काठमाडौं- रायन बुर्ल र रिचमन्ड मुतुम्बामीले छैटौं विकेटका लागि ६९ रनको साझेदारी गरेपछि नेपाल जिम्बाबेसँग पराजित भएको छ।
त्रिकोणात्मक टी-२० शृंखलाअन्तर्गत इन्डियन एसोसिएसन ग्राउन्ड सिंगापुरमा भएको पहिलो खेलमा नेपाल जिम्बाबेसँग ५ विकेटले पराजित भएको हो।
टस जितेर पहिले ब्याटिङ गरेको नेपालले निर्धारित २० ओभरमा ६ विकेटको क्षतिमा १ सय ३२ रनको योगफल तयार गर्यो। नेपालको सुरुवात भने राम्रो हुन सकेको थिएन। जिम्बाबेविरुद्ध डेब्यू गरेका इसान पान्डे दोस्रो ओभरमै ४ रनमा पेवेलियन फर्किए। कप्तान पारस खड्का १८, आरिफ शेख ८, कुशल मल्ल २ तथा सन्दीप जोरा १७ मा आउट भए। नेपालका कुनै पनि खेलाडीले लामो साझेदारीका लागि योगदान गर्न सकेनन्।
यद्यपि मध्यक्रमका ब्याट्सम्यान दीपेन्द्र सिंह ऐरी (४० रन) तथा सोमपाल कामी (अविजित २५ रन)ले नेपालको इनिङलाई उकास्न खोजेका थिए। दीपेन्द्रले आफ्नो पारीमा ५ चौका प्रहार गर्दा सोमपालले ३ छक्का हिर्काए।
अन्तिमसम्म मैदानमा रहेका विनोद भण्डारीले ११ रन बनाउँदै सोमपाललाई सघाएका थिए।
बलिङतर्फ जिम्बाबेका कप्तान सिन विलियम्सले २ तथा विलिंग्टन मासकाद्जा, तेन्दाइ छतारा, नेभिल माद्जिभा र रायन बुर्लले समान १/१ विकेट हात पारे।
१ सय ३३ रनको लक्ष्य पछ्याएको जिम्बाबेको पनि सुरुवात राम्रो हुन सकेन। उसले सुरुवाती ३ ब्याट्सम्यानलाई शून्य रनमा गुमाएको थियो। प्रारम्भिक ब्याट्सम्यान ब्रियान चरी १९ रन बनाएर दिपेन्द्र सिंह ऐरीको हातबाट रनआउट हुँदा रेगिस छकाभ्वा, टिनोटेन्डा मुतोम्बोद्जी र कप्तान सिन विलियम्स खाता खोल्न नपाई सन्दीप लामिछानेको बलमा समातिए।
पाँचौं नम्बरमा मैदान छिरेका तिमीसेन मरुमा (१२ रन) पनि पारसको बलमा बोल्ड भएपछि एक समय जिम्बाबे १० ओभरमा ६४/५ को अवस्थामा पुगेको थियो।
तर, बुर्लले ४१ र मुतुम्बानीले ४० रनको जिम्मेवार पारी खेलेपछि जिम्बाबेले ११ बल अगावै लक्ष्य भेट्टायो। अन्तिमसम्म मैदानमा रहँदा बुर्लले ३ चौका र २ छक्का तथा मुतुम्बानीले १ चौका र ४ छक्का प्रहार गरे।
जिम्बाबेलाई जितका लागि अन्तिम ६ ओभरमा ५१ रन आवश्यक रहे पनि त्यसपछिको ३ ओभरमा दुवै मिली ४७ रन हिर्काएका थिए। अन्तिम समयमा फितलो बलिङ गर्दा नेपाल हार्न पुगेको हो। १५औं ओभरमा दीपेन्द्रले १५ रन, १६औं ओभरमा अविनाश बोहराले ९ तथा १७औं ओभरमा कुशल मल्लले २३ रन दिएका थिए।
खेलको म्यान अफ दि म्याच मुतुम्बानी घोषित भए।
शृंखलाअन्तर्गत नेपालले अर्को खेल सिंगापुरसँग आज खेल्दैछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।