाब्रीले सबै गोल दोस्रो हाफमा गरेका हुन्। उनले ५३, ५५, ८३ र ८८ मिनेटमा गोल गरे। च्याम्पियन्स लिगको इतिहासमा दोस्रो हाफमा ४ गोल गर्ने उनी पहिलो खेलाडी बनेका छन्। जर्नाब्री च्याम्पियन्स लिगमा एकै खेलमा ४ गोल गर्ने मारियो गोमेजपछिका दोस्रो जर्मन फुटबलरसमेत बनेका छन्।
यसबाहेक वायर्नका लागि रोवर्ट लेवानडोस्कीले २ तथा जोसुवा किम्मिचले एक गोल गरे। २० यार्ड दायराबाट जोसुवाले निक्कै सुन्दर ढंगबाट बललाई जाली चुमाएका थिए।
खेलमा सुरुवाती अग्रता भने टोटनह्यामले लिएको थियो। सोन हेयुङ-मिनले १२ मिनेटमा टोटनह्यामका लागि पहिलो अग्रता दिलाएका थिए। तर, त्यसको ३ मिनेटपछि नै वायर्नका किम्मिचले खेल बराबरीमा ल्याएका थिए। ह्यारी केनले टोटनह्यामका लागि पेनाल्टीमार्फत दोस्रो गोल गरे पनि घरेलु दर्शकलाई त्यसले खुसी दिल्याउन सकेन।
टोटनह्याम म्यानेजर मौरिसियो पोचेट्टिनोका लागि यो करियरकै सबैभन्दा ठूलो हार हो। सन् २०१२ मा इस्पानियोलसँग ५-० ले हार्नुनै म्यानेजरको रुपमा यसअघिको फराकिलो हार थियो।
सन् २०१४ पछि वायर्न अवे खेलमा दोस्रोपटक सबैभन्दा फराकिलो गोलअन्तरमा विजयी भएको छ। यसअघि सन् २०१४ को अक्टोबरमा वायर्नले रोमामाथि ७-१ कै अन्तरको जित निकालेको थियो।
लिगअन्तर्गत आजै सकिएका अन्य खेलहरुमा रियल मड्रिड क्लब बर्ग्ससँग २-२ को बराबरीमा रोकिएको छ। पेरिस सेन्ट जर्मेनले गालाटासारेलाई १-० ले पाखा लगाउँदा शाख्तर डोनास्कले एटलान्टालाई २-१ ले हरायो।
रेड स्टार बेल्जियमले ओलाम्पियाकोसलाई ३-१, म्यानचेस्टर सिटीले डिनामो जाग्रिबलाई २-०, जुभेन्टसले बी लिभरकुसानलाई ३-० र एट्लेटिको मड्रिडले लोकोमोटिभ मस्कोलाई २-० ले पराजित गर्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
