सभामुख सचिवालयको खण्डनका ५ कमजोरी

राजनीति

किशोर दहाल मंगलबार, असोज १४, २०७६ १०:४०

काठमाडौं- सभामुख कृष्णबहादुर महरामाथि यौन दुराचारको आरोप लागेको छ। आरोप लगाउने महिला र सभामुख महराबाट घटनाबारे प्रारम्भिक प्रतिक्रियाहरु सार्वजनिक भइसकेका छन्। महिलाले महरा रक्सीले मातेर आफ्नो कोठामा आएको र जबर्जस्ती गरेको बताएकी छिन् भने महराले यो आरोपलाई कर्मचारी समायोजनसँग जोडेका छन्।

सोमबार नै सञ्चारमाध्यममा समाचार सार्वजनिक भएपछि महराको सचिवालयले खण्डन सार्वजनिक गर्‍यो। उनका प्रेस सल्लाहकार डिल्ली मल्लले जारी गरेको सो खण्डनमा महराको केही कमजोरीको संकेत पाइन्छ।

स्वतन्त्र छानबिन होस् भनिएन
सामान्यतया आरोप लागिसकेपछि उच्च पदमा रहेका व्यक्ति वा उसको सचिवालयले खण्डन गर्नु सामान्य नै हो। तर, खण्डन गर्दैमा त्यो नै अन्तिम सत्य भन्ने हुँदैन। आरोप निराधार हो, त्यसका लागि म स्वतन्त्र छानबिनका लागि सम्बन्धित निकायलाई अनुरोध गर्छु/गर्छौं भन्नु अपेक्षित हुन्छ। तर, सभामुखको सचिवालयले निकालेको खण्डनमा त्यस्तो केही छैन। आफ्नो कुरा भन्नेबाहेक त्यसको स्वतन्त्र पुष्टि गराउने विषयमा कुनै माग गरिएको छैन। सभामुखको तर्फबाट सहयोगको प्रतिबद्धता पनि गरिएको छैन।

आरोपकर्तालाई कारबाहीको माग गरिएन
सभामुखको सचिवालयमार्फत सार्वजनिक विज्ञप्तिलाई मात्रै पत्याउने हो भने उनी दोषी छैनन्। उनलाई आरोप मात्रै लगाइएको सो खण्डनको निष्कर्ष छ। तर, सभामुखजस्तो उच्च पदस्थमाथि आरोप मात्रै लगाउने मनशाय राखिएको भन्ने बुझाइ हो भने आरोपकर्तालाई उचित कारबाहीको माग गरिएन। सभामुख निर्दोष हुनुहुन्छ, सभामुखको राजनीतिक उचाइ, व्यक्तित्व र प्रतिष्ठालाई सिध्याउने षड्यन्त्र भएको छ, त्यसैले आरोप लगाउनेलाई कारबाही होस् भन्न सक्नुपर्थ्यो। तर, त्यसो गरिएन।

कठपुतलीको संज्ञा
सचिवालयको खण्डनमा भनिएको छ- ‘सभामुखको राजनीतिक व्यक्तित्व र छविलाई अरु कुनै पनि हतियारबाट गलाउन नसकेपछि एउटा ‘कठपुतली’ तयार गरी जसरी सामाजिक रुपमा बदनाम गर्न दुष्प्रयास गरिएको छ, यसको जति कडा शब्दमा भर्त्सना गरे पनि कम हुन्छ।'

कठपुतली शब्दले अर्कोको इसारामा नाच्ने वा गतिविधि गर्ने भन्ने अर्थ दिन्छ। अर्थात्, ती महिलालाई अरु कसैले महराको व्यक्तित्वलाई गलाउन नसकेपछि यस्तो आरोपको खेल रचिएको खण्डनको आशय छ। यस्ता शब्दावलीले घटनालाई अन्तै मोड्न गरिएको आशंका गर्न सकिन्छ। महिलाले आफूमाथि जबर्जस्ती करणी भयो भनेर भन्दाभन्दै पनि अरु कसैले उनलाई प्रयोग गर्‍यो भन्ने आशयको खण्डनले प्रश्न उठाउँछ- के कोही अरुको इसारामा बलात्कृत भएँ भनेर गुहार गर्छ?

महिलाको कोठामा गएको कि नगएको?
सभामुख महरा बेलुका महिलाकै कोठामा गएर त्यहीँ जबर्जस्ती गरेको कुरा उनको तर्फबाट आएको छ। सभामुखले पनि विभिन्न सञ्चारमाध्यममा कुरा गर्दै आफू गएको स्वीकार गरेका छन्। तर, सचिवालयको खण्डनमा भने उनी कतै नगएको उल्लेख छ। भनिएको छ- ‘सभामुखज्यू हिजो असोज १२ गते आइतबार दिउँसो १२ बजे सिंहदरबारस्थित आफ्नो कार्यकक्षमा गएको र दिउँसो २ बजेतिर बालुवाटार निवासमा फर्किएको बाहेक उहाँ त्यसपछि अन्यत्र कहीँ नगएको पनि म यसै विज्ञप्तिबाट प्रस्ट पार्न चाहन्छु।‘

स्वयं सभामुख महराले स्वीकार गरिसकेको विषय सचिवालयले छोप्न खोजेको छ। जसले घटनालाई झन् रहस्यमयी बनाइदिएको छ।

खण्डनको भाषाः महराको कि सचिवालयको?
सचिवालयको भाषा स्वाभाविक रुपमा सभामुखको तर्फबाट आफ्नो कुरा भन्ने नै हो। सोमबारको खण्डनमा पनि सो कुरा प्रयोग गरिएको छ। तर, कर्मचारी समायोजनको विषयमा भने सभामुख नै बोलेका छन्। भनिएको छ- ‘… तर कर्मचारी समायोजनमा सामान्य प्रशासन र स्वास्थ्य मन्त्रालयले नै सबै प्रक्रिया मिलाउने हुँदा मैले त्यसमा काम नगरेको भनी स्वास्थ्य शाखाका कर्मचारीहरु र ती महिला पनि असन्तुष्ट थिए।‘

मैले भनेर यहाँ पक्कै पनि प्रेस संयोजक मल्ललाई भन्न खोजिएको होइन होला। किनकि, त्यहाँ अर्का दुई निकायहरु सामान्य प्रशासन र स्वास्थ्य मन्त्रालयको कुरा छ र त्यसकै दाँजोमा आफूलाई उभ्याइएको छ। प्रेस संयोजककै भाषा हुन्थ्यो भने ‘सभामुखले त्यसमा काम नगरेको भनी स्वास्थ्य शाखाका कर्मचारीहरु र ती महिला पनि असन्तुष्ट थिए’ भन्ने खालको भाषा प्रयोग हुनुपर्थ्यो।

सम्बन्धित समाचार